News

POST TYPE

NEWS

ဟွားဝေကို အဓိကမိတ်ဖက်အဖြစ် ဆက်လက်လက်တွဲရန် မြန်မာဆုံးဖြတ်
26-May-2019

ဘန်ကောက်၊ မေ ၂၆

အမေရိကန်နှင့် တရုတ်တို့အကြား ကုန်သွယ်ရေးစစ်ပွဲ အရှိန်အဟုန် မြင့်တက်လာပြီးနောက် အမေရိကန်ဘက်က တရုတ်နည်းပညာကုမ္ပဏီ ဟွားဝေကို ပိတ်ဆို့မှုများရှိနေသော်လည်း မြန်မာကမူ ဟွားဝေကို အဓိကမိတ်ဖက်အဖြစ် ဆက်လက် ရွေးချယ်ထားဆဲဖြစ်ကြောင်း The Nation က ဖော်ပြထားသည်။

ဟွားဝေနည်းပညာကုမ္ပဏီနှင့် မြန်မာနိုင်ငံ အင်ဂျင်နီယာအသင်းချုပ်တို့ လက်တွဲ၍ ပွင့်လင်းမြင်သာစွာ ပူးပေါင်းကာ အပြန်အလှန် အကျိုးပြုနိုင်သည့် ဂေဟစနစ်တစ်ခု တည်ဆောက်ရန် ရည်ရွယ်ချက်ဖြင့် ကျင်းပခဲ့သော မြန်မာနိုင်ငံ အဆောက်အဦးတွင်း ကွန်ရက်များ ဒစ်ဂျစ်တယ်အသွင်ကူးပြောင်းရေး ဆွေးနွေးပွဲ ၂၀၁၉ အခမ်းအနားတွင် မြန်မာနိုင်ငံက ဟွားဝေကို ဆက်လက် ရွေးချယ်ထားဆဲဖြစ်ကြောင်းကို တာဝန်ရှိသူများက အသိပေးသွားခဲ့ခြင်းဖြစ်သည်။

ပို့ဆောင်ဆက်သွယ်ရေးဝန်ကြီးဌာန၊ ဆက်သွယ်ရေးညွှန်ကြားမှု ဦးစီးဌာန၏ ဒုတိယညွှန်ကြားရေးမှူးချုပ် ဦးစိုးနိုင်က “မြန်မာနိုင်ငံ ဆက်သွယ်ရေးနယ်ပယ်ဖွံ့ဖြိုးတိုးတက်ဖို့ စိတ်ချယုံကြည်ရတဲ့ ဆက်သွယ်ရေး Solutionတွေ၊ ကျွမ်းကျင်အတတ်ပညာဝန်ဆောင်မှုတွေကို ပံ့ပိုးပေးပြီး ကူညီထောက်ပံ့နေတဲ့ Huawei ကို ကျေးဇူးအထူးတင်ရှိပါတယ်။ မြန်မာနိုင်ငံရဲ့ အနာဂတ်ဆက်သွယ်ရေးကွန်ရက် တည်ဆောက်မှုမှာ ပါဝင်ဖို့လည်း Huawei ကို ကြိုဆိုပါတယ်။ ဆက်သွယ်ရေးလုပ်ငန်းသုံးပစ္စည်း ထောက်ပံ့သူ မည်သူမဆို မြန်မာနိုင်ငံရဲ့တည်ဆဲဥပဒေတွေ၊ စည်းမျဉ်းစည်းကမ်းတွေကို လိုက်နာမယ်ဆိုရင် တရားမျှမျှတတ ယှဉ်ပြိုင်တဲ့နေရာမှာ ဘယ်သူ့ကိုမှ ပိတ်ပင်သွားမှာမဟုတ်ပါဘူး။ တချိန်တည်းမှာပဲ မြန်မာနိုင်ငံရဲ့ ကွန်ရက်လုံခြုံမှုရှိစေဖို့အတွက် ဆိုင်ဘာလုံခြုံရေးနဲ့ အခြားဆက်စပ်နည်းပညာ စံချိန်စံညွှန်းတွေကိုလည်း ချမှတ်ပေးသွားမှာပါ” ဟု ပြောကြားသည်။

