News

POST TYPE

OPINION

ဆက်၍တင်ပြချင်သော ဥပဒေရေးရာများ ‘လူကုန်ကူးမှု တားဆီးကာကွယ်ရေး ဥပဒေ’
10-Sep-2016

အမျိုးသားရေး ဂုဏ်သိက္ခာနှင့် မြန်မာနိုင်ငံ၏ အနာဂတ်အရေးကို အလေးထားသူများအတွက် ၂၀၁၆ ခုနှစ် သြဂုတ်လ ၂၉၊ စက်တင်ဘာလ ၄ နေ့ထုတ် The Voice Weekly ဂျာနယ် စာမျက်နှာတွင် ဖော်ပြထားသော ခက်ဇော် (KZ) ၏ ‘အိမ်တွင်းလိင်ကျွန်’ ဆောင်းပါးကို မဖြစ်မနေ ဖတ်ရှုကြရန် တိုက်တွန်းအပ်ပါသည်။ အမျိုးအစားသစ် ဖြစ်သော ပြည်တွင်း၌ နိုင်ငံခြားသားများ၏ အငှားမယား ဖြစ်နေသော အိမ်ဖော်ဈေးကွက်ကို စာရေးသူက မီးမောင်းထိုးပြပြီး မည်သို့ ကာကွယ်ကြပါမည်နည်း၊ မည်သူ့တွင် တာဝန်ရှိပါသနည်းဟု မေးခွန်းထုတ်ထားပါသည်။

ပြည်သူ့လွှတ်တော် ကိုယ်စားလှယ်အဖြစ် တာဝန်ရှိစဉ်က ကျွန်တော်သည် တရုတ်နိုင်ငံမှ အတင်းလက်ထပ်ထိမ်းမြားရန် ဝယ်ယူမှုနှင့် ပတ်သက်၍ လူကုန်ကူးမှုကို ကာကွယ်နိုင်ရန်အတွက် ၂၀၁၄ ခုနှစ် သြဂုတ်လ ၁၉ ရက်နေ့တွင် ‘လူကုန်ကူးမှု တားဆီးကာကွယ်ရေး ဥပဒေ (နိုင်ငံတော် အေးချမ်းသာယာရေးနှင့် ဖွံ့ဖြိုးရေးကောင်စီ ဥပဒေ အမှတ် ၅/၂၀၀၅) ကို ပြင်ဆင်သည့် ဥပဒေကြမ်း’ ကို ပြည်သူ့လွှတ်တော်ရုံးသို့ ပေးပို့ခဲ့ပါသည်။ ကျိုးကြောင်းဖော်ပြသည်မှာ -

၁။ ပြည်ထောင်စုသမ္မတ မြန်မာနိုင်ငံတော် ဖွဲ့စည်းပုံအခြေခံဥပဒေ ၂၀၀၈ ခုနှစ် ပုဒ်မ ၃၅၈ တွင် ‘နိုင်ငံတော်သည် ကျေးကျွန်ပြုမှုနှင့် လူကုန်ကူးမှုများကို တားမြစ်သည်’ ဟူ၍ ပြဋ္ဌာန်းထားပါသည်။

၂။ ကမ္ဘာ့လူ့အခွင့်အရေး ကြေညာစာတမ်း အပိုဒ် ၁၆ (၂) တွင် ‘သတို့သားနှင့် သတို့သမီး နှစ်ဦးနှစ်ဖက်တို့၏ လွတ်လပ်သော သဘောဆန္ဒ အပြည့်အဝ ရှိမှသာလျှင် ထိမ်းမြားလက်ထပ်ခြင်း ပြုရမည်’ ဟူ၍ အတည်ပြုထားပါသည်။

