News

POST TYPE

NEWS

ပညာရေးဝန်ထမ်းများ အဂတိမလိုက်စားရန်၊ မလျော်သြဇာမသုံးရန် စာထုတ်သတိပေး
17-Jan-2019
ရန်ကုန်၊ ဇန်နဝါရီ ၁၇

ရာထူးတိုးကိစ္စ၊ တင်ဒါကိစ္စ၊ ကျောင်းစစ်ဆေးရေး စသည့်လုပ်ငန်းစဉ်များတွင် ပညာရေးဝန်ထမ်းများအနေနှင့် အဂတိမလိုက်စားရန်၊ မလျော်သြဇာမသုံးရန် ပြီးခဲ့သည့်ရက်ပိုင်းအတွင်းက စာထုတ်၍ သတိပေးထားကြောင်း အခြေခံပညာဦးစီးဌာနထံမှ သိရှိရသည်။

အခြေခံပညာ ဆရာ၊ဆရာမများ၊ ဝန်ထမ်းများအနေနှင့် ဝန်ထမ်းခန့်ထားခြင်း၊ ရာထူးတိုးပြောင်းကိစ္စ၊ အမှုအခင်းကိစ္စများ၊ တင်ဒါလုပ်ငန်းကိစ္စများ၊ စာစီစာကုံး၊ ကဗျာစသည့်ပြိုင်ပွဲများ၊ ဘာသာရပ်စွမ်းရည်ပြိုင်ပွဲများ၊ ကိုယ်ပိုင်ကျောင်းကိစ္စများ၊ ပညာသင်ထောက်ပံ့ကြေးပံ့ပိုးမှုကိစ္စများတွင် လာဘ်ငွေယူခြင်း၊ မလျော်သြဇာသုံးခြင်းမပြုရန် ညွှန်ကြားထားသည်။

ကျောင်းသားများကိုလည်း ကျောင်းခေါ်ကြိမ်မပြည့်ဘဲ စာရင်းသွင်းပြီး စာမေးပွဲဖြေဆိုစေသော ကိစ္စများမရှိစေရန်၊ ကျောင်းစစ်ဆေးရေးများအနေနှင့် ကျောင်းတာဝန်ရှိသူများကို ကျွေးမွေးဧည့်ခံစေခြင်း၊ အခမဲ့ကားအကူအညီတောင်းခြင်း၊ တည်းခိုခ တောင်းခံခြင်းများမပြုလုပ်ရန်လည်း ယင်းဌာနက ထည့်သွင်းညွှန်ကြားထားသည်။

အခြေခံပညာဦးစီးဌာန ဒုတိယညွှန်ကြားရေးမှူးချုပ် ဦးရဲလင်းမြင့်က “ညွှန်ကြားစာထုတ်ထားတယ်ဆိုတာ မှန်ပါတယ်။ ကိုယ့်လူတွေ အမှားမလုပ်မိအောင်လို့ပါ။ တိုင်ကြားထားတဲ့ တိုင်ကြားစာရှိတော့ရှိပါတယ်။ ထုတ်ပြောလို့ မရသေးပါဘူး”ဟု ပြောကြားသည်။

တင်ဒါကိစ္စများတွင် ကျောင်း၊ ရုံးအဆောက်အအုံဆောက်ခြင်း၊ စက်နှင့်ဆက်စပ်ပစ္စည်းများဝယ်ခြင်း၊ သင်ထောက်ကူများ ဝယ်ယူဖြန့်ဖြူးခြင်း၊ ကျောင်းသုံးပုံနှိပ်၊ စာရေးကိရိယာ၊ ကျောင်းဝတ်စုံများ ဝယ်ယူဖြန့်ဖြူးခြင်းနှင့် အခြားလုပ်ငန်းများအတွက် ငွေပေးချေရာတွင် အဂတိမလိုက်စားရန်၊ သမ္မတရုံးညွှန်ကြားချက်ကို ထပ်ဆင့်ညွှန်ကြားခြင်းဖြစ်သည်။

ညွှန်ကြားစာနှင့်ပတ်သက်၍ ရှမ်းပြည်နယ်မှ အလယ်တန်းပြဆရာမတစ်ဦးက နိုင်ငံ့ဝန်ထမ်းဥပဒေ၊ နည်းဥပဒေများတွင်လည်း ထိုအချက်များပြောဆိုထားပြီးဖြစ်ပြီး ညွှန်ကြားစာထုတ်ခြင်းထက် လက်တွေ့ကျကျ ပိုလုပ်စေချင်ကြောင်းနှင့် လာဘ်ယူခြင်း၊ တံစိုးလက်ဆောင်ယူခြင်း၊ မလျော်သြဇာသုံးခြင်းထင်ရှားလျှင် ထိထိရောက်ရောက်အရေးယူရန်သာလိုကြောင်း ပြောဆိုသည်။

“အဂတိကိစ္စ ပြစရာသက်သေမရှိပေမယ့် ရာထူတိုး၊ အပြောင်းအရွှေ့ ပြောစရာအများဆုံးပဲ။ ရာထူးတိုးလျှောက်တဲ့သူ အရည်အချင်းစစ်မှလက်ခံတယ်ဆိုရင် ပိုက်ဆံပေးစရာမလိုဘူး။ အကောင်းအဆိုး၊ အမှားအမှန်ခွဲနိုင်ဖို့ သင်ပေးတဲ့သူတွေ ကိုယ်တိုင်က ပိုက်ဆံပေးပြီးမှ ရာထူးတိုးချင်တာ၊ နေရာပြောင်းချင်တာ၊ မျက်နှာလိုမျက်နှာရလုပ်တယ်ဆိုတာ ရှက်စရာကောင်းတယ်ဆိုတာ ခိုင်မာနေဖို့လိုတာပါ”ဟု ၎င်းက ပြောဆိုသည်။

လာဘ်ငွေယူခြင်း၊ တံစိုးလက်ဆောင်ယူခြင်း၊ လူမှုရေး ပြဿနာဖြစ်ပွားခြင်း စသည့်ကိစ္စများကျူးလွန်လျှင် တာဝန်ရှိလူကြီးများအနေနှင့်ညှာမနေဘဲ ပြည်သူ့မျက်နှာကိုကြည့်၍ ပြတ်ပြတ်သားသားအရေးယူရန် ပညာရေးဝန်ကြီးက နေပြည်တော်တွင်ပြုလုပ်သည့် အခြေခံပညာရေးဖိုရမ်တွင် ပြောကြားခဲ့သေးသည်။

ကျောင်းဖွံ့ဖြိုးရေးရန်ပုံငွေ၊ လစဉ်အသုံးစရိတ်၊ မိဘဆရာအသင်းရန်ပုံငွေများကို ဘဏ္ဍာရေးစည်းမျဉ်းနှင့်အညီသုံးစွဲခြင်းမရှိ၍ ၂၀၁၇ခုနှစ် ဧပြီလမှ နိုဝင်ဘာအထိ ရှစ်လအတွင်း ပညာရေးဝန်ထမ်း ၆၀ ခန့်ကို ရာထူးမှထုတ်ပယ်ခဲ့သည်။ ထို့ပြင် ၂၀၁၈ခုနှစ်အတွင်း လစာငွေပိုထုတ်သော ပညာရေးဝန်ထမ်းများကို ရာထူးလျှော့ခြင်း၊ နေရာပြောင်းခြင်းပြုလုပ်ခဲ့သည်။

J-02