News

POST TYPE

OPINION

Ford ကားစီးမှ ဖြစ်မှာတဲ့လား
09-Jun-2018 tagged as



၂၀၁၈ ခုနှစ် ဇွန်လ ၄ ရက်နေ့က ပြုလုပ်သည့် ဒုတိယအကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန်အစည်းအဝေးတွင် “ရန်ကုန်တိုင်းဒေသကြီးအစိုးရက ဝယ်ယူရန်တင်ပြလာသည့် Ford ကား ၁၀ စီး ဝယ်ယူရန်ကိစ္စနှင့်ပတ်သက်၍ သဘောမတူကြောင်း” ရန်ကုန်တိုင်းဒေသကြီးလွှတ်တော် ဘဏ္ဍာရေး၊ စီမံကိန်း၊ စီးပွားရေးကော်မတီဥက္ကဋ္ဌ ဒေါ်စန္ဒာမင်းက ဆိုပါသည်။

ဒေါ်စန္ဒာမင်းက ဆက်လက်ပြောကြားရာတွင် “ဝန်ကြီးများကို အန္တရာယ်ကင်းကင်းနှင့်စီးစေချင်ပါကြောင်း၊ လက်ရှိတွင် ဝန်ကြီးများသည် လိုင်းကားလည်းတိုးစီးခြင်းမရှိသကဲ့သို့ Taxi စီးနေသည့် ဝန်ကြီးများလည်းမရှိပါကြောင်း၊ ကိုယ်ပိုင်ကားစီးနေသည့် ဝန်ကြီးများလည်းရှိကြောင်း၊ ခြိုးခြံချွေတာရန် နိုင်ငံတော်၏အတိုင်ပင်ခံပုဂ္ဂိုလ်က ဝန်ကြီးဌာနများကိုပေါင်းပြီး ဝန်ကြီးတစ်ယောက်ကို ဌာနလေးခုကိုင်ခိုင်းကာ လုပ်ဆောင်နေသည့်အချိန်၊ သက်တမ်းအားဖြင့် ၂ နှစ်သာကျန်ရှိတော့သည့် အချိန်တွင် ကားများဝယ်ပြီးစီးဖို့ လိုအပ်သည်ဆိုပါက လွှတ်တော်၏အဆုံးအဖြတ်ရယူရမည်ဖြစ်ပြီး အားလုံးသဘောတူသည်ဆိုပါက ကျွန်မတို့စီမံကိန်းကော်မတီကလည်း သဘောတူမည်” ဟု ပြောကြားသွားပါသည်။

ဒေါ်စန္ဒာမင်း၏ပြောကြားချက်သည် သဘာဝကျပြီး ဖြစ်သင့်ဖြစ်ထိုက်သည်ကို ပြောဆိုသွားခြင်းဖြစ်ရာ ပြည်သူတို့၏ဆန္ဒသဘောထားနှင့်လည်း တစ်ထပ်တည်းကျသည်ဟု ဆိုချင်ပါသည်။ တစ်ဖက်ကကြည့်ပြန်လျှင်လည်း အစိုးရအဖွဲ့ဝင်များစီးနင်းနေသည့်ကားများသည် သက်တမ်းကြာမြင့်ပြီး လက်ပူတိုက်၍စီးနေသည့်ကားများ ဖြစ်နေမည်မှာ အသေအချာပင် ဖြစ်ပါသည်။ သို့ရာတွင် မည်သည့်လုပ်ငန်းကိုလုပ်သည်ဖြစ်စေ အခြေအနေ အချိန်အခါဆိုသည်မှာ ရှိပါသည်။ ယခုအခြေအနေသည် နိုင်ငံတော်၏ ရသုံးမှန်ခြေငွေစာရင်းတွင် လိုငွေများစွာဖြစ်ပေါ်နေခြင်း၊ မြန်မာငွေကြေးဖောင်းပွ၍ နိုင်ငံခြားငွေဈေးတက်ကာ ငွေကြေးဈေးကွက် မတည်မငြိမ် ဖြစ်နေခြင်းနှင့် အလုပ်သမားများ လစာဝင်ငွေနည်းပါးကာ လက်လုပ်လက်စား အခြေခံလူတန်းစားများမှာ ကုန်ဈေးနှုန်းကြီးမြင့်သည့်ဒဏ်ကို အလူးအလဲ ခံစားနေကြရသည့် အခြေအနေအချိန်အခါလည်း ဖြစ်ပါသည်။

