တောင်ကိုရီးယားနိုင်ငံကို လက်တုံ့ပြန်ပြစ်ဒဏ်ပေးနိုင်ရေးအတွက် ထောင်ပေါင်းများစွာသော ဝါဒဖြန့်လက်ကမ်းစာစောင်များနှင့် ပူဖောင်းများ အသင့်ရရှိထားပြီဖြစ်သည်ဟု မြောက်ကိုရီးယားကွန်မြူနစ်အစိုးရက ထုတ်ဖော်ပြောကြား လိုက်ကြောင်း AP သတင်းဌာနက ရေးသားဖော်ပြသည်။

တောင်ကိုရီးယားတွင် ကူးစက်မှုနှုန်း နည်းသွားပြီဖြစ်သော်လည်း ကိုရိုနာဗိုင်းရပ်စ်ဒုတိယလှိုင်းအတွင်းသို့ ဝင်ရောက်လာပြီဖြစ်ကြောင်း တောင်ကိုရီးယား ကျန်းမာရေးအရာရှိများက ပြောကြားသတိပေးလိုက်သည်။

ဧရာဝတီတိုင်းအတွင်း ဖြတ်သန်းသွားလာနေသည့် မော်တော်ယာဉ်များအနေနှင့် ဇွန်လ ၂၀ ရက်နေ့ကစ၍ လမ်းပေါင်း ၈၀ ကျော်တွင် တန်ပိုတင်ဆောင်ခွင့်မပြုတော့ကြောင်း တိုင်းအစိုးရအဖွဲ့ရုံးထံမှ သိရသည်။

ချင်းပြည်နယ်၊ မတူပီမြို့ခံများ လျှပ်စစ်မီးသုံးစွဲနိုင်ရေးအတွက် ယခင်ကရေအားလျှပ်စစ်ကိုသာ အဓိကအသုံးပြုခဲ့ရပြီး ယခုမူ မဟာဓာတ်အားလိုင်းမှ တစ်ဆင့်လျှပ်စစ်မီးစတင်ဖြန့်နေပြီဖြစ်ကြောင်း မတူပီမြို့ဒေသခံဦးဆလောင်းက ပြောကြားသည်။

ချင်းပြည်နယ် ရိခေါ်ဒါရ်မြို့အနီးတွင် ဇွန်လ ၂၂ ရက်နေ့ နံနက်အစောပိုင်းက လှုပ်ခတ်ခဲ့သည့်ငလျင်ကြောင့် လူနေအိမ်နှင့် အဆောက်အအုံအချို့ ထိခိုက်ပျက်စီးခဲ့သည်ဟု ရိခေါ်ဒါရ်မြို့အုပ်ချုပ်ရေးမှူး ဦးကျင်လမ်းခိုင်က ပြောကြားသည်။

အခြေခံပညာစာသင် ကျောင်းများ ၏ ကိုဗစ်-၁၉ ရောဂါကာကွယ်ပြင်ဆင်ရေး ပြိုင်ပွဲအတွက် ပညာရေးဝန်ကြီးဌာနက ကျပ်သိန်း၂၅၀ ခန့် အသုံးပြုမည်ဖြစ်ကြောင်း အခြေခံပညာဦးစီးဌာနမှ ဒုတိယညွှန်ကြားရေးမှူးချုပ် ဒေါက်တာတင်မောင်ဝင်းက ပြောကြားသည်။

နေပြည်တော်တွင်တည်ရှိသော ဒေါ်ခင်ကြည်ဖောင်ဒေးရှင်း၏ လရောင်တောစိုက်ပျိုးသက်မွေးပညာသင်တန်းကျောင်း (LYT-HTA) မှ စိုက်ပျိုးရေးပညာဝါသနာပါသည့် လူငယ်များအတွက် သင်တန်းလျှောက်လွှာများ ခေါ်ယူနေကြောင်း ယင်းဖောင်ဒေးရှင်းထံမှ သိရ သည်။

