News

POST TYPE

NEWS

သမီးရည်းစား စကားပြောသည်ကို လက်မခံရာမှ လူသတ်မှုဖြစ်
01-Oct-2019
မကွေး ၊ အောက်တိုဘာ ၁

တောင်တွင်းကြီးမြို့နယ်၊ တက်ပုအောင်းကျေးရွာတွင် စက်တင်ဘာ ၃၀ ရက်နေ့ ညနေပိုင်းက အထက်တန်းကျောင်း ပညာရေးဝန်ထမ်းအမျိုးသမီးတစ်ဦးကို ချစ်ကြိုက်စကားပြောသည်ကို လက်မခံသဖြင့် လူသတ်မှုဖြစ်ပွားခဲ့ကြောင်း ယင်းမြို့နယ် ကုက္ကိုကုန်းနယ်မြေရဲစခန်းထံမှ သိရသည်။

တက်ပုအောင်းကျေးရွာ အထက်တန်းကျောင်းတွင် အထွေထွေလုပ်သားအဖြစ် တာဝန်ထမ်းဆောင်နေသည့် အသက် ၃၄ နှစ်အရွယ် အမျိုးသမီးတစ်ဦးကို ဖိုးဖြူ (ခ) နိုင်စိုး (ခ) ဇော်လေး (အသက် - ၂၀ နှစ်) က အကြိမ်ကြိမ် ချစ်ကြိုက်စကားပြောရာ ထိုအမျိုးသမီးက လက်မခံနိုင်ကြောင်း ပြန်လည်ပြောဆိုသဖြင့် ဓားဖြင့် ထိုးသတ်ခဲ့ကြောင်း ကုက္ကိုကုန်းနယ်မြေရဲစခန်းမှ တာဝန်ရှိသူတစ်ဦးက ပြောသည်။

"သတ်ခံရတဲ့အမျိုးသမီးကို ချစ်ကြိုက်စကားပြောတာကို အုပ်ချုပ်ရေးမှူးဆီတိုင်တော့ နောက်မလုပ်ဖို့ ခံဝန်ချုပ်လုပ်ထားတာ။ အဲ့လိုလုပ်ထားတာကို သတ်တဲ့သူက မကျေနပ်ဘူး။ နောက်ထပ် ချစ်ကြိုက်စကားထပ်ပြောသေးတယ်၊ ပြောတော့ အမျိုးသမီးက ပြန်ရန်ထောင်တယ်။ အဲ့ဒါကိုမကျေနပ်လို့ လူသွားလူလာနည်းတဲ့နေရာမှာ စောင့်ပြီး သတ်တာ"ဟု ကုက္ကိုကုန်းနယ်မြေရဲစခန်းမှ တာဝန်ရှိသူတစ်ဦးက ဆိုသည်။

သေဆုံးသူ အမျိုးသမီးမှာ ဦးခေါင်းနောက်ဘက် ပြတ်ရှဒဏ်ရာ (၃) ချက်၊ ယာပါးပေါ် ကန့်လန့်ဖြတ် ပြတ်ရှဒဏ်ရာ (၁) ချက်၊ ယာလက်မောင်းပြတ်ရှဒဏ်ရာ(၁) ချက်နှင့် တင်ပါးဝဲ/ယာ ပြတ်ရှဒဏ်ရာ (၁) ချက်ရရှိကာ သေဆုံးခဲ့ခြင်းဖြစ်သည်။

လူသတ်မှုကျူးလွန်ခဲ့သည့် ဖိုးဖြူ (ခ) နိုင်စိုး (ခ) ဇော်လေး အား သေဆုံးသူအမျိုးသမီး၏ဖခင်က တရားလိုပြုလုပ်ကာ ကုက္ကိုကုန်းနယ်မြေရဲစခန်းတွင် (ပ) ၃၄/ ၂၀၁၉၊ ရာဇသတ်ကြီးပုဒ်မ ၃၀၂ ဖြင့် အမှုဖွင့်စစ်ဆေးလျှက်ရှိသည်။

လွင်အေး