၃။ သတင်းမီဒီယာများ၏ ဖော်ပြချက်အရ ၂၀၁၃ ခုနှစ်တွင် လူကုန်ကူးမှု ၁၀၂ မှု ဖြစ်ပွားခဲ့ရာ တရုတ်နိုင်ငံသို့ ဦးတည်လူကုန်ကူးမှု ၅၉ မှု ဖြစ်ပွားပြီး အဆိုပါ ၅၉ မှုတွင် အဓမ္မမွေးစားမှု နှစ်မှု၊ အဓမ္မအလုပ် ခိုင်းစေမှု နှစ်မှုဖြစ်ကာ ကျန် ၅၅ မှုမှာ တရုတ်ဇနီးမယား အဖြစ် ရောင်းစားသည့် အမှုများ ဖြစ်ကြောင်း သိရသည်။ ထို့အပြင် ၈-၈-၂၀၁၄ ရက်နေ့က မြန်မာနိုင်ငံ အတွင်းသို့ တရားမဝင်လမ်းကြောင်းမှ ဝင်ရောက်ပြီး မြန်မာမိန်းမ ဝယ်ယူရန် လာရောက်သူ တရုတ်နိုင်ငံသား သုံးဦးကို ရှမ်းပြည်နယ် လောက်ကိုင်မြို့၌ ဖမ်းဆီးရမိကြောင်း သိရသဖြင့် လူကုန်ကူးမှု ပြဿနာကို ထိရောက်စွာ ကိုင်တွယ်ရန် လိုအပ်လာပြီ ဖြစ်ပါသည်။

၎။ လူမှောင်ခိုကူးခြင်းသည် ဆိုးရွားသော ခေတ်သစ်ကျေးကျွန်စနစ်ကို ဖန်တီးခြင်း ဖြစ်သဖြင့် လူကုန်ကူးခံရသူကို ပြည်ပသို့ ထွက်ခွာနိုင်ရန်နှင့် ပြည်တွင်းသို့ ဝင်ရောက်နိုင်ရန် ဆောင်ရွက်ပေးသော အာဏာပိုင် အဖွဲ့အစည်းမှ လူပုဂ္ဂိုလ်များ၏ ပါဝင်ပတ်သက်မှုကို ဟန့်တားနိုင်ရန်အတွက် စာတမ်းအထောက်အထား အမှတ်အသားများကို တရားမဝင် ရယူပေးခြင်း၊ တံဆိပ်အတုပြု လုပ်ထားသူများကိုလည်း ထိရောက်စွာ အရေးယူရန် လိုအပ်ပါသည်။

၅။ နောက်ဆုံးဖြစ်ပျက်နေသော လူကုန်ကူးခံရသည့် ဖြစ်စဉ်များအရ တည်ဆဲဥပဒေ ပြဋ္ဌာန်းချက်သည် နိုင်ငံခြားသားများ အပါအဝင် လူကုန်ကူးနေသူများအတွက် လုံလောက်ခြင်း မရှိတော့ပါ။ သို့သော် (၁၁) ကြိမ်မြောက် ပြည်သူ့လွှတ်တော် ပုံမှန်အစည်းအဝေး၌ ဆွေးနွေးခွင့် မရခဲ့ပါ။

