POST TYPE

NEWS

စောင့်ကြည့်ခံနေရသော လူ့အဖွဲ့အစည်း
၂၀၁၀ ခုနှစ် မြန်မာနိုင်ငံတွင် စစ်အုပ်ချုပ်ရေး တရားဝင် အဆုံးသတ်သွားသည့် အချိန်မှစ၍ နိုင်ငံတကာ အသိုင်းအဝိုင်းက မြန်မာနိုင်ငံကို ပိုမိုလေ့လာ စောင့်ကြည့်လာခဲ့ကြသည်။ ၁၉၆၂ ခုနှစ်မှစတင်ကာ စစ်အုပ်ချုပ်ရေးအောက်နေခဲ့ရသော မြန်မာနိုင်ငံသားတို့အား ကမ္ဘာက အကြီးအကျယ် ကရုဏာ သက်ခဲ့ကြသည်။ အဖိနှိပ်ခံများ၊ ဒီမိုကရေစီ ငတ်မွတ်နေသူများအဖြစ် ရှုမြင်ခဲ့ကြသည်။ စစ်အုပ်ချုပ်ရေးကာလ မြန်မာနိုင်ငံအတွင်းမှ နိုင်ငံတကာသို့ တစ်နည်းအတွင်းမှ အပြင်သို့ ရောက်ရှိပျံ့နှံ့ခဲ့သော သတင်းများမှာ အဆိုးများချည်းသာ ဖြစ်နေတတ်သည်။ စစ်အစိုးရမှ ဦးသိန်းစိန် အစိုးရသို့ မပြောင်းလဲမီ ထိုစဉ်ကာလ စစ်အစိုးရမှ တည်ဆောက်ပြုပြင် မြန်ပြည်တစ်ခွင် အစီအစဉ်များဖြင့် ၎င်းတို့ မည်မျှ တိုင်းပြည်အတွက် လုပ်ဆောင်ခဲ့ပါကြောင်း တံတားကြီးများ၊ တက္ကသိုလ်ကြီးများ နေရာအနှံ့ တခမ်းတနား ဆောက်လုပ်လျက် နိုင်ငံတကာတွင် မျက်နှာပန်းလှရန်၊ ပြည်တွင်းတွင် ထောက်ခံစာနာမှု ရရှိရန်ကြိုးပမ်းခဲ့သော်လည်း မအောင်မြင်ခဲ့ပေ။ 

အာဏာရှင် အစိုးရဆိုပါက မည်မျှပင် ကောင်းမွန်အောင် ကြိုးစားပါစေ၊ လက်ခံအသိအမှတ်ပြုလေ့မရှိသော နိုင်ငံတကာ အသိုင်းအဝိုင်းနှင့် စိတ်ထဲတွင် အမှတ်အသား ဖြစ်သွားပါက အခဲမကျေ မကျေမနပ် စွဲမြဲထားတတ်သော မြန်မာ့လူ့အဖွဲ့အစည်းတို့၏ စာနာကရုဏာသက်မှုကို မရရှိဘဲ စစ်အစိုးရသည် တပ်ခေါက် နောက်ဆုတ်ခဲ့ရသည်။ ၂၀ဝ၆ တွင် အစိုးရအဖွဲ့အား နေပြည်တော်သို့ ရွှေ့ပြောင်း၊၂၀ဝ၈ ဖွဲ့စည်းပုံ အခြေခံဥပဒေကို စိတ်ကြိုက်ရေးဆွဲ၊ ၂၀၁၀ အထွေထွေ ရွေးကောက်ပွဲဖြင့် သွေးထွက်သံယိုမှု မရှိ အရပ်သားအစိုးရသို့ အာဏာ လွှဲပြောင်းပေးခဲ့သော စစ်အစိုးရကို နိုင်ငံတကာ လေ့လာသူအချို့က လှပသော အောင်မြင်စွာ ဆုတ်ခွာခြင်းဟု သုံးသပ်ဖော်ပြခဲ့ကြသည်။ မည်သို့ဆိုစေ နိုင်ငံတကာမှ မြန်မာနိုင်ငံအား အနုတ်သဘော လေ့လာစောင့်ကြည့်မှုမှာ ၂၀၁၁ တွင် အစိုးရ အပြောင်းအလဲနှင့်အတူ အပြုသဘော လေ့လာစောင့်ကြည့်မှုသို့ ပြောင်းလဲသွားခဲ့သည်။ 

