News

POST TYPE

NEWS

ပါတီ၏ ဆုံးဖြတ်ချက်အတိုင်း လက်ခံမည်ဟု တနင်္သာရီတိုင်း လွှတ်တော်ဥက္ကဋ္ဌနှစ်ဦး တုံ့ပြန်
12-Jan-2017 tagged as လွှတ်တော်

ထားဝယ်၊ ဇန်နဝါရီ ၁၁

တနင်္သာရီတိုင်းဒေသကြီး လွှတ်တော်ဥက္ကဋ္ဌ နှစ်ဦးထဲတွင် တစ်ဦးအား အရေးယူမည်ဆိုသည့် အပေါ် ပါတီ၏ ဆုံးဖြတ်ချက်အတိုင်း ခံယူမည်ဟု တိုင်းလွှတ်တော်ဥက္ကဋ္ဌ နှစ်ဦးက ပြောကြားသည်။

တိုင်ကြားခံထားရသည့် တနင်္သာရီတိုင်းဒေသကြီး လွှတ်တော်ဥက္ကဋ္ဌနှင့် ဒုဥက္ကဋ္ဌနှစ်ဦး အနက် တစ်ဦးတွင် ရှိသင့်ရှိထိုက်သည့် ဂုဏ်သိက္ခာနှင့် မကိုက်ညီသည့်အတွက် အရေးယူသွားရန် ရှိကြောင်း အမျိုးသားဒီမိုကရေစီအဖွဲ့ချုပ် (NLD) ဗဟိုအလုပ်အမှုဆောင်အဖွဲ့ အတွင်းရေးမှူး အဖွဲ့ဝင် ဦးဉာဏ်ဝင်းက သတင်းမီဒီယာများအား ပြောဆိုချက်အပေါ် အထက်ပါအတိုင်း တုံ့ပြန်ခဲ့ခြင်း ဖြစ်သည်။

“ပါတီက ဆုံးဖြတ်ချက်အတိုင်း ကျေကျေနပ်နပ်ကြီး လက်ခံသွားပါ့မယ်” ဟု တိုင်းလွှတ်တော် ဒုဥက္ကဋ္ဌ ဦးကြည်စိုးက ဆိုသည်။

လွှတ်တော်ဥက္ကဋ္ဌ နှစ်ဦးထဲမှ တစ်ဦးကို အရေးယူရန်ရှိပြီး ပါတီမှ နုတ်ထွက်ရသည်အထိ ရှိကောင်းရှိနိုင်ကြောင်း လေ့လာသုံးသပ်ရေး အဖွဲ့ခေါင်းဆောင်လည်း ဖြစ်သည့် ဦးဉာဏ်ဝင်းက ပြောဆိုထားသည်။

လွှတ်တော်ဥက္ကဋ္ဌကို လွှတ်တော်လုပ်ငန်းစဉ်များ လုပ်ဆောင်မှု အားနည်းသည် ဟူသည့် စွပ်စွဲချက်ဖြင့် လည်းကောင်း၊ ဒုဥက္ကဋ္ဌကိုမူ လွှတ်တော်တည်ဆောက်ရေး တင်ဒါကိစ္စနှင့် ပတ်သက်၍ လည်းကောင်း တိုင်ကြားချက်များအပေါ် လေ့လာသုံးသပ်ရေးအဖွဲ့က စစ်ဆေးခဲ့ခြင်း ဖြစ်သည်။

တနင်္သာရီတိုင်းဒေသကြီး လွှတ်တော်တွင် လွှတ်တော်လုပ်ငန်းများကို ပုံမှန်အတိုင်း လုပ်ဆောင်ခြင်း ဖြစ်သည်ဟု လွှတ်တော်ဥက္ကဋ္ဌ ဦးခင်မောင်အေးက တုံ့ပြန်ထားပြီး လွှတ်တော်အဆောက်အအုံ တင်ဒါကိုလည်း ဥပဒေ လုပ်ထုံးလုပ်နည်းများအတိုင်း စနစ်တကျ လုပ်ဆောင်ခဲ့ခြင်း ဖြစ်ကြောင်း ဒုဥက္ကဋ္ဌ ဦးကြည်စိုးက ပြောဆိုထားသည်။

Dawei Watch