News

POST TYPE

NEWS

ချောက်ရေနံမြေလုပ်ငန်းက ဒေသဖွံ့ဖြိုးရေး ကျပ်သိန်း ၂၀၀၀ ခန့်အသုံးပြု
09-Oct-2019


ချောက်၊ အောက်တိုဘာ ၈

ချောက်လမ်းရွာရေနံမြေလုပ်ငန်းက ပြီးခဲ့သည့်ဘဏ္ဍာနှစ်အတွင်း ယင်း ဒေသဖွံ့ဖြိုးရေးလုပ်ငန်း ၃၀ ကျော်ကို ကျပ်သိန်း ၂၀၀၀ ခန့်သုံးစွဲပြီးနောက် အောက်တိုဘာ ၈ ရက်က ချောက်မြို့ အုပ်ချုပ်ရေးအဖွဲ့ထံ လွှဲပြောင်းပေးအပ်ခဲ့သည်။ 

မူလက ဒေသဖွံ့ဖြိုးရေးလုပ်ငန်း ၃၄ မျိုးအတွက် ကျပ်သိန်း ၂၈၇၀ ကျော် သုံးရန် လျာထားခဲ့သော်လည်း ပြည်ထောင်စု အစိုးရက လုပ်ငန်းတစ်မျိုးကို တာဝန်ယူလိုက်သဖြင့် လုပ်ငန်း ၃၃ မျိုးကို လုပ်ပေးခဲ့ခြင်းဖြစ်ကြောင်း ယင်း ရေနံမြေ အထွေထွေမန်နေဂျာ ဦးကိုကိုသက်က ရှင်းပြသည်။

ဒေသဖွံ့ဖြိုးရေးအတွက် ပညာရေးလုပ်ငန်း ၆ မျိုး (၂၄၆ သိန်းကျော်)၊ လူမှုအထောက်အကူပြုလုပ်ငန်း ၂၅ မျိုး (၁၅၇၃ သိန်းကျော်)၊ ပတ်ဝန်းကျင်ထိန်းသိမ်းရေး လုပ်ငန်းနှစ်မျိုး (သိန်း ၁၅၀ ကျော်) လုပ်ဆောင်ပေးခဲ့ကြောင်း ချောက် ရေနံမြေလုပ်ငန်းထံမှ သိရသည်။

ပညာရေးကဏ္ဍခြောက်မျိုးတွင် ကျေးရွာ ၅ ရွာနှင့် ရပ်ကွက်တစ်ခုရှိ စာသင်ကျောင်းတို့တွင် ကျောင်းမျက်နှာကြက် တပ်ဆင်ခြင်းလုပ်ငန်း၊ ကျောင်းခြံစည်းရိုးပြုလုပ်ခြင်း၊ ကျောင်းဆောင်နှင့် စာသင်ဆောင်အခန်းပြုပြင်ခြင်း၊ စာသင်ခုံပြုလုပ်ပေးခြင်းတို့ ပါဝင်သည်။

သဘာဝပတ်ဝန်းကျင် ထိန်းသိမ်းရေးလုပ်ငန်းနှစ်မျိုးမှာ ရွှေပုံတောင်ပတ်ဝန်းကျင်ထိန်းသိမ်းရေး သစ်ပင်စိုက်ခြင်း၊ မော်တာ၊ ရေပိုက်လိုင်း ပစ္စည်းများ ထောက်ပံ့ခြင်း လုပ်ငန်းတို့ဖြစ်ကြောင်း ယင်းလုပ်ငန်းထံမှ သိရသည်။ 

လူမှုရေးအထောက်အကူပြု လုပ်ငန်း ၂၅ မျိုးတွင် ဆိုလာမီးတပ်ပေးခြင်း၊ ဓာတ်အားလိုင်းကွန်ကရစ်တိုင်များ ဆောက်ပေးခြင်း၊ ထရန်စဖော်မာ အသစ်လဲပေးခြင်း၊ လျှပ်စစ်မီးလိုင်းကြိုးများ သွယ်တန်းပေးခြင်းတို့ပါဝင်ကြောင်း ယင်းလုပ်ငန်းထံမှ သိရသည်။

ထို့ပြင် ကွန်ကရစ်လမ်းခင်းခြင်း၊ ရေကျော်လမ်းတည်ဆောက်ပေးခြင်း၊ ရေမီတာသုံး ရေပိုက်လိုင်းတပ်ဆင်ပေးခြင်း၊ ရေကန်၊ ရေလွှဲတာဘောင် ကွန်ကရစ် ကျောက်ရိုးတည်ဆောက်ပေးခြင်းတို့ ပါဝင်ကြောင်း ချောက်ရေနံမြေလုပ်ငန်းထံမှ သိရသည်။

 နေနိုင်


  • VIA