POST TYPE

NEWS

တရားရုံးချုပ် စီရင်ချက်ကြောင့် ဘရိတ်ဇစ် နှောင့်နှေးဖွယ်မရှိဟုဆို
26-Jan-2017 tagged as ဗြိတိန်

လန်ဒန်၊ ဇန်န၀ါရီ ၂၅

ဥရောပသမဂ္ဂမှ ဗြိတိန်ခွဲထွက်မှု  (ဘရိတ်ဇစ်) ကို မတ်လကုန်တွင် စတင်ရန်  စီစဉ်ထားမှုမှာ ပါလီမန်၏ အတည်ပြုချက်  ဦးစွာရယူရမည်ဆိုသော တရားရုံးချုပ်၏  စီရင်ချက်ကြောင့် ခွဲရေးအစီအစဉ်များ နှေးကွေး၊ နှောင့်နှေးသွားဖွယ် မရှိကြောင်း Reuters သတင်းဌာနက သုံးသပ်ဖော်ပြသည်။

အစိုးရအနေနှင့် နှစ်နှစ်ကြာခွဲရေး လုပ်ငန်းစဉ် တရားဝင် စတင်နိုင်ရေး လစ္စဘွန်း သဘောတူစာချုပ် ပုဒ်မ ၅၀ ကို ကျင့်သုံးရန်အတွက် လွှတ်တော်အမတ်များ၏ သဘောထားကို ဦးစွာ ရယူရမည်ဆိုသော အထက်ရုံး (ဟိုက်ကုတ်) ဆုံးဖြတ်ချက်ကို အစိုးရက အယူခံဝင်ခဲ့ရာ တရားရုံးချုပ်ကလည်း အထက်ရုံးနှင့် တစ်သဘောတည်း ဆုံးဖြတ်ခဲ့ခြင်း ဖြစ်သည်။

ပါလီမန်လွှတ်တော် တင်ရသောကြောင့် အဆင့်ပိုများသွားသော်လည်း သတ်မှတ် အချိန်ဇယားအတိုင်း ရှေ့ဆက်နိုင်ဖွယ်ရှိပြီး ဥရောပသမဂ္ဂမှ မခွဲထွက်လိုသူများနှင့် ရင်းနှီးမြှုပ်နှံသူအချို့ လိုလားသလို ခွဲရေးကို ဟန့်တားနိုင်ရန်မှာမူ အတိုက်အခံများအကြား သဘောကွဲလွဲနေခြင်းကြောင့်  ဖြစ်နိုင်ခြေ မရှိပေ။

“ပုဒ်မ ၅၀ ကို ကျွန်တော်တို့ ဟန့်တားမှာ မဟုတ်ပါဘူး။ လာမယ့်အပတ်ထဲမှာ ဒါမှမဟုတ် ဘယ်အချိန်မှာပဲ မဲပေးပေး လေဘာပါတီက အမတ်အားလုံး ဒီအတိုင်းပေးဖို့ ပြောထားပြီးပါပြီ”ဟု အဓိက အတိုက်အခံ လေဘာပါတီ ခေါင်းဆောင် ဂျရီးမီး ကော်ဘင်က ပြောကြားသည်။

လေဘာပါတီဝင် အားလုံး ကော်ဘင်နှင့် သဘောတူညီဖွယ် မရှိသော်လည်း လွှတ်တော် တစ်ရပ်လုံးပေါင်းတွင် ၀န်ကြီးချုပ် ထရီဇာမေအတွက် လိုအပ်သော မဲအရေအတွက် ရရှိဖွယ် ရှိနေသည်။

သို့သော်လည်း လွှတ်တော်တွင် ဆွေးနွေးရသည့် တစ်ဆင့်ခံသွားသောကြောင့် အလုံးစုံခွဲရေးကို ဆန့်ကျင်သော လေဘာပါတီနှင့် အခြားပါတီများမှ အမတ်များ အနေနှင့် ပြောရေးဆိုခွင့် တစ်စုံတစ်ရာ ရရှိလာဖွယ် ရှိနေသည်။ 

ဗြိတိန်အနေနှင့် သမဂ္ဂတွင်း လွတ်လပ်စွာ ရွှေ့ပြောင်း အခြေချမှုနှင့် ဒုက္ခသည်များကို ခွဲတမ်းဖြင့် ရယူရမှုတို့ကို မလိုလားသော်လည်း ဥရောပ၏ တစ်ခုတည်းသော ဘုံဈေးကွက်နှင့် အကောက်ခွန် သမဂ္ဂတို့တွင်မူ ဆက်လက် ပါဝင်လိုသူများ ရှိနေသည်။

သို့ဖြစ်ရာ သမဂ္ဂမှ အလုံးစုံ ခွဲထွက်ခြင်းထက် စီးပွားရေးအရ ပူးပေါင်းဆောင်ရွက်မှုများ ဆက်ရှိနေရေးကို လိုလားနေကြသည်။ 