၂၀၁၁ ခုနှစ်တွင် ဦးသိန်းစိန်အစိုးရ အာဏာ ရလာခဲ့သည်။ နိုင်ငံတကာနှင့် ပြန်လည် သင့်မြတ်စေရန် လုပ်ဆောင်မှုမှာ ဦးသိန်းစိန်အစိုးရ၏  အဓိက ဦးစားပေး လုပ်ငန်းစဉ်များထဲမှ တစ်ခုဖြစ်ခဲ့သည်။ မြစ်ဆုံစီမံကိန်းကို ရပ်တန့်လိုက်ခြင်းအားဖြင့် အစဉ်အလာ မဟာမိတ် တရုတ်နိုင်ငံ လွှမ်းမိုးမှုမှ ကျောခိုင်းထွက်ခွာရန် ခိုင်မာသော အချက်ပြမှုတစ်ခုကိုလည်း ပြုခဲ့သည်။ နိုင်ငံအတွင်းတွင် ထိုစဉ်ကာလ အတိုက်အခံ ခေါင်းဆောင် ဒေါ်အောင်ဆန်းစုကြည်နှင့်လည်း ကောင်းမွန်သော ဆက်ဆံရေးကို တည်ဆောက်နိုင်ခဲ့ပြီး အပြင်တွင်လည်း နိုင်ငံတကာ အထူးသဖြင့် အမေရိကန်၊ ဥရောပ သမဂ္ဂတို့ဖြင့် ဆက်ဆံရေး ပြန်လည် နွေးထွေးလာခဲ့သည်။ နိုင်ငံတကာ မီဒီယာများတွင် မြန်မာတို့ ခေတ်လော၊ အာရှ၏ ကျားလောစသဖြင့် သာသာထိုးထိုး အပြုသဘော အမြင်များ စတင်တွေ့ရှိလာရသည်။ သို့သော် အဆိုပါ အကောင်းမြင် မှန်းဆချက်တို့မှာ ကြာကြာမခံပါချေ။ 

မြန်မာတို့ ကံမကောင်းလှပါ။ ၂၀၁၂ တွင် ရခိုင်ပြည်နယ်အတွင်း လူ့အဖွဲ့အစည်းနှစ်ခု၏ ပဋိပက္ခမှသည် မြန်မာနိုင်ငံသည် နိုင်ငံတကာ အမြင်တွင် အောက်သို့ တစ်ဖန် စိုက်ဆင်းခဲ့ရပြန်လေသည်။ နိုင်ငံတကာ အမြင်ဆိုသည်နှင့် ပတ်သက်၍ လင်းရပေမည်။ နိုင်ငံတကာဆိုသည်မှာ အနောက်နိုင်ငံများမှ မီဒီယာများ၊ နိုင်ငံတကာ အဖွဲ့အစည်းများ၊ ကမ္ဘာ့ ကုလသမဂ္ဂတို့ကို ဆိုလိုပေသည်။ အဆိုပါ ကွန်ရက်သုံးခုမှာ ချိတ်ဆက်နေပြီး သက်ဆိုင်ရာ နိုင်ငံတကာ အစိုးရများထံသို့လည်း လွှမ်းမိုးမှု ရှိသည်ဖြစ်ရာ ရခိုင်ကိစ္စနှင့် ပတ်သက်လျှင် နိုင်ငံတကာနှင့် ရင်ဆိုင်ရာတွင် မြန်မာတို့ လှုပ်လေ၊ မြုပ်လေသာ ရှိပေတော့သည်။ နိုင်ငံတကာသည် မြန်မာနိုင်ငံအား စစ်အစိုးရလက်ထက်တွင် စစ်အစိုးရ၏ အတိုက်အခံ လှုပ်ရှားမှုအပေါ် အာရုံစိုက် လေ့လာစောင့်ကြည့်ခဲ့ကြရာမှ ဦးသိန်းစိန် အစိုးရလက်ထက်တွင်မူ နိုင်ငံတကာ၏ အာရုံစိုက်မှုမှာ ရခိုင်ပြည်နယ်သို့ ကူးပြောင်းသွားခဲ့သည်။ ဒီ့နောက် ဦးဝီရသူ ပေါ်ပေါက်လာသည်။ ၉၆၉ ဖြစ်တည်လာသည်။ မဘသအဖွဲ့ကြီး ဖြစ်ထွန်းလာသည်။ အမုန်းစကား မှတ်ချက်များဆိုသည်မှာ ဆိုရှယ်မီဒီယာများတွင် မမြင်တွေ့ချင်မှအဆုံး ဖြစ်လာရသည်။ 

