News

POST TYPE

NEWS

မွန်ပါတီများပေါင်းစည်းခွင့် ယခုလလယ် ရွေးကောက်ပွဲကော်မရှင်ထံတင်မည်
05-Nov-2018

မော်လမြိုင်၊ နိုဝင်ဘာ ၃

မွန်နိုင်ငံရေးပါတီများ ပေါင်းစည်းခွင့်ကို ယခုလ ၁၅ ရက်နေ့ နောက်ဆုံးထား၍ ရွေးကောက်ပွဲ ကော်မရှင်ထံ တင်ပြမည်ဖြစ်ကြောင်း မွန်ပါတီ၏ တွဲဖက်အတွင်းရေးမှူး (၁) နိုင်လယီတမက ပြောကြားသည်။

မွန်ပါတီ၏ ဗဟိုအလုပ်အမှုဆောင်ကော်မတီ အစည်းအဝေးကို နိုဝင်ဘာလ ၃ ရက်နေ့က ပထမဆုံးအကြိမ် ပြုလုပ်ခဲ့ရာ၌ ၎င်းက ပြောဆိုလိုက်ခြင်းဖြစ်သည်။ 

“အခု မွန်ပါတီ ဗဟိုအလုပ်အမှုဆောင်ကော်မတီ အစည်းအဝေးက ပထမဆုံးအကြိမ် အစည်းအဝေး၊ အဓိကတော့ ပါတီပေါင်းစည်းခွင့်ကို နိုဝင်ဘာလ ၁၅ ရက်နေ့ နောက်ဆုံးထားပြီး ကော်မရှင်ထံတင်ပြဖို့ ဆုံးဖြတ်ထားတယ်”ဟု နိုင်လယီတမက ပြောကြားသည်။

ပါတီပေါင်းစည်းခွင့် ကျလာပြီးမှသာလျှင် ပါတီမှတ်ပုံတင်ရေး ကိစ္စရပ်များကို ပြုလုပ်ရမည်ဖြစ်ကြောင်း၊ ယင်းမတိုင်မီ ပါတီအလုပ်အမှုဆောင် ကော်မတီဝင်များစာရင်း၊ ပါတီအလံ၊ ပါတီတံဆိပ်စသည့်အချက်များကို တင်ပြရမည်ဖြစ်ကြောင်း ၎င်းကရှင်းပြသည်။

ပထမအကြိမ် မွန်ပါတီ ဗဟိုအလုပ်အမှုဆောင် အစည်းအဝေး၌ ဆုံးဖြတ်ချက်သုံးရပ်ချမှတ်ခဲ့ရာတွင် ကော်မရှင်ထံသို့ ပါတီပေါင်းစည်းခွင့် တင်ခြင်းကိစ္စရပ်မှာ အဓိကအချက်ဖြစ်ကြောင်း၊ ဒုတိယအချက်မှာ ပါတီဖွဲ့စည်းပုံအခြေခံ စည်းမျဉ်းမူကြမ်း ရေးဆွဲရေး ငါးဦးကော်မတီဖွဲ့စည်း၍ တာဝန်ပေးအပ်ခြင်းနှင့် ထိုမူကြမ်းကို လာမည့်ပါတီဗဟိုကော်မတီအစည်းအဝေးတွင် အတည်ပြုရန်၊ တတိယအချက်မှာ ဗဟိုအဆင့် ပေါင်းစည်းလိုက်ပြီဖြစ်၍ အောက်ခြေအဆင့် ပါတီဝင်များ ပေါင်းစည်းနိုင်ရေး အဖွဲ့ခြောက်ဖွဲ့ခွဲကာ ဒေသခြောက်ခုသို့ဆင်း၍ အောက်ခြေပေါင်းစည်းရေး အကောင်အထည်ဖော်ရန်တို့ကို ဆုံးဖြတ်ခဲ့သည်။ 

“ဒေသခြောက်ခုဆိုတာက ဆက်စပ်နေတဲ့မြို့နယ်တွေကို ဒေသတစ်ခုအနေနဲ့ ပေါင်းလိုက်မယ်။ အဲ့ဒီအစီအစဉ်ကိုတော့ ဒီလ ၂၄ ရက်နေ့မှာ လုပ်မယ့်အစည်းအဝေး ပြီးတာနဲ့ စလုပ်မယ်”ဟု နိုင်လယီတမက ထပ်မံ ပြောဆိုသည်။

တနင်္သာရီဒေသအဖြစ် ရေး၊ သံဖြူဇရပ်၊ မုဒုံ၊ ချောင်းဆုံ၊​ ဘုရားသုံးဆူတို့ ပါဝင်နေပြီး မော်လမြိုင်ဒေသအဖြစ် မော်လမြိုင်၊ ချောင်းဆုံ၊​ ကျိုက်မရော၊​ ကျိုက်ထိုဒေသအဖြစ် ကျိုက်ထိုနှင့် ပေါင်၊ ရန်ကုန်ဒေသအဖြစ် ရန်ကုန်နှင့် ပဲခူး၊ ကောကရိတ်ဒေသအဖြစ် ကောကရိတ်နှင့် မြဝတီဟူ၍ ခွဲခြားထားသည်။

မွန်ပါတီကို မွန်အမျိုးသားပါတီ၊ မွန်ဒေသလုံးဆိုင်ရာ ဒီမိုကရေစီပါတီနှင့် မွန်အမျိုးသားကိုယ်စားပြုပါတီ တည်ထောင်လိုသူများနှင့် ပါတီပြင်ပနိုင်ငံရေး စိတ်ပါဝင်စားသူများဖြင့် ပူးပေါင်းထားခြင်းဖြစ်သည်။

R-21