News

POST TYPE

OPINION

ရုရှားကာကွယ်ရေးဝန်ကြီး၏ မြန်မာခရီးစဉ်မှာ ဘာတွေအကောင်အထည်ပေါ်ခဲ့သလဲ
25-Jan-2018

The Diplomat အွန်လိုင်းမဂ္ဂဇင်း၏ သတင်းဆောင်းပါးကို ဘာသာပြန်ဆိုခြင်းဖြစ်ပါသည်။ 

ပြီးခဲ့သည့် ရက်သတ္တပတ်အကုန်တွင် ရုရှားကာကွယ်ရေးဝန်ကြီး၏ အရှေ့တောင်အာရှခရီးစဉ် တစ်စိတ်တစ်ဒေသအဖြစ် မြန်မာနိုင်ငံသို့ လာရောက်လည်ပတ်ခဲ့သည်။ ခရီးစဉ်နှင့် ထွက်ပေါ်လာသော သဘောတူစာချုပ်များသည် မကြာသေးမီနှစ်များအတွင်း အရှိန်အဟုန်ကောင်းလာသော ရုရှား-မြန်မာစစ်ရေး ပူးပေါင်းဆောင်ရွက်မှုအပေါ် အာရုံစိုက်စရာဖြစ်လာစေခဲ့သည်။

ရုရှား-မြန်မာ ကာကွယ်ရေးနယ်ပယ် ဆက်ဆံရေးရှိခဲ့သည်မှာ ကာလကြာရှည်ခဲ့ပြီဖြစ်သလို မြန်မာ့တပ်မတော်က ရုရှားစစ်လက်နက်ပစ္စည်းများ ဝယ်ယူခြင်း၊ ရုရှားကျောင်းများတွင် မြန်မာစစ်သည်တော်များ သွားရောက်သင်ကြားခြင်းတို့က ဆက်ဆံရေးကို ပိုမိုထင်သာမြင်သာ ရှိလာစေခဲ့သည်။ ဆယ်စုနှစ်များစွာ အနောက်နိုင်ငံများ၏ အရေးယူပိတ်ဆို့မှုများက ဖန်တီးလိုက်သော ကန့်သတ်ချက်များကြောင့်သာမက တရုတ်အပေါ် မှီခိုလွန်းမှု၏ အကန့်အသတ်များကြောင့် မြန်မာနိုင်ငံသည် ကာကွယ်ရေးအတွက် အခြားနည်းရွေးချယ်စရာအဖြစ် ရုရှားအပေါ် ရှုမြင်လာခဲ့ခြင်းဖြစ်သည်။

ပြည်ပအရေး ရည်မှန်းချက်ကြီးသလို အနောက်ကမ္ဘာ၏ ဝိုင်းကြဉ်ခံရမှုနှင့် ရင်ဆိုင်လာရသော ဗလာဒီမာပူတင်၏ ရုရှားကိုယ်တိုင်က အရှေ့တောင်အာရှနိုင်ငံများနှင့် ဆက်ဆံရေး နက်ရှိုင်းစေရန် အားထုတ်လာခြင်းကလည်း ယခုနှစ်ပိုင်းအတွင်း ဆက်ဆံရေးအရှိန် မြင့်လာခြင်း၏ အဓိကကျသည့် အချက်တစ်ချက်ဖြစ်သည်။ ပညာတော်သင်စေလွှတ်မှုများ၊ သွားရောက် လည်ပတ်မှုများနှင့် စစ်လက်နက်ပစ္စည်း အရောင်းအဝယ် ကြေညာချက်များအပြင်၂၀၁၆ ခုနှစ်အတွင်း ထင်ရှားသော တိုးတက်မှုတစ်ခုမှာ စစ်ဘက်ဆေးပညာ၊ ငြိမ်းချမ်းရေးထိန်းသိမ်း၊ ရှာဖွေကယ်ဆယ်မှု၊ ရေတပ် ပူးပေါင်းဆောင်ရွက်မှုကဲ့သို့သော နယ်ပယ်စုံတွင် ပူးပေါင်းဆောင်ရွက်ရေးအတွက် ဥပဒေမူဘောင်တစ်ရပ် ထူထောင်ပေးသော စစ်ရေးပူးပေါင်းဆောင်ရွက်မှု သဘောတူစာချုပ်သစ်တစ်ရပ်ကို နှစ်ဖက်ကာကွယ်ရေး အဖွဲ့အစည်းများအကြား လက်မှတ်ရေးထိုးနိုင်ခဲ့ခြင်းဖြစ်သည်။