အဆိုပါဖြစ်ထွန်းမှု အားလုံးသည် ရခိုင်ပြည်နယ်အတွင်းမှ ပဋိပက္ခများနှင့် တစ်နည်းတစ်ဖုံ ပတ်သက်ယှက်နွယ်နေလေရာ နိုင်ငံတကာ၏ မြန်မာ့ပြုပြင်ပြောင်းလဲရေးအပေါ် အပြုသဘောအမြင်မှာ ရုတ်ခြည်း ပြောင်းလဲသွားလေသည်။ ဆိုးသည်မှာ ရခိုင်ပြည်နယ် အရေးနှင့်ပတ်သက်၍ နိုင်ငံတကာ၏အမြင်တွင် မြန်မာ့လူ့အဖွဲ့အစည်းသည် အဖိနှိပ်ခံ အခြေအနေမှ ဖိနှိပ်သူ အခြေအနေသို့ ပြောင်းလဲသွားခြင်း ဖြစ်သည်။ စစ်အစိုးရလက်ထက်တွင် မြန်မာတို့သည် စစ်အစိုးရ၏ အဖိနှိပ်ခံအခြေအနေမှ အပြောင်းအလဲ ကာလတွင် မြန်မာတို့သည် ရခိုင်ပြည်နယ်ရှိ နိုင်ငံသား အထောက်အထားမဲ့နေသူ မွတ်ဆလင်များအား ဖိနှိပ်သူများအဖြစ် ပုံအဖော်ခံရတော့သည်။ မြန်မာနိုင်ငံသားများသည် အဖိနှိပ်ခံဘဝဖြင့် ကာလကြာရှည် နေထိုင်ခဲ့ရသဖြင့် ဒီမိုကရေစီ အစိုးရလက်ထက်တွင် ရခိုင်ပြည်နယ်ရှိ အဖိနှိပ်ခံ နိုင်ငံသား အထောက်အထားမဲ့နေသူများအပေါ် ကိုယ်ချင်းစာနာမှုဖြင့် ပြဿနာများအား ယခင်ကထက် လျင်မြန် ထိရောက်စွာ ဖြေရှင်းဆောင်ရွက်နိုင်မည်ဟု နိုင်ငံတကာမှ တွက်ဆခဲ့ကြသော်လည်း ထင်သလောက် မလွယ်ကူခဲ့ပေ။ 

မလွယ်ကူရုံသာမက ရခိုင်အရေးသည် တစ်နေ့ခြားသာ၍ပင် ရှုပ်ထွေး နက်ရှိုင်းလာနေပေသေးတော့သည်။ ထို့ပြင် မြန်မာနိုင်ငံ မြောက်ပိုင်း ရှမ်းပြည်နယ်နှင့် ကချင်ပြည်နယ်တို့တွင် လက်နက်ကိုင် ပဋိပက္ခသတင်းများ မကြာမကြာ ကြားသိလာနေရသဖြင့် နိုင်ငံတကာ အမြင်တွင် အစဉ်အဆက် မြန်မာ့ပြဿနာကြီး နှစ်ရပ်အဖြစ် ရှုမြင်ထားသော ရခိုင်အရေးကိစ္စနှင့် ပြည်တွင်း ငြိမ်းချမ်းရေး ပြဿနာမှာ လိုက်လေဝေးလေ၊ ရှင်းလေ ရှုပ်လေ ဖြစ်ဘိသကဲ့သို့ ဖြစ်နေလေတော့သည်။ ၂၀၁၆ တွင် အာဏာရ လာခဲ့သော အမျိုးသား ဒီမိုကရေစီအဖွဲ့ချုပ် ဦးဆောင်သော အစိုးရသစ် လက်ထက်တွင်ပင် အဆိုပါ ကိစ္စကြီးနှစ်ရပ် အထူးသဖြင့် ရခိုင်ပြည်နယ် ကိစ္စမှာ အရိပ်မည်း ကြီးစွာထိုးလျက် ရှိနေပေသေးသည်။ 

