News

POST TYPE

NEWS

တရားခွင်တွင် တရားသူကြီးများ ကျမ်းသစ္စာကျိန်ဆိုရန် ပြည်ထောင်စုတရားစီရင်ရေးဥပဒေ လွှတ်တော်သို့ တင်သွင်း
16-May-2019
နေပြည်တော်၊ မေ ၁၅

တရားခွင်တွင် တရားသူကြီးများ ကျမ်းသစ္စာကို တိကျစွာကျိန်ဆိုရန်အတွက် ပြည်ထောင်စုတရားစီရင်ရေးဥပဒေကို ပြင်ဆင်သည့်ဥပဒေကြမ်းကို ပြည်ထောင်စု တရားလွှတ်တော်ချုပ် တရားသူကြီး ဦးမျိုးတင့်က မေလ ၁၅ ရက်နေ့က ကျင်းပသည့် အမျိုးသားလွှတ်တော်သို့ လာရောက်တင်သွင်းခဲ့သည်။

တရားသူကြီးများ၊ အမှုသည်နှင့် သက်သေများ တရားခွင်တွင် တိကျစွာ ကျမ်းသစ္စာကျိန်ဆိုရန်ကိစ္စကို ဧရာဝတီတိုင်း မဲဆန္ဒနယ် အမှတ် ၁ မှ လွှတ်တော်ကိုယ်စားလှယ် ဦးစိုးမိုးက ဇန်နဝါရီ ၂၃ ရက်က အဆိုတင်သွင်းခဲ့ခြင်းဖြစ်ပြီး ကိုယ်စားလှယ်စုစုပေါင်း ၁၄ ဦးထောက်ခံဆွေးနွေးကာ ဖေဖော်ဝါရီ ၈ ရက်က ကျင်းပသည့် လွှတ်တော်တွင် ထောက်ခံမဲ ၁၆၅ မဲ၊ ကန့်ကွက်မဲ ၉ မဲ၊ ကြားနေမဲ ၃ မဲရှိခဲ့သောကြောင့် အတည်ပြုခဲ့ခြင်းဖြစ်သည်။

ပြည်သူများ ယုံကြည်အားထားပြီး ဖြောင့်မတ်မှန်ကန်သည့် တရားစီရင်ရေး ဖြစ်လာစေရန် တရားသူကြီး၊ အမှုသည်နှင့် သက်သေများ တရားခွင်တွင် ကျမ်းသစ္စာကို တိကျစွာထွက်ဆိုရန်ရည်ရွယ်၍ ယင်း အဆိုကို တင်သွင်းခဲ့ခြင်းဖြစ်ကြောင်း ဦးစိုးမိုးက ပြောကြားသည်။

ယင်းဥပဒေကြမ်းကို စတုတ္ထအကြိမ်မြောက်ပြင်ဆင်ရန် တင်သွင်းခြင်းဖြစ်ပြီး လွှတ်တော်က လက်ခံဆွေးနွေးဆုံးဖြတ်ပေးရန် ပြည်ထောင်စုတရားလွှတ်တော်ချုပ် တရားသူကြီး ဦးမျိုးတင့်က လွှတ်တော်သို့ တင်ပြပြောဆိုခဲ့သည်။

တရားသူကြီးများ နေ့စဉ် တရားခွင် တက်ရန်အပါအဝင် တာဝန်စတင်ဆောင်ရွက်သည့်အချိန်တွင် ကျမ်းသစ္စာပြုရန်အတွက် စီစဉ်ဆောင်ရွက်ရမည်ဖြစ်ပြီး ခြွင်းချက်အနေနှင့် တရားသူကြီးများသည် ဥပဒေတစ်ရပ်ရပ်အရ ကျမ်းသစ္စာပြုရန်ကင်းလွတ်ခွင့်ရှိသူ (ဥပမာ ခရစ်ယာန်ဘာသာဝင် တရားသူကြီး) ဖြစ်ပါက ကတိသစ္စာပြုရမည်ဖြစ်ကြောင်း အမျိုးသားလွှတ်တော်ဥပဒေကြမ်း ကော်မတီက အစီရင်ခံစာ တင်သွင်းထားသည်။

ယင်းဥပဒေကြမ်းအပေါ် ဆွေးနွေးမည့် ကိုယ်စားလှယ်များရှိပါက မေလ ၂၀ ရက်နောက်ဆုံးထား၍ လွှတ်တော်ရုံး ညွှန်ကြားရေးမှူးချုပ်ထံ အမည်စာရင်း တင်သွင်းရမည်ဖြစ်ကြောင်း အမျိုးသားလွှတ်တော်ဥက္ကဋ္ဌ မန်းဝင်းခိုင်သန်းက ကြေညာခဲ့သည်။ 

S-01



  • VIA