News

POST TYPE

NEWS

ကုန်ကြွေးနှင့် လုပ်အားခ ကျပ်သိန်းခြောက်ရာနီးပါး ကုမ္ပဏီပိုင်ရှင် လာမရှင်းဟုစွပ်စွဲ
22-Feb-2019


ပုံစာ သတင်းစာရှင်းလင်းပွဲ

မြိတ်၊ ဖေဖော်ဝါရီ ၂၁

တင်ဒါအောင်လုပ်ငန်းများပြီးစီးခဲ့ပြီးဖြစ်သော်လည်း လုပ်အားခနှင့် ကုန်ပစ္စည်းအကြွေး ကျပ်သိန်းခြောက်ရာနီးပါးအား ကုမ္ပဏီပိုင်ရှင်မှ လာရောက်ရှင်းလင်းပေးချေခြင်း မရှိသေးကြောင်း ယင်းကုမ္ပဏီ၏ ထွေထွေမန်နေဂျာနှင့် အလုပ်သမားအချို့က စွပ်စွဲပြောဆိုလိုက်သည်။

ယင်းကိစ္စနှင့်ပတ်သက်၍ V.S.C Group ကုမ္ပဏီ၏ အထွေထွေမန်နေဂျာနှင့် အလုပ်သမား ၁၂ ဦးသည် ဖေဖော်ဝါရီလ ၂၀ ရက်က မြိတ်မြို့နယ်၊ တောင်ရှည်ကျေးရွာအုပ်စု၊ တောင်ညိုကျေးရွာတွင် သတင်းစာရှင်းလင်းပွဲပြုလုပ်ခဲ့သည်။


ပုံစာ - တောင်ရှည်- တောင်ညိုကျေးရွာချင်းဆက်လမ်း

V.S.C Group ကုမ္ပဏီသည် ၂၀၁၇-၂၀၁၈ ဘဏ္ဍာရေးနှစ်တွင် နတလ ရန်ပုံငွေဖြင့် တောင်ရှည်-တောင်ညို ကျေးရွာချင်းဆက်လမ်းနှစ်မိုင်နှင့် ပုလုံး၊ ဘန်မဲ့၊ တက်လက်ငယ်ကျေးရွာတို့တွင် ရေပေးဝေရေးလုပ်ငန်းများကို လုပ်ကိုင်ခွင့်ရရှိခဲ့ကြောင်း ကုမ္ပဏီ၏ အထွေထွေမန်နေဂျာနှင့် အလုပ်သမားများထံမှ သိရသည်။

ယင်းလုပ်ငန်းများကို လုပ်ကိုင်ပြီးစီးသဖြင့် လုပ်ငန်းပြန်လည်အပ်နှံပြီးဖြစ်သော်လည်း လုပ်ငန်းလုပ်ကိုင်ရာတွင် ပါဝင်ခဲ့သူ ၁၂ ဦး၏  လုပ်အားခများနှင့် ကုန်ပစ္စည်းအကြွေး ကျပ် ၅၉၃ သိန်းကျော် ပေးရန် ကျန်ရှိနေကြောင်း ၎င်းတို့က ဆိုသည်။

“ဒီမှာပေးရမယ့် ကုန်ကြွေး လုပ်အားခတွေ ပေးဖို့ခေါ်တာ လုံးဝလာမရှင်းလို့ အခက်အခဲတွေနဲ့ ရင်ဆိုင်နေရပါတယ်”ဟု ကုမ္ပဏီ၏ အထွေထွေမန်နေဂျာ ဦးမျိုးလှိုင်က ပြောသည်။

ယင်းသို့အကြွေးကျန်နေမှုနှင့်ပတ်သက်၍ ဌာနဆိုင်ရာအသီးသီးသို့တိုင်ကြားခဲ့သော်လည်း တရားစွဲရန်သာပြောဆိုခဲ့သည်ဟု ဦးမျိုးလှိုင်က ဆိုသည်။

အဆိုပါကိစ္စနှင့်ပတ်သက်ပြီး VSC Group ကုမ္ပဏီပိုင်ရှင် ဦးမောင်အေးက ၎င်းအနေဖြင့် လမ်းခင်းခဲ့ချိန်က ကျောက်ဖိုးငွေ ပေးရန်ကျန်ရှိသူ နှစ်ဦးသာရှိပြီး ၎င်းတို့နှစ်ဦးအား ငွေတချို့တစ်ဝက်ပေးပြီးဖြစ်ကာ လက်ရှိတွင် တောင်းပန်ထားသည်ဟု ဆိုသည်။

အလုပ်သမားများအတွက် လုပ်ခလစာများကိုလည်း အထွေထွေမန်နေဂျာထံ ထုတ်ပေးထားပြီးဖြစ်ကြောင်း ဦးမောင်အေးက ဆိုသည်။

“စာရင်းမရှိဘောင်ချာမရှိဘဲရှိတဲ့ ဘောင်ချာတွေကိုလည်း ဖျောက်ပစ်ပြီး ကျွန်တော့်မှာ အကြွေးတင်နေပါတယ်လို့ လာပြောလို့မရဘူး”ဟု ၎င်းက ပြောသည်။

အထွေထွေမန်နေဂျာမှ လက်မှတ်ထိုး၍ ယူထားသည့်ငွေစာရင်း အကုန်လုံးမိမိတွင်ရှိပြီး မန်နေဂျာတင်သွင်းသည့် စာရင်းများလွဲချော်နေသည့်အတွက် ရန်ကုန်ရှိစာရင်းစစ်အဖွဲ့ဖြင့် စစ်ဆေးနေကြောင်း ဦးမောင်အေးက ဆိုသည်။

စာရင်းစစ်ဆေး၍ အမှန်တရားပေါ်ပေါက်လာလျှင် အထွေထွေမန်နေဂျာ၏ မဟုတ်မမှန်စွပ်စွဲချက်များနှင့် ပတ်သက်၍ တရားစွဲဆိုရန် ပြင်ဆင်ထားကြောင်း ဦးမောင်အေးက ဆက်လက်ပြောဆိုသည်။

မဇောကျေးရွာအုပ်စု၊ဘန်မဲ့ကျေးရွာမှ ပန်းရံလုပ်ငန်းလုပ်ကိုင်သူ ဦးအေးငယ်ကလည်း ရွာရေကန် ဆောက်လုပ်သည့်လုပ်ငန်းအတွက် ကုမ္ပဏီထံမှ ကျပ်သိန်း ၃၀ ကျော်ရရန်ကျန်ရှိနေပြီး ကုမ္ပဏီပိုင်ရှင်အား ဖုန်းဖြင့်အကြိမ်ကြိမ်ခေါ်၍ တောင်းဆိုသော်လည်း လာရောက်မဖြေရှင်းပေးသည့်အပြင် နောက်ပိုင်းဖုန်းမကိုင်တော့ကြောင်း ပြောဆိုသည်။

“(ကုမ္ပဏီပိုင်ရှင်နှင့် မန်နေဂျာ) နှစ်ယောက်ကြား ဘယ်သူမှန်တယ် ဘယ်သူမှားတယ်လို့ မပြောချင်ဘူး။ ကျွန်တော်ချေးငှားပြီး လုပ်ထားရတဲ့ ငွေတွေအတွက် တစ်လတစ်သိန်း အတိုးဆပ်နေရပါတယ်”ဟု ဦးအေးငယ်က ဆိုသည်။

Dawei Watch

ဓာတ်ပုံ - ကိုဆန်း(Dawei Watch)