နိုင်ငံတကာသည် စစ်အစိုးရကာလက ဗိုလ်ချုပ်မှူးကြီး သန်းရွှေကို စောင့်ကြည့်ခဲ့ကြသည်။ ၂၀၁၀ နောက်ပိုင်း စစ်အစိုးရအလွန်ကာလ၌ သမ္မတဟောင်း ဦးသိန်းစိန်ကို လေ့လာ စောင့်ကြည့်ခဲ့ကြပြီး ယခုအစိုးရအသစ် လက်ထက်တွင်မူ လေ့လာစောင့်ကြည့်ခြင်း ခံရသူမှာ ဒေါ်အောင်ဆန်းစုကြည်ပင် ဖြစ်တော့သည်။ ဗိုလ်ချုပ်မှူးကြီး သန်းရွှေမှာ စစ်အစိုးရ ခေါင်းဆောင်ဖြစ်သဖြင့် နိုင်ငံတကာ၏ ထိုးနှက်ချက်ကို အကြီးအကျယ် ခံရသည်။ သူဘာလုပ်လုပ် အကောင်း မမြင်ပေ။ ဗိုလ်ချုပ်မှူးကြီးသည် ထိုစဉ်က အကျယ်ချုပ် ကျခံနေရသော ဒေါ်အောင်ဆန်းစုကြည်နှင့် အလျဉ်းသင့်သလို တွေ့ဆုံကာ မြန်မာ့နိုင်ငံရေးကို ကုစားရန် ကြိုးစားခဲ့သော်လည်း မအောင်မြင်ခဲ့ပေ။ ကောင်းအောင် လုပ်လေ အဆိုးသတင်းထွက်လေ  ဖြစ်တော့သည်။ နောက်ဆုံး ဗိုလ်ချုပ်မှူးကြီး သန်းရွှေသည် နိုင်ငံတကာစနစ်၏ အထာနှင့် သဘောသဘာဝကို နားလည်သွားဟန်တူသည်။ စိတ်ပိုင်းဖြတ်ပြီးနောက် ၂၀ဝ၇ သံဃာအရေးအခင်းကို ခပ်ကြမ်းကြမ်း ကိုင်တွယ်ကာ ၂၀ဝ၈ ဖွဲ့စည်းပုံ အခြေခံဥပဒေကို ပြဋ္ဌာန်းလျက် ၂၀၁၀ အထွေထွေ ရွေးကောက်ပွဲကို ပြုလုပ်ကာ ကန့်လန့်ကာ နောက်ကွယ်သို့  ဝင်ရောက်သွားတော့သည်။