၂၀၁၅ ခုနှစ် မေလ ၁၂ ရက်နေ့ (၁၂) ကြိမ်မြောက် ပြည်သူ့လွှတ်တော် (၄၄) ရက်မြောက်နေ့ အစည်းအဝေးတွင် ဆွေးနွေးခွင့် ရပါသည်။ ကောက်နုတ်ဖော်ပြရလျှင် ‘ဒီပြင်ဆင်ချက်တင်ရတဲ့ ကိစ္စက သတင်းမီဒီယာတွေမှာ ဖော်ပြချက်အရကို ၂၀၁၃ ခုနှစ်မှာ လူကုန်ကူးမှု ၁၀၂ မှု ဖြစ်တယ်။ တရုတ်နိုင်ငံသို့ ဦးတည်လူကုန်ကူးမှုက ၅၉ ခု ဖြစ်တယ်။ အဲဒီ ၅၉ ခုမှာ အဓမ္မ မွေးစားမှုက နှစ်မှုဖြစ်ပြီးတော့ အဓမ္မ လုပ်အားခိုင်းစေမှုက နှစ်မှုဖြစ်ပါတယ်။ ကျန် ၅၅ မှုဟာ တရုတ်ဇနီးမယားအဖြစ် ရောင်းစားတဲ့အမှု ဖြစ်ကြောင်း သိရပါတယ်။ ဒီဟာနဲ့ ပတ်သက်ပြီးတော့ ရှေ့မှာ ကျွန်တော်တို့ လူဦးရေ ၅၂ သန်းပဲရှိတဲ့ ကျွန်တော်တို့နိုင်ငံရဲ့ အမျိုးသားလုံခြုံရေးအတွက် အင်မတန် အရေးကြီးတယ်လို့ ကျွန်တော် ယူဆပါတယ်။ ပြည်သူ့လွှတ်တော် သုတေသနက ၂၀၁၄ ခုနှစ် စက်တင်ဘာလ ၃၀ ရက်နေ့က ထုတ်ဝေလိုက်တဲ့ လူကုန်ကူးမှု တားဆီးကာကွယ်ရေး သုတေသနစာတမ်းမှာဆိုရင် တရုတ်နိုင်ငံ လူမှုသိပ္ပံ အကယ်ဒမီက ၂၀၂၀ ပြည့်နှစ်မှာ လက်ထပ်နိုင်တဲ့ အရွယ်ဖြစ်တဲ့ တရုတ်အမျိုးသားတွေက အသက် ၁၉ နှစ် အရွယ်ကနေ ၄၅ နှစ် အရွယ်ရှိပြီး အမျိုးသမီးဦးရေထက် ၂၄ သန်း ပိုများနေတဲ့အတွက် လူကုန်ကူးမှု ပြဿနာ ပိုမိုဆိုးရွားနိုင်ကြောင်း ခန့်မှန်းထားပါတယ်။ အခု ကျွန်တော်တို့ ရရှိတဲ့ သတင်းတွေအရပဲ တရုတ်နိုင်ငံက မြန်မာအမျိုးသမီးတွေကို အတင်းအဓမ္မ လက်ထပ်ဖို့ ရှမ်းပြည်နယ် လောက်ကိုင်မြို့နယ်မှာ လာရောက်ဝယ်တဲ့အတွက် ဖမ်းဆီးရမိတယ်ဆိုတဲ့ သတင်းလည်း မီဒီယာတွေမှာ ဖော်ပြခဲ့ပါတယ်။ အဲဒီအန္တရာယ်တွေကြောင့် ကျွန်တော်တို့ မူလပြဋ္ဌာန်းခဲ့တဲ့ လူကုန်ကူးမှု တားဆီးကာကွယ်ရေး ဥပဒေမှာ ပုဒ်မပေါင်း ၃၈ ခု ရှိပါတယ်။ အထူးသဖြင့် အခန်း ၉ ပြစ်မှုနှင့် ပြစ်ဒဏ်များမှာ ပြဋ္ဌာန်းချက်များက တော်တော်များများ ပြည့်စုံလုံလောက်ပေမယ့် ဘယ်အချက်မှာ လိုနေလဲဆိုတဲ့ အခါကျတော့ အခု တရုတ်နိုင်ငံက အတင်းလက်ထပ် ထိမ်းမြားဖို့ ဝယ်ယူတဲ့ကိစ္စနဲ့ ပတ်သက်ပြီးရင် ကျွန်တော်တို့ နိုင်ငံဘက်က ဝန်ထမ်းတွေ ကိုယ်တိုင်ကကို စာရွက်စာတမ်းတွေ အတုတွေ လုပ်ပေးတာတို့၊ တစ်ဖက်နိုင်ငံက ဝင်ရောက်နိုင်ဖို့ လိုအပ်တဲ့ စာရွက်စာတမ်း အထောက်အထားတွေ ပေးတာတို့၊ လိမ်လည်လှည့်ဖြားပြီးတော့ မွေးစားတာတို့၊ ထိမ်းမြားလက်ထပ်တာတို့ လုပ်နေတဲ့ အချက်များက သတင်းအချက်အလက်များအရ ပေါ်ပေါက်လာတဲ့အတွက် ဒီပြဋ္ဌာန်းထားတဲ့ လူကုန်ကူးမှု တားဆီးကာကွယ်ရေး ဥပဒေ ပြစ်မှုပြစ်ဒဏ်များမှာ ပုဒ်မ ၂၆ ကို အခုသတ်မှတ်ထားတဲ့ အနည်းဆုံး ထောင်ဒဏ်သုံးနှစ်မှ အများဆုံးထောင်ဒဏ် ခုနစ်နှစ်အထိ အပြင် ငွေဒဏ်လည်း ချမှတ်နိုင်တယ်ဆိုတဲ့ အချက်ကို ကျွန်တော်ရဲ့ ပြင်ဆင်ချက်က အနည်းဆုံး ထောင်ဒဏ် ငါးနှစ်မှ အများဆုံးထောင်ဒဏ် ဆယ်နှစ်အထိ ချမှတ်ရမည့်အပြင် ငွေဒဏ်လည်း ချမှတ်နိုင်တယ်လို့ ပြင်ဆင်ထားခြင်း ဖြစ်ပါတယ်။”