ရန်ကုန်တိုင်းဒေသကြီးရှိ လုပ်ငန်းသုံးနှင့် လူနေထိုင်ရန်မြေကွက်များကို ဇွန်လကုန်နောက်ဆုံးထား လျှောက်ထားရမည်ဖြစ်ကြောင်း ရန်ကုန်တိုင်းဒေသကြီးအစိုးရအဖွဲ့ထံမှ သိရသည်။

ပုဂံဘုရားများတွင် CCTV ကင်မရာ တပ်ဆင်နိုင်ရန် ညှိနှိုင်းဆွေးနွေးမှုများပြုလုပ်နေကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန ပုဂံဌာနခွဲထံမှ သိရသည်။

Covid-19 ကပ်ရောဂါဖြစ်ပွားသည့် ကာလအတွင်း အလုပ်လက်မဲ့ဖြစ်သွားသော အလုပ်သမားများ အလုပ်အကိုင်ပြန်လည်ရရှိရေးအတွက် အစိုးရသို့တင်ပြသွားမည်ဟု မြန်မာနိုင်ငံစက်မှုလက်မှုနှင့် ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ(MICS- TUsF) ထံမှ သိရသည်။

ဧရာဝတီတိုင်းအတွင်းရှိ မြို့နယ်အသီးသီးတွင် ညမထွက်အမိန့် နှစ်လတိုးမြှင့်လိုက်ကြောင်း ဧရာဝတီတိုင်း အစိုးရအဖွဲ့ထံမှ သိရသည်။

ချင်းပြည်နယ်၊ ပလက်ဝမြို့ ဒေသခံပြည်သူများ၊ ဌာနဆိုင်ရာဝန်ထမ်းများနှင့် တိုက်ပွဲရှောင်ပြည်သူများအတွက် ချင်းပြည်နယ်အစိုးရအဖွဲ့နှင့် အလှူရှင်များက လှူဒါန်းသည့် စားသောက်ဖွယ်ရာများကို တပ်မတော်က ထပ်မံပို့ဆောင်ခဲ့ကြောင်း တပ်မတော်ကာကွယ်ရေးဦးစီးချုပ်ရုံး သတင်းထုတ်ပြန်ချက်အရ သိရသည်။

World Vision မြန်မာက ချောက်မြို့နယ်အတွင်းရှိ စီမံချက်ရှိသော ကျေးရွာ ၃၀ မှ အခြေခံပညာကျောင်း ၃၀ နှင့် ကိုယ့် အားကိုယ်ကိုးမူကြိုကျောင်း ၁၅ ကျောင်းအတွက် ရေပုံးအပါအဝင် လက်ဆေးဘေစင် ၁၆၀ ခု ပေးအပ်လှူဒါန်းခဲ့သည်။

ပုပ္ပားတောင်ကလပ်ပေါ်ရှိ ပတ္တမြားစောင်းတန်းနှင့် ကျေးရွာမူလတန်းလွန် ကျောင်း‌နေရာတို့တွင် မြေများပြိုကျနေသဖြင့် ပုပ္ပားတောင်ဂေါပအဖွဲ့က ဘုရားအလှူတော်ငွေမှ ကျပ်သိန်း ၃၅၀ ခန့်သုံးစွဲကာ မြေထိန်းနံရံ တည်ဆောက်နေသည်ဟု ယင်းဂေါပက အဖွဲ့အတွင်းရေးမှူး ဦး‌ဋ္ဌေးမြင့်က ပြောဆိုသည်။

ကိုဗစ်ကာလအတွင်း အစားအသောက်နှင့်အဖျော်ယမကာကဏ္ဍမှ ဝင်ငွေရရှိမှုသည် ယခင်နှစ်က ထက်အမေရိကန်ဒေါ်လာ သန်း ၆၀ ကျော် လျော့ကျခဲ့သည်ဟု ဟိုတယ်နှင့်ခရီးသွားလာရေးဝန်ကြီးဌာန၏ COVID-19 ကြောင့် မြန်မာ့ခရီးသွားလုပ်ငန်းအပေါ် စီးပွားရေးသက်ရောက်မှုစစ်တမ်းအရ သိရသည်။