ဗိုလ်ချုပ်မှူးကြီး သန်းရွှေအလွန် အာဏာရလာသော ဦးသိန်းစိန်သည် စစ်ဗိုလ်ချုပ်ကြီးဟောင်းတစ်ဦး ဖြစ်သော်လည်း သဘောထား ပျော့ပျောင်းသူ၊ သဘောထား အလယ်အလတ်ရှိသူအဖြစ် ကျယ်ကျယ်ပြန့်ပြန့် ရှုမြင်ကြသည့်အလျောက် နိုင်ငံတကာအမြင်တွင် ဦးသိန်းစိန်သည် လက်တွဲ လုပ်ကိုင်နိုင်သူတစ်ဦးဖြစ်သည်။ တရုတ်နိုင်ငံ ရင်းနှီးမြှုပ်နှံမှု တစ်ခုဖြစ်သည့် မြစ်ဆုံရေကာတာ စီမံကိန်း ရပ်ဆိုင်းရန် ဆုံးဖြတ်ချက်သည် ဦးသိန်းစိန်အပေါ် ပြည်တွင်း၊ ပြည်ပ ထောက်ခံချက်များ တစ်ဟုန်ထိုး တိုးပွားသွားစေခဲ့သည်။ ဦးသိန်းစိန် အစိုးရအပေါ် ပြည်သူ့ဗဟိုပြု အစိုးရအဖြစ် ရှုမြင်ခဲ့ကြသည်။ ၂၀၁၂ ရခိုင်တွင် ပဋိပက္ခ အကြီးအကျယ် ဖြစ်ပွားခဲ့ရာ နိုင်ငံတကာမှ ဦးသိန်းစိန်အစိုးရ သဘောထားကို မှန်းဆစောကြောခဲ့ကြသည်။ လူ့အခွင့်အရေး ဗဟိုပြုမည်လော၊ အမျိုးသားရေး၊ လုံခြုံရေး ဗဟိုပြုမည်လော ဝေခွဲမရ ဖြစ်ခဲ့ကြသည်။ ရခိုင်အရေးကိစ္စဖြစ်ပြီးနောက် လာရောက် လည်ပတ်သော ကမ္ဘာ့ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး အကြီးအကဲအား ရခိုင်ပြည်နယ်မှ နိုင်ငံသား အထောက်အထားမဲ့သူများအား တတိယနိုင်ငံများသို့ ပို့ဆောင်ရန်နှင့် အထောက်အထားမဲ့သူများအား ထိန်းသိမ်းရေး စခန်းများတွင် ထိန်းသိမ်းထားရန် သမ္မတ ဦးသိန်းစိန်က ဆွေးနွေးသောအခါ ၎င်းအပေါ် တရုတ်အား အာခံခဲ့သည့် ကိစ္စနှင့်ပတ်သက်၍ အမှတ်ပေးထားသော နိုင်ငံတကာ အသိုင်းအဝန်းမှာ ပက်လက်လန်လေတော့သည်။ 

နိုင်ငံတကာနှင့် ပြည်သူအများစု ကြည်ညိုလေးစားခြင်း ခံရသော နိုဘယ်လ်ငြိမ်းချမ်းရေးဆုရှင် ဒေါ်အောင်ဆန်းစုကြည်သည်ပင်လျှင် နိုင်ငံတကာ၏ လေ့လာ စောင့်ကြည့်မှုများမှ မလွတ်ကင်းနိုင်ပေ။ လတ်တလော ပြုလုပ်သွားခဲ့သော ဘီဘီစီနှင့် အင်တာဗျူးတွင်ပင် ဒေါ်အောင်ဆန်းစုကြည်မှာ ရခိုင်အရေးနှင့်ပတ်သက်လျှင် ခံစစ်သဘော ရောက်ရှိသွားခဲ့သည်။ ရခိုင်အရေးနှင့်ပတ်သက်လျှင် အများကြည်ညိုလေးစားရသော ဒေါ်အောင်ဆန်းစုကြည်ကဲ့သို့ ပုဂ္ဂိုလ်မျိုးသည်ပင်လျှင် နိုင်ငံတကာ၏ ကြီးစွာသော အထင်အမြင် လွဲမှားမှုကို ခံစားရပါသည်ဆိုလျှင် မြန်မာနိုင်ငံနှင့် မြန်မာနိုင်ငံသားများမှာမူကား ဆိုဖွယ်မရှိတော့ပေ။