ပြင်ဆင်ချက် ဥပဒေကြမ်းကို ဒေါ်နန်းစေးဟွား (ဘားအံမဲဆန္ဒနယ်) က “မိမိတို့ရဲ့ စားဝတ်နေရေးအတွက် မိမိတို့ရဲ့ ဇာတိမြေမြို့ရွာကို စွန့်ခွာပြီးတော့ ကျွန်မတို့ရဲ့ နိုင်ငံအတွင်း တခြားမြို့သို့ လည်းကောင်း၊ အိမ်နီးနားခြင်း နိုင်ငံများသို့ လည်းကောင်း နည်းမျိုးစုံနဲ့ လူကုန်ကူးခြင်း ခံရတာကို ခံရမှန်း မသိဘဲနဲ့ စားဝတ်နေရေး ပြေလည်ပါစေတော့ဆိုတဲ့ အကြောင်းအရာ တစ်ခုလေးနဲ့ကို ထွက်သွားရခြင်း ဖြစ်ပါတယ်။ ဒါပေမဲ့ တကယ့်တကယ် ရောက်သွားတဲ့အခါမှာ မိမိတို့ရဲ့ ရည်ရွယ်ချက်အတိုင်း ဖြစ်မလာဘဲနဲ့ များစွာဒုက္ခမျိုးစုံ ခံစားရတာတွေ၊ မလိုလားအပ်တဲ့ ရောဂါကူးစက်ခံရတာတွေလည်း ရှိလာခဲ့ပါတယ်။ နောက်ဆုံး အသက်အန္တရာယ် ဖြစ်လာရတဲ့အထိ ခံစားခဲ့ကြရပါတယ်” ဟု တင်ပြရင်း ထောက်ခံခဲ့ပါသည်။

သို့ကလို တင်ပြချက်များအပေါ် ဗိုလ်မှူးချုပ် ကျော်ကျော်ထွန်း (ဒုတိယဝန်ကြီး၊ ပြည်ထဲရေး ဝန်ကြီးဌာန) က “ကမ္ဘာ့ကုလသမဂ္ဂအဖွဲ့နှင့် နိုင်ငံတကာ အဖွဲ့အစည်းများ ပါဝင်သော Human Trafficking Working Group အနေနဲ့လည်း ဥပဒေ ပြင်ဆင်နိုင်ရေးအတွက် ဖြည့်စွက်သင့်တဲ့ အချက်အလက်များကို စုဆောင်းလျက်ရှိကြောင်း” တင်ခဲ့ပါသည်။

