News

POST TYPE

NEWS

ကထိန်မဏ္ဍပ်ထဲ ဗီဒီယိုဖွင့်မကြည့်ရန် ပြောဆိုသူ ဓားဖြင့်ထိုးသတ်ခံရ
18-Nov-2018

ရန်ကုန်၊​ နိုဝင်ဘာ ၁၈ 

လှိုင်မြို့နယ်၊​ (၁) ရပ်ကွက်၊​ ဇေယျသိဒ္ဓိ ၂ လမ်းထိပ်တွင် နိုဝင်ဘာလ ၁၇ ရက် ညပိုင်းက ကထိန်မဏ္ဍပ်အတွင်း ဗီဒီယိုဖွင့်မကြည့်ရန် ပြောဆိုသူ အသက် ၂၂ နှစ် အမျိုးသားတစ်ဦး ဓားဖြင့်ထိုးသတ်ခံရကြောင်း ရဲတပ်ဖွဲ့ထံမှ သိရသည်။

ရင်ညွန့်အောက် ထိုးသွင်းဒဏ်ရာနှစ်ချက်၊ ဘယ်လက်မောင်း ပြတ်ရှဒဏ်ရာတစ်ချက်ဖြင့် သေဆုံးခဲ့သူ ချစ်ကိုကိုမှာ လှိုင်မြို့နယ်အတွင်း အနှေးယာဉ်နင်းသူဖြစ်ပြီး အခင်းဖြစ်ည ၈ နာရီခွဲက ကထိန်မဏ္ဍပ်အတွင်း ဗီဒီယို ထိုင်ကြည့်နေသူများကို ၎င်းက ဗီဒီယိုဖွင့်မကြည့်ရန် ပြောဆိုခဲ့သည်။ 

“သေဆုံးသူက ဆိုက်ကားနင်းတယ်။ လူသတ်မှု ကျူးလွန်သူကလည်း ဆိုက်ကားသမား။ ဆိုက်ကားဂိတ်နားမှာရှိတဲ့ ကထိန်မဏ္ဍပ်နဲ့ မတူတော့ဘူး။ ဗီဒီယိုရုံ ကျနေတာပဲလို့ ပြောဆိုခဲ့တယ်။ ဒါကို ဗီဒီယိုထိုင်ကြည့်နေသူ လေးငါးယောက်က မကျေမနပ်ဖြစ်ပြီး သေဆုံးသူကို ဝိုင်းပြဿနာရှာကြတယ်။ အဲဒီထဲက တစ်ယောက်က ပါလာတဲ့ ဓားနဲ့ထိုးသတ်ခဲ့တယ်။ တရားခံကိုလည်း ဖမ်းမိထားပါပြီ”ဟု ရဲအရာရှိက ရှင်းပြသည်။

ဓားဖြင့်ထိုးသတ်ခံရသူ အနှေးယာဉ်နင်း ချစ်ကိုကို၏ရုပ်အလောင်းကို အင်းစိန်ဆေးရုံသို့ပို့အပ်ပြီး ဓားဖြင့်ထိုးသူဟု တိုင်ကြားခံရသူ အနှေးယာဉ်နင်း အသက် ၂၄ နှစ် အေးမင်းထွဋ်ကိုဖမ်းဆီး၍ လှိုင်မြို့မ ရဲစခန်းက (ပ) ၁၀၂၅/၁၈၊ ရာဇသတ်ကြီး ပုဒ်မ ၃၀၂ ဖြင့် အမှုဖွင့်အရေးယူထားသည်။ 

S-03