ဇန်နဝါရီလ ၂၀ ရက်နေ့မှ ၂၂ ရက်နေ့အထိ ရုရှားကာကွယ်ရေးဝန်ကြီး ဆာဂေးရှိုအီဂူသည် မြန်မာနိုင်ငံသို့ လာရောက်လည်ပတ်ခဲ့သည်။ ရှိုအီဂူနှင့် ကိုယ်စားလှယ်အဖွဲ့သည် မြန်မာ့တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီးမင်းအောင်လှိုင် အပါအဝင် ထိပ်တန်းတာဝန်ရှိသူများနှင့် တွေ့ဆုံခဲ့သလို စစ်သည်တော်ဗိမာန်တွင် လွမ်းသူ့ပန်းခွေချခြင်းကဲ့သို့သော အခြားအခမ်းအနားများလည်း တက်ရောက်ခဲ့သည်။

မီဒီယာအများစုက မော်စကိုနှင့် နေပြည်တော်အကြား တိုက်လေယာဉ်အရောင်းအဝယ် သဘောတူညီချက်ကို မီးမောင်းထိုး ဖော်ပြနေကြသော်လည်း ယင်းမှာ တိုးတက်မှုအသစ်တစ်ရပ် ဆိုခြင်းထက် မြန်မာဘက်က ရုရှား စစ်လက်နက်ဝယ်ယူရေး အားထုတ်မှု၏ တစ်စိတ်တစ်ဒေသသာဖြစ်သည်။ ခရီးစဉ်အတွင်း ရုရှားဒုတိယကာကွယ်ရေးဝန်ကြီး အလက်ဇန္ဒားဖိုမင်၏ ပြောကြားချက်အရဆိုလျှင် မြန်မာနိုင်ငံသည် ဆူခွိုင်း-၃၀ (Su-30) တိုက်လေယာဉ်ခြောက်စီး ဝယ်ယူလိုက်ခြင်းဖြင့် ဆူခွိုင်းတိုက်လေယာဉ်များကို မြန်မာ့လေတပ်မတော်၏ အဓိကအစိတ်အပိုင်း ဖြစ်လာစေမည်ဖြစ်သလို နှစ်နိုင်ငံအကြား စစ်ရေးနှင့်နည်းပညာ ပူးပေါင်းဆောင်ရွက်မှုအတွက် ထပ်တိုးတွန်းအားတစ်ရပ်လည်းဖြစ်သည်ဟု ဆိုသည်။

သို့သော်လည်း ဆူခွိုင်းအပြင် နှစ်ဖက်စလုံးက ၂၀၁၆ ခုနှစ်တွင်ရရှိခဲ့သော သဘောတူစာချုပ်တွင် ပါဝင်သော အခြေခံကိစ္စအချို့ကို ဆက်လက် အကောင်အထည်ဖော်ရန် အားထုတ်ခဲ့ခြင်းကြောင့် ခရီးစဉ်အတွင်း အခြားသောထင်ရှားသည့် တိုးတက်မှုများပါ ဖြစ်ပေါ်ခဲ့သည်။ ဥပမာအားဖြင့် ရုရှားစစ်သင်္ဘောများ မြန်မာဆိပ်ကမ်းများသို့ ဝင်ရောက်မှုဆိုင်ရာ သဘောတူညီချက်တစ်ခု ရရှိခဲ့သည်။ ကာကွယ်ရေးဝန်ကြီး ရှိုအီဂူးက မြန်မာနိုင်ငံသို့ ရုရှားရေတပ် အလည်အပတ် ခရီးစဉ်များအပေါ် အထူးအာရုံစိုက်သွားမည်ဟု ပြောကြားခဲ့သလို မြန်မာနိုင်ငံမှ စစ်သင်္ဘောများလည်း ရုရှားသို့ လာရောက်လည်ပတ်မည်ဟု မျှော်လင့်ကြောင်း ပြောကြားခဲ့သည်။ သဘောတူညီချက်၏ အသေးစိတ် အချက်အလက်များကိုမူ ထုတ်ပြန်ခဲ့ခြင်းမရှိပေ။

Ref:The Diplomat