သို့ဖြစ်ရာ ကျွန်တော်မှ “၅၁ သန်းရှိတဲ့ နိုင်ငံရဲ့ ဝန်းကျင်မှာ ဒီနိုင်ငံရဲ့ အမျိုးသမီးတွေကို အတင်းအဓမ္မ ထိမ်းမြားဖို့၊ လက်ထပ်ဖို့ ဒီရင်းမြစ်နိုင်ငံမှာ လူပျိုလူအို နောက်ဆုံးရတဲ့ စာရင်းတွေအရဆိုရင် လူပျိုသိုးကြီး သန်း ၈၀ လောက် ရှိတယ်လို့ သိရပါတယ်။ ဒါကြောင့် တစ်နေ့မှာ ကျွန်တော်တို့ နိုင်ငံရဲ့ အမျိုးသားဘဝကြီး အားလုံးဟာ တစ်ဖက်နိုင်ငံရဲ့ အပျော်မယား ဘုံမယားဘဝ ရောက်သွားမှာကို စိုးရိမ်တဲ့အန္တရာယ်နဲ့ လွှတ်တော်မှာ တင်ပြသင့် တင်ပြလိုက်တာကို ကျွန်တော် တင်ပြချင်ပါတယ်။ နောင် ပြင်မယ်ဆိုတဲ့ အတွက်လည်း ကြိုဆိုပါတယ်” လို့ ဆွေးနွေးခဲ့ပါသည်။

ယခု ခက်ဇော် (KZ) ၏ အိမ်တွင်းလိင်ကျွန် ဆောင်းပါးအရ ဆင်းရဲနွမ်းပါးမှု၏ အကျိုးဆက်အပြင် နိုင်ငံခြားသားများ၏ လိင်ကျွန်ဘဝ ရောက်ရသော မြန်မာတိုင်းရင်းသူ အမျိုးသမီးများအတွက် ပုဒ်မ (၃) (က) လူကုန်ကူးမှု ရှင်းလင်းချက် (၁) ‘ခေါင်းပုံဖြတ်ခြင်း ဆိုရာတွင် ပုဂ္ဂိုလ်တစ်ဦးသည် အခြားသူတစ်ဦး တစ်ယောက်အား ပြည့်တန်ဆာပြုခြင်း၊ အခြားတစ်နည်းနည်းဖြင့် ကာမဆိုင်ရာ ကိစ္စပြုလုပ်ခြင်း၊ အဓမ္မ အလုပ်ခိုင်းစေခြင်း၊ ကာမဝန်ဆောင်မှု ပေးစေခြင်း၊ ကျွန်ပြုခြင်း၊ ကျေးကျွန်ကဲ့သို့ ခိုင်းစေခြင်း၊ ကြွေးမြီဖြင့် နှောင်ဖွဲ့ခိုင်းစေခြင်း၊ သူတစ်ပါး ခန္ဓာကိုယ်၏ အင်္ဂါအစိတ်အပိုင်းအား ထုတ်ယူဖယ်ရှားခြင်း၊ ရောင်းချခြင်းကို ဖြစ်စေပြုရာမှ ငွေကြေးကိုသော် လည်းကောင်း၊ အကျိုးအမြတ် တစ်စုံတစ်ရာကိုသော် လည်းကောင်း၊ လက်ခံရယူခြင်း သို့မဟုတ် လက်ခံရယူရန် သဘောတူခြင်း ပါဝင်သည်’၊ ယင်းပြဋ္ဌာန်းချက်နှင့်အညီ နိုင်ငံခြားသားများနှင့် ဆက်သွယ်ပေးသော လူပွဲစားများနှင့် လိင်ကျွန်ပြုနေသော နိုင်ငံခြားသားများအား အရေးယူနိုင်ရန် တည်ဆဲဥပဒေ ပုဒ်မ ၂၉ တွင် ပြဋ္ဌာန်းထားသော ‘ကြီးလေးသော’ ပယ်ဖျက်ပြီး ပုဒ်မ ၃ (က) ရှင်းလင်းချက် (၁) နှင့်  ရှင်းလင်းချက် (၂) ‘ပြည့်တန်ဆာပြုခြင်း’ တွင် အကျုံးဝင်ပါက ‘ထိုသူကို’ အနည်းဆုံး ထောင်ဒဏ် ၁၀ နှစ်မှ အများဆုံး ထောင်ဒဏ်တစ်သက်အထိ ဖြစ်စေ၊ သေဒဏ်ဖြစ်စေ ချမှတ်ရမည်ဟု ပြင်ဆင်ပေးရမည့် အချိန်ရောက်နေပြီ ဖြစ်ပါသည်။