သို့သော်လည်း အကောင်းချည်း ရွေးယူ၍ မရဟု ဥရောပခေါင်းဆောင်များက  ဗြိတိန်ကို သတိပေးထားရာ မဖြစ်နိုင်သော တောင်းဆိုမှုမျိုးကို မေအစိုးရက လုပ်ဆောင်ရန် ဆန္ဒမရှိ ဖြစ်နေသည်။

အောက်လွှတ်တော် (အရပ်သား လွှတ်တော်) တွင် ဆွေးနွေးမဲခွဲသည့် အဆင့်ကို လျင်လျင်မြန်မြန် ဖြတ်သန်းနိုင်ရန် အစိုးရက ဥပဒေကြမ်းကို တိုတိုကျဉ်းကျဉ်း ရေးဆွဲထားသည်ဟု ဆိုသည်။ 

ပြီးခဲ့သည့်နှစ် ဇွန်လ လူထုဆန္ဒခံယူပွဲအတွင်း အစိုးရနှင့် အတိုက်အခံ နှစ်ဖက်စလုံးမှ အမတ် အများစုက တွဲရေးကို လိုလားခဲ့သော်လည်း လူထုဆန္ဒခံယူပွဲတွင် ခွဲရေး နိုင်သွားခဲ့ရာ အမတ်အများစုက လူထု သဘောထားကို ဆန့်ကျင်တော့မည် မဟုတ်ဟု ပြောကြားထားသည်။ 

ပုဒ်မ ၅၀ ကို ဧပြီလမတိုင်မီ အသုံးပြုမည့် ထရီဇာမေ၏ ခွဲရေး အချိန်ဇယားကိုလည်း ဒီဇင်ဘာလအတွင်းက လွှတ်တော်တွင်း မဲခွဲ ထောက်ခံထားခဲ့ပြီးဖြစ်သည်။ ယခုကဲ့သို့ ဆွေးနွေးခွင့် ရလာချိန်တွင်လည်း မတ်လမကုန်မီ အတည်ပြုပေးနိုင်ရန် လျင်လျင်မြန်မြန် ဆောင်ရွက်သွားမည်ဟု မေ၏ အာဏာရ ကွန်ဆာဗေးတစ် ပါတီနှင့် အတိုက်အခံ လေဘာပါတီမှ အမတ်များက ပြောကြားထားသည်။

သို့သော်လည်း လေဘာပါတီ အနေနှင့် ကြောင်းကျိုးဆီလျော်သော ရွှေ့ပြောင်း အခြေချမှု စီမံခန့်ခွဲသည့် ပုံစံမျိုးဖြင့် ဘုံဈေး ကွက်တွင် ဆက်ရှိနေခွင့်ရရန် တိုက်ပွဲဝင် သွားမည်ဖြစ်ကြောင်း ပါတီခေါင်းဆောင် ကော်ဘင်က ပြောကြားထားသည်။

လေဘာပါတီအနေနှင့် စကော့တလန် အမျိုးသားရေး ၀ါဒီများနှင့် လစ်ဘရယ် ဒီမိုကရက်များ ကဲ့သို့သော ပါတီငယ်များနှင့် ပူးပေါင်းပြီး အလုံးစုံ ခွဲထွက်မှုမျိုး မဖြစ်လာစေရန် ကြိုးပမ်းသွားဖွယ် ရှိနေသည်။

ဝန်ကြီးချုပ်မေအတွက် ပို၍စိုးရိမ်စရာရှိသည်မှာ အထက်လွှတ်တော်(သူကောင်းမျိုးလွှတ်တော်) ၏သဘောထား ဖြစ်သည်။ သူကောင်းမျိုး အမတ်များမှ မဲဆန္ဒရှင်များ၏ သဘောထားကိုလည်း ငဲ့ကွက်စရာ မလိုသလို တွဲရေးကို လိုလားသူ အများအပြားရှိသည့် လွှတ်တော် ဖြစ်သည်။

အကယ်၍သာ သူကောင်းမျိုး အမတ်များက ပုဒ်မ ၅၀ ကျင့်သုံးခွင့်ကို ကန့်ကွက်ခဲ့လျှင် ခွဲရေးအချိန်ဇယားမှာ နှောင့်နှေးသွားနိုင်သည်။ 

သို့သော်လည်း လူထုဆန္ဒ ခံယူပွဲတွင်ရော၊ အောက်လွှတ်တော်တွင်ပါ ခွဲရေးကို လက်ခံပြီးသည့် အခြေအနေတွင် ရွေးကောက်ခံ မဟုတ်သည့် သူကောင်းမျိုး အမတ်များက ဟန့်တားရဲမည် မဟုတ်တော့ဟု အစိုးရက ယုံကြည်ထားကြောင်း Reuters သတင်းဌာနက သုံးသပ်ဖော်ပြသည်။         

F-03