ခေတ်ကာလ၏ အခြေအနေနှင့် နိုင်ငံတကာ ဆက်ဆံရေးသဘော သဘာဝတို့အရ မည်သူမဆို၊ မည်သည့်နိုင်ငံမဆို ပြစ်တင်ဝေဖန်ခံရမှု၊ စောင့်ကြည့်လေ့လာခံရမှုတို့မှ မလွတ်ကင်းနိုင်ပေ။ လူ့သဘော သဘာဝအရ အကောင်းထက် အဆိုးကို အာရုံစူးစိုက်တတ်ကြသည်။ အချို့ကိစ္စများသည် ရှင်းလေ၊ ရှုပ်လေဖြစ်တတ်သည်။ ပြောလေ မောလေ ဖြစ်တတ်သည်။ လိုက်လေ ဝေးလေ ဖြစ်တတ်သည်။ မြန်မာနိုင်ငံသည် နိုင်ငံငယ်တစ်နိုင်ငံသာ ဖြစ်သည်။ စီးပွားရေး၊ ဖွံ့ဖြိုးရေး ရှုထောင့်မှ သုံးသပ်ခြင်း ဖြစ်သည်။ ပြောင်းလဲလိုက်သော နိုင်ငံရေးစနစ်အရ အမှောင်မှ အလင်းသို့၊ အပိတ်မှ အဖွင့်သို့၊ အာဏာရှင်မှ ဒီမိုကရေစီသို့ ကူးပြောင်းနေသည်ဖြစ်ရာ ဝေဖန်မှု၊ စောင့်ကြည့်မှု၊ ချီးမွမ်းကဲ့ရဲ့ ဝေဖန်ပြစ်တင်မှုများကို မလွဲမသွေ ကြုံတွေ့ရမည် ဖြစ်သည်။ 

ဝေဖန်ပြစ်တင် စောင့်ကြည့်မှုများကို တုန်လှုပ်ရန် မလိုသလို လုံးလုံး ဥပေက္ခာ ပြုရန်တော့ မဟုတ်ပေ။ မြန်မာနိုင်ငံကို အရှေ့ အလယ်ပိုင်းကဲ့သို့  ပြည်ပ စွက်ဖက်မှုများဆီ တွန်းပို့လိုသော အစုအဖွဲ့များလည်း ရှိလေသည်။ ပြဿနာ ရှိနေသည်ကို လက်ခံရင်း အကောင်းဆုံး ဖြေရှင်းနည်းကို မြန်မာတို့ကိုယ်တိုင် ရှာဖွေ ကြံဆကြရန် ဖြစ်သည်။ ပြဿနာ ဖြေရှင်းနည်းသည်အတွင်းမှ လာရမည်သာ ဖြစ်သည်။ အလုပ်လုပ်ရင်း ပြဿနာများကို ဖြေလျှော့သွားကြရန် ဖြစ်သည်။ ငြင်းခုံဆွေးနွေးရင်း အချင်းချင်း နားလည်မှု တည်ဆောက်ကြရန် ဖြစ်သည်။ ရင်ဆိုင်ရန်ဖြစ်ရင်း ငြိမ်းချမ်းရေး တည်ဆောက်သွားကြရန် ဖြစ်သည်။ ပြဿနာ ရှိနေသည်ကို လက်ခံရင်း လာမည့်ဘေး ပြေးတွေ့ကြရန် ဖြစ်သည်။ အိမ်နီးချင်းနိုင်ငံများ၊ အခြားအာရှနိုင်ငံများနှင့် နှိုင်းစာလျှင် မြန်မာ့လူ့အဖွဲ့အစည်းတွင် နိုင်ငံရေး ပြဿနာများ ပိုမိုကြီးမားနက်ရှိုင်းသည်ကို မည်သူမျှ မငြင်းဆိုနိုင်ပေ။ တစ်နည်း မြန်မာ့ လူ့အဖွဲ့အစည်းသည် နိုင်ငံတကာ၏ စောင့်ကြည့်ခြင်းကို ပိုမိုခံရလျက် ရှိသည်။ ယနေ့ခေတ် မြန်မာတို့အနေနှင့် အနာဂတ် မြန်မာမျိုးဆက်များအား ပြဿနာ နည်းပါးသော လူ့အဖွဲ့အစည်း၊ နိုင်ငံတကာ၏ အနုတ်သဘော စောင့်ကြည့်ခြင်းမှ ကင်းလွတ်သော လူ့အဖွဲ့အစည်းအဖြစ် လွှဲပြောင်း ပေးအပ်နိုင်ရန်အလို့ငှာ ဝိုင်းဝန်းကြံဆ ဆောင်ရွက်ကြရန် နိုင်ငံတော်နှင့် နိုင်ငံသား အားလုံးတွင် တာဝန်ရှိပါသည်။ 

အောင်အောင် (IR)