နိုင်ငံခြားသားများ ဝင်ရောက်လာမှုများနှင့်အတူ နိုင်ငံခြားသားတချို့၏ ငယ်ရွယ်သူ မိန်းကလေးများနှင့် ကာမဆိုင်ရာ ကိစ္စများ ပြုလုပ်ခြင်း သတင်းများသည် ယခင်က မိမိတို့ အိမ်နီးချင်းနိုင်ငံ တချို့တွင် ဖြစ်ပျက်ခဲ့ပါသည်။ ယနေ့တွင် မိမိတို့ နိုင်ငံသို့ ပုံစံအမျိုးမျိုးဖြင့် နိုင်ငံခြားသားများ၏ လိင်ကျွန်ပြုမှု သတင်းများကို ဖတ်ရှုနေရပြီ ဖြစ်ပါသည်။ ဤပြဿနာသည် အမျိုးသားဂုဏ်သိက္ခာနှင့် ပတ်သက်နေပါသည်။ ဆင်းရဲချမ်းသာ ကွာဟမှု အလုပ်အကိုင် အခွင့်အလမ်းရှားပါးမှု ရှိနေသရွေ့ မြန်မာတိုင်းရင်းသူ အမျိုးသမီးများ၏ လိင်ကျွန်အငှားမယားဈေးကွက် ဆက်လက်ကြီးထွားနိုင်သည် ဟူသော ဆောင်းပါးရှင် ခက်ဇော် (KZ) ၏ သုံးသပ်ချက်ကို အလေးထားသင့်ပါသည်။

သို့ဖြစ်ရာ တာဝန်ရှိသူများ ဘာလုပ်ကြမည်နည်း။ တရားစီရင်ရေး နယ်ပယ်အနေနှင့်လည်း လူကုန်ကူးသည့် မှုခင်းများနှင့် ပတ်သက်၍ လူပွဲစားများ အပါအဝင် ပြစ်မှုကျူးလွန်သူ မည်သူ့ကိုမဆို ထိရောက်ဟန့်တားသော ကြီးလေးသည့် ပြစ်ဒဏ်များ ချရန်လိုအပ်ပါသည်။ ထို့အတူ အုပ်ချုပ်ရေးအာဏာ ရယူထားသည့် လူများအနေနှင့်လည်း အခြေအနေသစ်နှင့်အညီ လူကုန်ကူးမှု တားဆီးကာကွယ်ရေး ဥပဒေများကို အမြန်ဆုံး ပြင်ဆင်သင့်ပါသည်။

ချုပ်၍တင်ပြရလျှင် အုပ်ချုပ်ရေးပိုင်းမှ နှေးကွေးနေလျှင် မိမိတို့အား အပ်နှင်းထားသော ဥပဒေပြုရေး အာဏာကို သုံးစွဲရန် ပြည်ထောင်စုအဆင့် လွှတ်တော်ကိုယ်စားလှယ်များက လူကုန်ကူးမှု တားဆီးကာကွယ်ရေး ဥပဒေအား ဥပဒေကြမ်း တင်သွင်းပြီး ပြင်ဆင်ဖို့ လိုအပ်ပါသည်။ ကျွန်တော့် လေ့လာချက်အရ ဤဥပဒေကို ပြင်ဆင်သည့် ဥပဒေ မရှိသေးပါ။ မည်သို့ပင်ဖြစ်စေ မြန်မာနိုင်ငံတွင် ယာယီနေထိုင်သော နိုင်ငံခြားသားများနှင့် အမြဲတမ်းနေထိုင်သော နိုင်ငံခြားသားများက တစ်ဦးတစ်ယောက်အပေါ် ချုပ်ကိုင်နိုင်သောသူ၏ သဘောတူညီချက်ရရှိရန် ငွေကြေး သို့မဟုတ် အကျိုးအမြတ်ပေးခြင်းဖြင့် လိင်ကျွန်ပြုခြင်းကို ဟန့်တားနိုင်ရန်အတွက် ဥပဒေပုဒ်မ အသစ်များ လိုအပ်နေပြီ ဖြစ်ကြောင်း တင်ပြအပ်ပါသည်။ 

မောင်သိန်းညွန့် (ကော့ကရိတ်)