ယနေ့တာဝန်ယူနေကြသော အစိုးရအဖွဲ့အဆင့်ဆင့်မှ ဝန်ကြီးများသည် ယခင်အစိုးရအဖွဲ့များလက်ထက် တာဝန်ယူဆောင်ရွက်ခဲ့ကြသော ဝန်ကြီးများထက် လုပ်ငန်းတာဝန်ပမာဏ ပို၍လည်းလျော့ပါးမသွားပါ။ သို့ရာတွင် လုပ်ပိုင်ခွင့်အရာ၌ များစွာလျော့နည်းသွားမည်မှာ အသေအချာပင်ဖြစ်ပါသည်။ တစ်ချိန်က ဝန်ကြီးတစ်ပါး ခရီးသွားမည်ဆိုလျှင် ဆီအပြည့်နှင့် ကားအကောင်းစားတစ်စီးက နေအိမ်/ရုံးရှေ့အရောက် အဆင်သင့်နေရာယူပြီး ဖြစ်ပါသည်။ ပို့ချင်သူကုမ္ပဏီပိုင်ရှင်၊ စီးပွားရေးလုပ်ငန်းရှင်တွေများ၍ တစ်ခါတစ်ရံ အလှည့်ပေး၍ အကူအညီယူရပါသည်။ သို့ရာတွင် ယနေ့လိုအချိန်အခါမျိုး၌ ထိုကဲ့သို့သော လူသိထင်ရှားအကူအညီ များရယူမိပါက ဂျာနယ်စာမျက်နှာထက် ပက်လက်မျောမည်သာဖြစ်ပါသည်။ သည်တော့ ယခုအခါ ကားအစုတ်တွေစီးနေရသောဝန်ကြီးများသည် ကြံရာမရဖြစ်ကာ ကြံမိကြံရာသဘောဖြင့် နိုင်ငံတော်ဘဏ္ဍာငွေကို အသုံးပြု၍ Ford ကားအသစ်ဝယ်စီးရန် အဆိုပြုတင်ပြလာခြင်းဖြစ်ပါမည်။

