News

POST TYPE

NEWS

အကောက်ခွန်သက်သာခွင့်ဆိုင်ရာ ပင်ရင်းသက်သေခံလက်မှတ်များကို အွန်လိုင်းမှစတင်ထုတ်ပေးမည်
16-Mar-2019

ရန်ကုန်၊ မတ် ၁၆

စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက တာဝန်ယူဆောင်ရွက်လျက်ရှိသည့် အကောက်ခွန်သက်သာခွင့်ဆိုင်ရာ ပင်ရင်းသက်သေခံလက်မှတ် (Certificate of Origin – CO) ကို ဧပြီလ ၁ ရက်နေ့မှစကာ အွန်လိုင်းစနစ်ဖြင့်သာ လျှောက်ထားထုတ်ပေးမည်ဖြစ်ကြောင်း ယင်းဝန်ကြီးဌာနထံမှ သိရသည်။

စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနအောက်ရှိ ကုန်သွယ်ရေးဦးစီးဌာနက နိုင်ငံတကာကုန်သွယ်မှုအတွက် စိစစ်ခွင့်ပြုထုတ်ပေးလျက်ရှိသည့် အကောက်ခွန်သက်သာခွင့်ဆိုင်ရာ ပင်ရင်းနိုင်ငံသက်သေခံလက်မှတ် (CO) များကို Online CO Application System တစ်မျိုးတည်းဖြင့်သာ လျှောက်ထားခွင့်ပြုမည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနထံမှ သိရသည်။

ပင်ရင်းသက်သေခံလက်မှတ်များကို www.myanmartradenet.com.mm တွင် ဝင်ရောက်လျှောက်ထားနိုင်မည်ဖြစ်သည်။

“လက်ရှိက နှစ်ခုလုပ်နေရတာ။ Manual (စာရွက်စာတမ်း) နဲ့ သွားလျှောက်တယ်။ Manual နဲ့လက်မှတ်ထိုး ပြီးတဲ့အခါကျမှ အွန်လိုင်းပြန်တင်၊ နှစ်ခုလုပ်နေရတာ။ တစ်ခုတည်းလုပ်တယ်ဆိုရင် ပိုကောင်းတာပေါ့” ဟု ပို့ကုန်၊ သွင်းကုန်လုပ်ငန်းရှင် ဒေါက်တာစိုးထွန်းက သုံးသပ်ပြောကြားထားသည်။

စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက ထုတ်ပေးလျက်ရှိသည့် ပို့ကုန်၊ သွင်းကုန်နှင့်ဆက်စပ်သည့် ဝန်ဆောင်မှုစနစ်များအတွက် ၂၀၁၉ ခုနှစ်အတွင်း ရုံးကိုလူကိုယ်တိုင်လာရောက်ရန်မလိုဘဲ အင်တာနက်ရရှိသည့် မည်သည့်နေရာတွင်မဆို လျှောက်ထားရယူနိုင်မည်ဖြစ်ကြောင်း ယင်းဝန်ကြီးဌာနထံမှ သိရသည်။

လက်ရှိတွင် ပို့ကုန်၊ သွင်းကုန်ကုန်ပစ္စည်းအမည် ၁၂၄ မျိုးနှင့် CMP (အထည်ချုပ်) လိုင်စင်များကို အွန်လိုင်းပေါ်မှလျှောက်ထားရယူနိုင်ပြီဖြစ်ကာ အများစုသည် လူသုံးကုန်၊ စက်ပစ္စည်းနှင့် လယ်ယာထွက်ကုန်ပစ္စည်းများ ဖြစ်ကြောင်း ယင်းဝန်ကြီးဌာနထံမှ သိရသည်။

အွန်လိုင်းမှ လိုင်စင်လျှောက်ထားထုတ်ယူသည့်စနစ်ကို ၂၀၀၄ ခုနှစ်က စတင်ကျင့်သုံးခဲ့ခြင်းဖြစ်ပြီး ၂၀၁၈ နှစ်ကုန်အထိ အွန်လိုင်းပို့ကုန်၊ သွင်းကုန်လိုင်စင်စနစ်ဖြင့် ပို့ကုန်၊ သွင်းကုန်လိုင်စင် ၂၃၂၉၈ စောင်အတွက် အမေရိကန်ဒေါ်လာ ၇ ဘီလီယံကျော်ဖိုးကို အွန်လိုင်းမှ ထုတ်ပေးထားခဲ့ပြီးဖြစ်ကြောင်း ယင်းဝန်ကြီးဌာနထံမှ သိရသည်။

J-11