မြန်မာနိုင်ငံအင်ဂျင်နီယာအသင်းချုပ်ဥက္ကဋ္ဌ ဦးအောင်မြင့်ကလည်း “သုံးစွဲသူတွေက အရည်သွေးမြင့်တဲ့ ကွန်ရက်ဝန်ဆောင်မှုတွေကို အချိန်မရွေး နေရာမရွေး ရရှိသုံးစွဲလိုကြပါတယ်။ ဒီလိုပေးအပ်ဖို့ဆိုတဲ့  နေရာမှာ အဆောက်အဦးတွင်း ကွန်ရက်တွေက အရေးကြီးတဲ့နေရာက ပါဝင်လာပါတယ်။ ဒါပေမယ့် လက်ရှိ အဆောက်အဦးတွင်းကွန်ရက် အတွေ့အကြုံတွေက သုံးစွဲသူတွေရဲ့ မျှော်မှန်းချက်ကို အပြည့်အဝ မဖြည့်ဆည်းနိုင်ပါဘူး။ အထူးသဖြင့် အထပ်မြင့် အဆောက်အဦ အိမ်ယာတွေမှာပါ။ အဆောက်အဦတွင်းကွန်ရက်တွေ ဒစ်ဂျစ်တယ်အသွင်ကူးပြောင်းရေးအတွက် နည်းပညာ၊ အိမ်ခြံမြေ ဆောက်လုပ်ရေးနဲ့ အခြားသောသက်ဆိုင်ရာနယ်ပယ်တွေက ပူးပေါင်းပါဝင်ပြီးတော့ တူညီတဲ့ စံချိန်စံညွှန်းနဲ့ လုပ်ဆောင်ဖို့လိုအပ်ပါတယ်။ မြန်မာနိုင်ငံရဲ့ အကြီးမားဆုံးသော အင်ဂျင်နီယာ အဖွဲ့အစည်းတစ်ခုဖြစ်တဲ့ မြန်မာနိုင်ငံ အင်ဂျင်နီယာအသင်းချုပ်အနေနဲ့ Huawei နဲ့ပူးပေါင်းပြီး အဆောက်အဦတွင်း ကွန်ရက်တွေ ဒစ်ဂျစ်တယ်အသွင်ကူးပြောင်းရေး နဲ့ မြန်မာ ICS/FTTX နယ်ပယ်အတွက် စံနှုန်းသက်မှတ်မှုတွေကို မြှင့်တင်လိုပြီး လက်တွေ့ဘဝတွေကို အမှန်တကယ် သက်ရောက်မှုဖြစ်စေတဲ့ နည်းပညာ အခြေခံအဆောက်အအုံနဲ့ ပတ်သက်တဲ့ခေါင်းစဉ်တွေ၊ လက်ရှိ အသုံးပြုနေမှုတွေနဲ့  ကောင်းမွန်တဲ့ Solution  ကို ရှာဖွေမယ့်အခုဆွေးနွေးပွဲကို တက်ရောက်ရတာ တကယ်ပဲ ဝမ်းမြောက်ဝမ်းသာဖြစ်ရပါတယ်”ဟု အသိပေးသွားခဲ့သည်။

ဆောက်လုပ်ရေးဝန်ကြီးဌာန၏ အမြဲတမ်းအတွင်းဝန်ဖြစ်သူ ဦးဝင်းတင့်က “မြန်မာနိုင်ငံမှာ စမတ်အဆောက်အဦးတွေနဲ့ စမတ်စီးပွားရေးဖွံ့ဖြိုးလာဖို့အတွက် နယ်ပယ်ကဏ္ဍအားလုံးက ပါဝင်ကြိုးပမ်းကြဖို့ လိုအပ်ပါတယ်။ အိမ်ခြံမြေ ဆောက်လုပ်ရေးလုပ်ငန်းရှင်တွေအနေနဲ့ အသိဉာဏ် ပါဝင်လုပ်ဆောင်နိုင်တဲ့ စက်ပစ္စည်းတွေနဲ့ ဆက်သွယ်ရေး လိုင်းကြိုးတွေ ထည့်သွင်းဖို့နေရာကို အဆောက်အဦးဒီဇိုင်းပြုလုပ်တဲ့အချိန်ထဲက ထည့်သွင်းစဉ်းစားစေချင်ပါတယ်။ ဒါမှလည်း ဆက်သွယ်ရေး စက်ပစ္စည်းတွေကို အလွယ်တကူ တပ်ဆင်အသုံးပြုနိုင်မှာ ဖြစ်လို့ပါ။ ကျွန်တော်တို့က ပါဝင်ဆောင်ရွက်ကြတဲ့ မိတ်ဖက်အားလုံးအတွက်  ဆက်သွယ်ရေးကုန်ကျစရိတ်တွေ လျော့ကျစေပြီး လုပ်ငန်းစွမ်း ဆောင်ရည်တိုးတက်လာစေဖို့ သင့်လျော်တဲ့ပတ်ဝန်းကျင်တစ်ခု ထောက်ပံ့ပေးဖို့ ရည်ရွယ်ပါတယ်။ ဒီကိစ္စနဲ့ ပတ်သက်တဲ့ဆွေးနွေးမှုတွေ၊ ပူးပေါင်းဆောင်ရွက်မှုတွေကို Huawei နဲ့ မြန်မာနိုင်ငံ အင်ဂျင်နီယာများ အသင်းချုပ်တို့က စတင်လုပ်ဆောင်ပေးနေတာကို တွေ့ရတဲ့အတွက် ဝမ်းမြောက်ဝမ်းသာဖြစ်ရသလို မြန်မာနိုင်ငံ  ဆောက်လုပ်ရေးနယ်ပယ်အတွက် Huawei ရဲ့ အဆက်မပြတ် ပံ့ပိုးမှုတွေအတွက်လည်း ကျေးဇူးတင်ရှိပါတယ်။ နယ်ပယ်အားလုံး အနေနဲ့လည်း အားလုံးတိုးတက် ဖွံ့ဖြိုးလာဖို့အတွက် ကိုယ်ပိုင်အကြံဉာဏ်တွေကိုပေးနိုင်ပြီး သက်ဆိုင်ရာနယ်ပယ်အလိုက် စွမ်းရည် အပြည့်အဝ အသုံးပြုနိုင်ကြဖို့ မျှော်လင့်ပါတယ်။ ပိုပြီးကောင်းမွန်တဲ့ မြန်မာနိုင်ငံဖြစ်လာဖို့ အားလုံး အတူဆောင်ရွက်သွားကြရပါမယ်”ဟု ပြောကြားခဲ့သည်။

ဟွားဝေသည် လက်ရှိတွင် စင်ကာပူဈေးကွက်၌ ထိခိုက်နစ်နာမှုများဖြင့် ကြုံဆုံနေရပြီး လွန်ခဲ့သောရက်အနည်းငယ်ခန့်ကစ၍ စင်ကာပူ တစ်ပတ်ရစ်ဈေးကွက်တွင် ဟွာဝေးပစ္စည်းများအားလုံး အရောင်းအဝယ် ရပ်ဆိုင်းသွားခဲ့ပြီဖြစ်သည်။

E-11


  • VIA