News

POST TYPE

NEWS

တိုင်းရင်းသားလက်နက်ကိုင် အားလုံးပါဝင်သည့် အဖွဲ့အစည်းအသစ်ဖွဲ့ရေး KNU အဆိုပြု
20-May-2019
ရန်ကုန်၊ မေ ၁၉

အပစ်ရပ် လက်မှတ်ထိုးထားသည့် အဖွဲ့နှင့် လက်မှတ်မထိုးရသေးသည့် တိုင်းရင်းသားလက်နက်ကိုင် အဖွဲ့အစည်းအားလုံး ပါဝင်သော အဖွဲ့အစည်းအသစ်တစ်ရပ် ဖွဲ့စည်းရေးအတွက် ကရင်အမျိုးသားအစည်းအရုံး (KNU) က NCA လက်မှတ်ထိုးအဖွဲ့များ၏ ထိပ်သီးအစည်းအဝေးတွင် အဆိုပြုခဲ့ကြောင်း KNU က ယင်းအစည်းအဝေးအပြီး သတင်းထုတ်ပြန်ခဲ့သည်။

တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးဆိုင်ရာသဘောတူစာချုပ် (NCA) လက်မှတ်ရေးထိုးထားသည့် တိုင်းရင်းသား လက်နက်ကိုင်အဖွဲ့များ၏ ထိပ်သီးအစည်းအဝေးကို မေလ ၁၄ ရက်နေ့မှ ၁၈ ရက်နေ့အထိ ထိုင်းနိုင်ငံ ချင်းမိုင်မြို့တွင် ပြုလုပ်ခဲ့သည်။

ယင်းအစည်းအဝေးတွင် NCA လက်မှတ်ထိုးထားသောအဖွဲ့နှင့် မထိုးထားရသေးသောအဖွဲ့များအားလုံး ပါဝင်သည့် ငြိမ်းချမ်းရေးလုပ်ငန်းစဉ် အတိုင်ပင်ခံ အစည်းအဝေး (Peace Process Consultative Meeting- PPCM) ကို ဖွဲ့စည်းရန် ကရင်အမျိုးသားအစည်းအရုံး KNU အဖွဲ့က အဆိုပြုခဲ့ခြင်းဖြစ်သည်။ 

ထို့ပြင် KNU အနေနှင့် အတူတကွ စုပေါင်းအစီအစဉ်များချမှတ်ခြင်း၊ အပြုသဘောဆောင်သော သတင်းအချက်အလက်များ ဖလှယ်ခြင်း၊ ဘုံရည်မှန်းချက်နှင့် ပန်းတိုင် ချမှတ်ရေး စသည့် ရည်ရွယ်ချက်များဖြင့် အဆိုပါ PPCM ကို ဖွဲ့စည်းရန် အဆိုပြုခဲ့ခြင်းဖြစ်ကြောင်း KNU၏ သတင်းထုတ်ပြန်ချက်တွင် ဖော်ပြထားသည်။

အဆိုပါ KNU၏ အဆိုပြုချက်နှင့် ပတ်သက်၍ တိုင်းရင်းသား လက်နက်ကိုင် အဖွဲ့အစည်းများအကြား ဆက်လက်ဆွေးနွေးသွားရန်နှင့် အားလုံးပါဝင်သည့် စုဖွဲ့မှုတစ်ခု ဖွဲ့စည်းနိုင်ရေးအတွက်လည်း အလုပ်အဖွဲ့တစ်ရပ်ကို ဖွဲ့စည်းခဲ့ကြောင်း တိုင်းရင်းသားလက်နက်ကိုင် ထိပ်သီးအစည်းအဝေးကို တက်ရောက်ခဲ့သူတစ်ဦးက ပြောကြားသည်။

“ဒါက ထိပ်သီးအစည်းအဝေးပွဲ ပထမပိုင်းပေါ့။ နောက်ထပ် ထပ်ပြီးခေါ်ဖို့ ထိပ်သီးအစည်းအဝေးပွဲ ဒုတိယပိုင်းက ဆက်ခေါ်ဖို့လည်း ဆုံးဖြတ်ထားတယ်။ ဆွေးနွေးဖို့ ဒီကိစ္စတွေ လက်ကျန်ဖြစ်နေတာတွေ ဆက်ဆွေးနွေးမယ်ပေါ့။ ပြီးတော့ PPST ကနေ KNU နုတ်ထွက်တယ်ဆိုတာကိုလည်း ယာယီဆိုင်းငံ့ထားတယ်။ နောက် ဆွေးနွေးပွဲတွေမှာ ဆက်ဆုံးဖြတ်မယ်ပေါ့။ ဒီလိုပဲ သဘောတူထားတယ်”ဟု ၎င်းက ဆိုသည်။

လက်ရှိတွင် တိုင်းရင်းသား လက်နက်ကိုင်အဖွဲ့များအနေနှင့် အစုအဖွဲ့ နှစ်ခု ကွဲပြားနေပြီး တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးဆိုင်ရာ သဘောတူစာချုပ် (NCA) ကို လက်မှတ်ရေးထိုးထားသည့် အစုအဖွဲ့နှင့် လက်မှတ်ရေးထိုးရခြင်း မရှိသေးသည့် မြောက်ပိုင်း လက်နက်ကိုင်အဖွဲ့များက အစုအဖွဲ့တစ်ခုသက်သက်စီ ကွဲပြားနေသည်။

NCA စာချုပ်ကို လက်မှတ်ရေးထိုးထားသည့် တိုင်းရင်းသားလက်နက်ကိုင် အဖွဲ့အစည်း ၁၀ ဖွဲ့ရှိပြီး လက်မှတ်မရေး ထိုးရသေးသည့်အဖွဲ့လည်း ၈ ဖွဲ့ခန့် ကျန်ရှိနေသေးသည်။

J-08



  • VIA