ဂျပန်ကားလည်းကောင်းပါသည်

အကယ်စင်စစ် ပြောရမည်ဆိုလျှင် ပြည်နယ်နှင့်တိုင်းဒေသကြီးအစိုးရအဖွဲ့များတွင် သင့်တင့်လျောက်ပတ်သော လုပ်ပိုင်ခွင့်များရှိပါသည်။ တစ်ဖက်နိုင်ငံနှင့်ဆက်စပ်နေသော ပြည်နယ်များတွင် လိုင်စင်မဲ့ကားများ မကြာခဏဖမ်းဆီးရမိလျက်ရှိပါသည်။ အဆိုပါ ဖမ်းဆီးရမိလျက်ရှိသောကားများကို လေလံပစ်ရာတွင် အစိုးရအဖွဲ့အပါအဝင် ပြည်နယ်/တိုင်းဒေသကြီး၊ ခရိုင်နှင့်မြို့နယ် ဌာနဆိုင်ရာအဖွဲ့အစည်းများသို့ ကြမ်းခင်းဈေးသာသာဖြင့် ရောင်းချပေးလျက်ရှိပါသည်။ အဆိုပါကားများမှာ Model နိမ့်သောကားများမဟုတ်သကဲ့သို့ ပြန်လည်ပြင်ဆင်ပါကလည်း သိန်းရာဂဏန်းအနည်းငယ်ဖြင့် ကားအသစ်တစ်စီးအတိုင်းပင် စွမ်းဆောင်ရည်မြင့်မားကြပါသည်။ ယင်းတို့ကို အစိုးရအဖွဲ့အချင်းချင်း ညှိနှိုင်းတိုင်ပင်၍ ဝယ်ယူမည်ဆိုပါကလည်း ကုန်ကျစရိတ်များစွာ သက်သာမည်ဖြစ်ပါသည်။ ယုတ်စွအဆုံး ဆိုရမည်ဆိုလျှင် ယနေ့ဂျပန်နိုင်ငံလုပ် ကားအသစ်တစ်စီးကို ဝယ်ယူမည်ဆိုပါကလည်း သိန်းလေးငါးရာခန့် အသုံးပြုလျှင်ပင် Model မြင့်ကားတစ်စီးကို ရရှိနိုင်ပါသည်။ တိုယိုတာ၊ ဟွန်ဒါ စသောကားများသည် ယနေ့ကမ္ဘာ့ရောင်းအားအမြင့်ဆုံး စာရင်းဝင်ကားများဖြစ်သည်က သက်သေပင်ဖြစ်ပါသည်။ ဂျပန်နိုင်ငံမှထုတ်လုပ်သောကားများသည် အကြမ်းခံနိုင်ရုံမျှမက ဆီစားလည်းသက်သာသဖြင့် တစ်စတစ်စဆီဈေးနှုန်းကြီးမြင့်လာသော အခြေအနေတွင် အသင့်လျော်ဆုံးဖြစ်ပါသည်။

ဖို့ဒ်မှဖို့်ဒ်တဲ့လား

ဖို့ဒ်ကားများသည် အင်္ဂလန်နိုင်ငံထုတ်ကားများဖြစ်ပြီး အကြမ်းခံနိုင်သည်ဆိုသည်ကတော့ လူတိုင်းသိပါသည်။ သို့သော်လည်း ဆီစားများပြီး ပြင်ဆင်စရိတ်များပြားသည်ကိုလည်း ထည့်သွင်းစဉ်းစားဖို့လိုပါသည်။ ကုမ္ပဏီက ပြန်လည်ပြင်ဆင်ပေးသည်ဆိုစေဦးတော့ အပိုပစ္စည်းများ၏ ဈေးနှုန်းကကြီးမားပါသည်။ ထို့အပြင် လမ်းပန်းဆက်သွယ်ရေးခက်ခဲသော ချင်းပြည်နယ်၊ ကချင်ပြည်နယ်၊ ရှမ်းပြည်နယ်၊ ကယားပြည်နယ်၊ မကွေးတိုင်းနှင့် စစ်ကိုင်းတိုင်းဒေသကြီးကဲ့သို့ လမ်းပန်းဆက်သွယ်ရေး ခက်ခဲသောဒေသများအတွက် ပြောစရာမလိုသော်လည်း ရန်ကုန်တိုင်းဒေသကြီးကဲ့သို့ လမ်းပန်းဆက်သွယ်ရေးကောင်းမွန်သော ဒေသမျိုးအတွက်မူ မလိုအပ်ဟု ထင်မြင်ယူဆပါသည်။ ထို့ကြောင့် ရန်ကုန်တိုင်းဒေသကြီး အစိုးရအဖွဲ့အနေနှင့် လက်ရှိအသုံးပြုနေသောကားများမှာ ပြင်ဆင်၍မရလောက်အောင် ပျက်စီးယိုယွင်းနေသည်ဆိုပါက လုပ်ထုံးလုပ်နည်းများနှင့်အညီ သက်ဆိုင်ရာသို့အပ်နှံ၍ ကားအသစ်ပြန်လည်ဝယ်ယူရန် လျှောက်ထားဆောင်ရွက်နိုင်မည်ဖြစ်ပါသည်။

