News

POST TYPE

NEWS

မန္တလေးတက္ကသိုလ်ဝင်ခွင့် ထပ်မံလျှောက်ထားနိုင်
21-Sep-2018
မန္တလေး၊ စက်တင်ဘာ ၂၁

မန္တလေးတက္ကသိုလ်၏ ၂၀၁၈-၂၀၁၉ ပညာသင်နှစ် ပထမနှစ်သင်တန်းသို့ ဝင်ခွင့်လျှောက်ထားခဲ့ပြီး မရရှိသူများအနေနှင့် ထပ်မံလျှောက်ထားနိုင်ကြောင်း အဆိုပါတက္ကသိုလ်မှ သိရသည်။

ဝင်ခွင့်လျှောက်ထားခြင်းကို ဇွန်လ ၁၅ ရက်မှ ဇူလိုင်လ ၁၅ ရက်အထိ လက်ခံခဲ့ခြင်းဖြစ်ပြီး ဝင်ခွင့်ရရှိသူများစာရင်းကို စက်တင်ဘာလ၊ ၁၇ ရက်တွင် ထုတ်ပြန်ကြေညာခဲ့ခြင်းဖြစ်ကာ အဆိုပါစာရင်းတွင် မပါရှိသူများအနေဖြင့် စက်တင်ဘာလ၊ ၂၇ ရက်နောက်ဆုံးထားကာ လျှောက်ထားနိုင်ခြင်းဖြစ်သည်။

“တချို့က မှားယွင်းလျှောက်ထားခဲ့တာတွေရှိတယ်။ မှားယွင်းလျှောက်ထားခဲ့တော့ သတ်မှတ်ထားတဲ့အမှတ်ကို မမီတာတွေရှိတယ်။ မမီတဲ့အခါကျတော့ ကပ်လွဲကပ်လွဲသွားတာတွေရှိတယ်။ ဘာသာရပ်အလိုက် သတ်မှတ်ထားတဲ့အမှတ်တွေနဲ့က လွတ်သွားတာကိုး။ မရတာ။ အဲ့ဒါကြောင့် အဲလိုမျိုးလွဲချော်သွားလို့ ကျန်ခဲ့တယ်ဆိုရင် မန္တလေးတက္ကသိုလ်ကို လျှောက်ထားတဲ့သူတွေကို မနစ်နာစေချင်လို့ ပြန်လျှောက်ပေါ့” မန္တလေးတက္ကသိုလ်၊ ဒုတိယပါမောက္ခချုပ် ဒေါက်တာတင်ထွန်းအောင်က ပြောဆိုသည်။

ဘာသာရပ်ပေါင်း ၂၄ မျိုးရှိသည့်အနက် မြန်မာ၊ ပထဝီ၊ သမိုင်း၊ ဒဿနိကဗေဒ၊ ဥပဒေပညာ၊ အရှေ့တိုင်းပညာ၊ နိုင်ငံတကာဆက်ဆံရေးပညာ၊ မနုဿဗေဒ၊ ရှေးဟောင်းသုတေသနပညာ၊ နိုင်ငံရေးသိပ္ပံ၊ ပတ်ဝန်းကျင်ဆိုင်ရာလေ့လာမှုပညာ၊ ရူပဗေဒ၊ သင်္ချာ၊ သတ္တဗေဒ၊ ရုက္ခဗေဒ၊ ကုန်ထုတ်ဓာတုဗေဒ၊ ကွန်ပျူတာသိပ္ပံ၊ ဇီဝဓာတုဗေဒ၊ အဏုဇီဝဗေဒနှင့် မြန်မာမှုပညာဘာသာရပ်များကို လျှောက်ထားနိုင်ခြင်းဖြစ်သည်။

နောက်ဆက်တွဲဝင်ခွင့်ရရှိသူများစာရင်းကို အောက်တိုဘာလ၊ ၅ ရက်တွင် ထုတ်ပြန်ကြေညာမည်ဖြစ်ပြီး အသေးစိတ်သိရှိလိုပါက ဌာနမှူး (သင်တန်းရေးရာ) ဖုန်း ၀၂-၂၈၃၂၁၂၉ နှင့် ကျောင်းသားရေးရာဌာန၏ ၀၉- ၄၀၀၀၀၉၅၃၆ ကို ဆက်သွယ်စုံစမ်းနိုင်သည်။

လက်ရှိတွင် ဝင်ခွင့်ရရှိသူများအနေဖြင့် အောက်တိုဘာလ၊ ၁၇ ရက်အထိ ကျောင်းအပ်နှံနိုင်ပြီဖြစ်ကြောင်း၊ ကျောင်းအပ်နှံခြင်းမရှိသော ကျောင်းသား၊ ကျောင်းသူများကို ကျောင်းဝင်ခွင့်စာရင်းများမှ ပယ်ဖျက်မည်ဖြစ်ကြောင်း၊ ဝင်ခွင့်ရရှိထားသူများအနေဖြင့် သင်ကြားမည့်အဓိကဘာသာရပ် ပြောင်းချင်ပါက ကျောင်းကို အရင်အပ်နှံရန်လိုအပ်ကြောင်း အဆိုပါတက္ကသိုလ်မှ သိရသည်။

“ပထမအဆင့် ကျောင်းအပ်ရမယ်။ ကျောင်းအပ်ပြီးပြီဆိုမှ ကျောင်းတွင်း မေဂျာပြောင်းကို လျှောက်ရမယ်”ဟု ဒေါက်တာတင်ထွန်းအောင်က ပြောဆိုသည်။

M-07


  • VIA