News

POST TYPE

NEWS

ခွေးဂေဟာပို့မည့် လမ်းဘေးခွေးများကို လုယူခဲ့သူများအား အရေးယူရန်စီစဉ်
21-May-2019
ရန်ကုန်၊ မေ ၂၁

ကျောက်တံတားမြို့နယ်တွင် မေလ ၂၀ ရက်နေ့က ခွေးဂေဟာပို့ရန် လမ်းဘေးခွေးများကို ရန်ကုန်မြို့တော်စည်ပင်သာယာရေးကော်မတီက ဖမ်းဆီးနေစဉ် လုယူခဲ့သူများကို အရေးယူဆောင်ရွက်သွားရန် စီစဉ်နေကြောင်း ရန်ကုန်မြို့တော်စည်ပင်သာယာရေးကော်မတီမှ တာဝန်ရှိသူတစ်ဦးက ပြောသည်။

ဒုတိယမြို့တော်ဝန် စီမံမှုဖြင့် ကျောက်တံတားမြို့နယ်ရှိ လမ်းဘေးခွေးများကို လှိုင်မြို့နယ်ရှိ ခွေးဂေဟာသို့ ပို့ဆောင်ရန် မေလ ၂၀ ရက်နေ့က ဖမ်းဆီးစဉ် ခွေးချစ်သူများက စည်ပင်ဝန်ထမ်းများကို ပြသနာရှာပြီး ဖမ်းထားသည့်ခွေးများကို လုယူခဲ့သည့်အတွက်ကြောင့် ယင်းနေ့တွင်ပင် ရပ်နားလိုက်ရကြောင်း ရန်ကုန်မြို့တော်စည်ပင်သာယာရေးကော်မတီထံမှ သိရသည်။

“အခုလက်ရှိ အဲဒီကိစ္စနဲ့ ပတ်သက်ပြီး အရေးယူဆောင်ရွက်ဖို့ကို EC အစည်းအဝေးထိုင်ပြီး ဆွေးနွေးနေပါတယ်”ဟု ရန်ကုန်မြို့တော်စည်ပင်သာယာရေးကော်မတီမှ တာဝန်ရှိသူတစ်ဦးက ပြောသည်။

ယင်းကိစ္စနှင့်ပတ်သက်၍လည်း ရန်ကုန်ဒုတိယမြို့တော်ဝန်ထံသို့လည်း တင်ထားကြောင်း ၎င်းက ဆိုသည်။

ရန်ကုန်တိုင်းဒေသကြီးတွင် ခွေးလေခွေးလွင့် နှစ်သိန်းကျော်ရှိပြီး ယခုလက်ရှိ ခွေးလေခွေးလွင့်များကို ထိန်းချုပ်ရန်အတွက် သားဆက်ခြားခြင်း၊ သင်းကွပ်ခြင်းနှင့် အဆိပ်ချကာ သုတ်သင်ခြင်းနည်လမ်းတို့ဖြင့် ဆောင်ရွက်နေကြာင်း ရန်ကုန်မြို့တော်စည်ပင်သာယာရေးကော်မတီထံမှ သိရသည်။

ခွေးလေခွေးလွင့်များကြောင့် နှစ်စဉ်ခွေးရူးပြန်သည့် ဖြစ်စဉ်များ ရှိနေသည့်အပြင် ယခုနှစ်၊ ဧပြီလ ၂၃ ရက်နေ့တွင် သာကေတမြို့နယ်၌ အသက် ၁၂ နှစ်အရွယ် အလယ်တန်းကျောင်းသားတစ်ဦး ခွေးရူးအကိုက်ခံရသဖြင့် အသက်သေဆုံးခဲ့သည့် ဖြစ်စဉ်များလည်း ရှိခဲ့သည်။

J-10