ရေရှည်ခိုင်ခံ့ပြီး ကြံ့ခိုင်မှုလည်းရှိ ဆီစားလည်းသက်သာသော ဂျပန်နိုင်ငံထုတ်ကားများသည် ရန်ကုန်တိုင်းဒေသကြီးရှိလမ်းများပေါ်တွင် အသုံးပြုရန် သင့်လျော်ကောင်းမွန်ပါကြောင်း ဖော်ပြလိုပါသည်။ သို့ရာတွင် မည်သို့ပင်ဖြစ်စေ ဖို့ဒ်မှဖိုဒ့်ဆိုလျှင်တော့ စဉ်းစားစရာအကြောင်းများ ရှိလာပြီဖြစ်ပါသည်။

လွှတ်တော်နှင့်အစိုးရ သဘောထားမတူကြ

ယနေ့ နိုင်ငံတော်ကိုအုပ်ချုပ်နေသောအစိုးရသည် ပြည်သူလူထု၏ ဆန္ဒမဲအစစ်အမှန်ဖြင့် ရွေးကောက်တင်မြှောက်ထားသောအစိုးရစစ်စစ်ဖြစ်သလို ပြည်သူတို့ထံမှကောက်ခံရရှိသော အခွန်အကောက်များဖြင့် လည်ပတ်နေရခြင်းဖြစ်ပါသည်။ မဏ္ဍိုင်ကြီးသုံးရပ်မှ ပုဂ္ဂိုလ်များသည်လည်း ပြည်သူ့အခွန်အခကို စားနေကြသူများပါသည်။ ထို့ကြောင့် ဘာကိုပဲလုပ်လုပ် မူလအာဏာပိုင်ရှင်အစစ်ဖြစ်သည့် ပြည်သူ့မျက်နှာကိုကြည့်၍ လုပ်ကြရပါမည်။ ထို့ကြောင့်လည်း ပြည်သူတို့က တိုက်ရိုက်ရွေးချယ်တင်မြှောက်ထားသည့် လွှတ်တော်ကိုယ်စားလှယ်များက လက်မခံဘဲ ကန့်ကွက်သည်ဖြစ်ရာ ထိုအချက်ကို အစိုးရက လက်ခံဖို့ကောင်းပါသည်။

ယခုသော် ထိုသို့မဟုတ်ပါ။ လွှတ်တော်နှင့် အစိုးရ သဘောထားကွဲလွဲခြင်းအပေါ် လွှတ်တော်ဥက္ကဋ္ဌက ဝန်ကြီးကိုမေတ္တာရပ်ခံသည်မှာ “ကားကိစ္စကိုလျှော့ပေးရန်၊ သို့မဟုတ် ဝန်ကြီးပြောသည့်အတိုင်း လွှတ်တော်တွင် မဲခွဲပေးရပါက ဂုဏ်သိက္ခာကျသည်ဆိုသော်လည်း ယခုကဲ့သို့ ဖြစ်လာသည့်အတွက် မဲခွဲဆုံးဖြတ်မည်ဖြစ်ကြောင်း၊ ထို့နောက် ဘဏ္ဍာရေးကော်မရှင်မှတစ်ဆင့် ပြည်ထောင်စုလွှတ်တော်သို့ရောက်မည်ဖြစ်ကြောင်း၊ ထို့နောက် ပြည်ထောင်စုလွှတ်တော်ကိုယ်စားလှယ်များက ဆုံးဖြတ်ပြီး ဆုံးဖြတ်ချက်ကို ဒုတိယသမ္မတကစိစစ်ပြီး စက်တင်ဘာလတွင် ပြန်လည်ရောက်လာကာ အတည်ပြုရမည့်ကိစ္စဖြစ်ရာ ကိုယ်စားလှယ်များက စဉ်းစားဝေဖန်ပြီး လုပ်ပေးစေချင်ကြောင်း” ပြောကြားပါသည်။

သို့ရာတွင် တိုင်းဒေသကြီးဝန်ကြီးက အဆိုပါကိစ္စနှင့်ပတ်သက်၍ လွှတ်တော်ကိုယ်စားလှယ်များ၏ ဆွေးနွေးမှုကိုစိစစ်ကာ ဇွန်လ ၁ ရက်နေ့က အစိုးရအဖွဲ့ဝင်များနှင့်ဆွေးနွေးပြီးမှ ရေးဆွဲထားကာ အစိုးရအဖွဲ့ကလည်း ဆုံးဖြတ်ထားပြီးဖြစ်သည့်အတွက် ဘဏ္ဍာရေး၊ စီမံကိန်းနှင့်စီးပွား ရေးကော်မတီ၏ ကန့်ကွက်ချက်ကို လိုက်လျောနိုင်စွမ်းမရှိကြောင်းနှင့် ပြင်မပေးနိုင်ကြောင်း ပြောကြားပါသည်။ အဆိုပါကိစ္စနှင့်ပတ်သက်၍ လွှတ်တော်ကိုခေတ္တရပ်နားကာ ပြန်လည်စတင်သည့်အချိန်တွင် လွှတ်တော် ဥက္ကဋ္ဌက လွှတ်တော်ဆိုင်ရာနည်းဥပဒေ ၁၄၀ အရ တိုင်းဒေသကြီး ဝန်ကြီးချုပ်ထံ ဆက်လက်ပေးပို့မည်ဖြစ်ကြောင်း ပြောကြားခဲ့ပါသည်။

ဝန်ကြီးချုပ်က ဘာပြောမည်လဲ

ကျွန်တော်တို့နားလည်ထားသည်မှာ လွှတ်တော်ကော်မတီတစ်ခုက ကန့်ကွက်၍ အစိုးရ/ဝန်ကြီးဌာနက အလျှော့မပေးပါက လွှတ်တော်၏ သဘောထားဆန္ဒကိုရယူခြင်းပင် ဖြစ်ပါသည်။ ယခုသော် အစိုးရအဖွဲ့ဝန်ကြီးချုပ်ထံ ပြန်လည်တင်ပြမည်ဟုဆိုခြင်းမှာ မူလအတည်ပြုခဲ့စဉ်က အစိုးရအဖွဲ့၏အစည်းအဝေးတွင် ဝန်ကြီးချုပ်ကမပါဝင်ခဲ့၍လား။ စဉ်းစားစရာပင်ဖြစ်ပါသည်။ ထို့အပြင် “အဆိုပါဘတ်ဂျက်ကိုရေးဆွဲစဉ်က မော်တော်ကား ၁၀ စီးဝယ်ယူရန် ထည့်သွင်းခြင်းမှာ ရခိုင်တိုင်းရင်းသားရေးရာဝန်ကြီးနှင့်တိုင်ပင်ပြီး စီစဉ်ဆောင်ရွက်ခြင်းဖြစ်ကြောင်း၊ လက်ရှိအသုံးပြုနေသော ကားများ ကြံ့ခိုင်မှုမရှိခြင်း၊ ဟောင်းနွမ်းနေခြင်းကိုလည်း သိရှိလိုပါက ရခိုင်ဝန်ကြီးကို မေးမြန်းနိုင်ကြောင်း”စသည်ဖြင့် ဖြေကြားခြင်းမှာလည်း သဘာဝမကျဟု ဆိုချင်ပါသည်။

ဤသို့ဆိုလျှင် ရန်ကုန်တိုင်းဒေသကြီးအစိုးရအဖွဲ့၏ ရသုံးမှန်းခြေငွေစာရင်းကိုရေးဆွဲအတည်ပြုရာတွင် ဝန်ကြီးချုပ်ကိုယ်တိုင်မပါဝင်ဘဲ သို့မဟုတ် မသိရှိဘဲ ရေးဆွဲအတည်ပြုခဲ့သည်လား ဆိုသည်ကတော့ လွှတ်တော်သို့ ပြန်ကြားလာမည့် ဝန်ကြီးချုပ်၏အဖြေကိုသာ နားထောင်ကြဖို့ ရှိပါသည်။

ပြည်သူ့မျက်နှာကိုကြည့် ပြည်သူ့အကျိုးကိုဖော်ဆောင်

ယနေ့လက်ရှိ ပြည်ထောင်စုမြန်မာနိုင်ငံကို တာဝန်ယူအုပ်ချုပ်နေသော ပြည်ထောင်စုနှင့် တိုင်းဒေသကြီး/ ပြည်နယ်အစိုးရအသီးသီးတို့အနက် ပြည်ထောင်စုအစိုးရအဖွဲ့သည် ပြည်သူကတိုက်ရိုက် ရွေးကောက်တင်မြှောက်သော ပြည်သူ့ကိုယ်စားလှယ်များ မဟုတ်သည့်အတွက် လွှတ်တော်ကိုယ်စားလှယ်များ၏ ဆန္ဒနှင့်ထပ်တူမကျနိုင်သည်ကို နားလည်သဘောပေါက်ပါသည်။ သို့ရာတွင် ပြည်သူကတိုက်ရိုက် ရွေးကောက်တင် မြှောက်သော ပြည်သူ့ကိုယ်စားလှယ်များဖြစ်သည့် တိုင်းဒေသကြီးအစိုးရ အဖွဲ့သည် လွှတ်တော်ကော်မတီတစ်ခု၏ ကန့်ကွက်ချက်ကို လက်မခံသည်မှာ ဦးတည်ရည်ရွယ်ချက်ခြင်း မတူကွဲပြားခြင်းဖြစ်ပါသည်။

ရန်ကုန်တိုင်းဒေသကြီး အစိုးရအဖွဲ့အနေနှင့် မိမိတို့၏လုပ်ငန်းများ တာဝန်များကိုဆောင်ရွက်ရာတွင် လွယ်ကူအဆင်ပြေအောင်၊ အချိန်နှင့် တစ်ပြေးညီ တာဝန်ထမ်းဆောင်နိုင်အောင် ရည်ရွယ်ခြင်းဖြစ်သော်လည်း လွှတ်တော်၏ ဘဏ္ဍာရေး၊ စီမံကိန်းနှင့်စီးပွားရေးကော်မတီအနေနှင့်မူ ယနေ့အချိန်အခါလို နိုင်ငံ၏ဘဏ္ဍာရေး၊ စီးပွားရေး၊ ပညာရေး၊ ကျန်းမာရေး အဘက်ဘက်ကကျဆင်းနေပြီး ပြည်သူတွေဆင်းရဲနေသည့် အခြေအနေအချိန်အခါတွင် ပြည်သူ့ကိုယ်စားလှယ်များအနေနှင့် ဈေးကြီးသော ကားအကောင်းစားကြီးတွေစီးမည့်အစား ထို့ထက်ပိုမိုဈေးသက်သာသည့် ကားအမျိုးအစားကိုသာစီးစေချင်သည့် စေတနာအရင်းခံပင် ဖြစ်ပါလိမ့်မည်။

မည်သို့ပင်ဖြစ်စေ ပြည်သူကတိုက်ရိုက်ရွေးကောက်တင်မြှောက်ထားသည့် ပြည်သူ့ကိုယ်စားလှယ်များဖြင့် ဖွဲ့စည်းထားသော အစိုးရနှင့် လွှတ်တော်တို့သည် ပြည်သူကို မျက်နှာမူ၍ ပြည်သူ့အကျိုးကိုသာ ဖော်ဆောင်ကြရမည် ဖြစ်ပါသည်။ ထိုသို့ ဟုတ်မဟုတ်ကိုတော့ ဆက်လက် ကျင်းပမည့် ရန်ကုန်တိုင်းဒေသကြီးလွှတ်တော်အစည်းအဝေးကို စောင့်ကြည့်ကြရမည်ဖြစ်ပါသည်...။

သိန်းထက်အောင်

  • TAGS