News

POST TYPE

NEWS

သရဲခြောက်သည်ဆိုသော ဆောက်လက်စတိုက်ကို ရဲစစ်ဆေး
10-Aug-2018



ရန်ကုန်၊ ဩဂုတ် ၉

တောင်ဥက္ကလာပမြို့နယ် ၁၀ ရပ်ကွက်၊ အဿက ၂၆ လမ်းရှိ သရဲခြောက်သည်ဟု နာမည်ကြီးနေသော ဆောက်လက်စနှစ်ထပ်တိုက်ကို စစ်ဆေးမည်ဖြစ်ပြီး မှန်ကန်မှုမရှိပါက အရေးယူမည်ဖြစ်ကြောင်း တောင်ဥက္ကလာပမြို့နယ် ရဲတပ် ဖွဲ့မှ နယ်ထိန်းဖြစ်သူ တပ်ကြပ်ကျော်မင်း လှိုင်က ပြောကြားသည်။

ဖြစ်စဉ်မှာ ဩဂုတ်လ ၈ ရက်နေ့ ည ၇ နာရီခန့်တွင် အဆိုပါဆောက်လက်စ နှစ်ထပ်တိုက်ပေါ်မှ ဆောက်လုပ်ရေးသုံး ပစ္စည်းများဖြစ်သော အုတ်ကျိုးများ၊ ဘလောက်တုံးများနှင့် ပျဉ်ချောင်းများကို အလုပ်သမားများနေထိုင်ရာ ယာယီတဲပေါ်သို့ ပစ်ချခြင်း၊ တိုက်ပေါ်တွင် ယင်းပစ္စည်းများဖြင့် ပစ်ပေါက်ခြင်းများကို ပြုလုပ်ခဲ့သဖြင့် မြို့နယ်ရဲတပ်ဖွဲ့၊ အုပ်ချုပ်ရေးမှူးနှင့် ရပ်ကွက်နေပြည်သူများ လာရောက်ကြည့်ရှုခဲ့ကြောင်း ယင်းတိုက်ကိုဆောက်နေသည့် အလုပ်သမားများထံမှ သိရသည်။

“ဖြစ်စဉ်ဖြစ်တဲ့ ၈ ရက်နေ့ညကတော့ လူကြီးတွေနဲ့လာကြည့်တယ်။ ဘာဖြစ်လဲဆိုတာတော့ ရုံးမှာ သူတို့ကိုခေါ်ပြီး မေးမြန်းတယ်။ စုံစမ်းစစ်ဆေးမယ်။ မှန်တယ်ဆိုရင်လည်း မှန်တယ်။ မမှန်ဘူးဆိုရင်လည်း အရေးယူမယ့်သဘောရှိတယ်။ အခုက ကိုယ်လည်း သေချာမတွေ့ရတော့ ဘာမှန်းလည်း မသိဘူး။ ရဲတပ်ဖွဲ့က သွားရောက်စစ်ဆေးခဲ့တယ်”ဟု တပ်ကြပ်ကျော်မင်းလှိုင်က ဆိုသည်။

ဆောက်လက်စတိုက်မှာ နှစ်ထပ်စတင်ပြီး ကျောက်လောင်းသည့် ပထမနေ့ဖြစ်သည့် ဩဂုတ်လ ၇ ရက်၊ ည ၇ နာရီ တွင် အုတ်ခဲဖြင့် သုံးချက်ပစ်ခဲ့ပြီး ဩဂုတ်လ ၈ ရက်၊ ည ၇ နာရီ မှ ၁၀ နာရီကျော်အထိ အုတ်ခဲကျိုး၊ ဘလောက်တုံးများ၊ ပျဉ်ချောင်းများဖြင့် ထပ်မံပစ်ခဲ့ကြောင်း အလုပ်သမားခေါင်းဆောင်က ပြောကြားသည်။

ဖြစ်စဉ်ဖြစ်ပွားသည့် နှစ်ရက်လုံးတွင် ယင်းတိုက်တွင် ဆောက်လုပ်နေသည့် အလုပ်သမား အမျိုးသားငါးဦးနှင့် အမျိုးသမီးတစ်ဦး နေထိုင်လျက်ရှိကြောင်း အလုပ်သမားခေါင်းဆောင်ဖြစ်သူ ကိုဇော်မင်းဦးက ဆိုသည်။

“ဩဂုတ်လ ၈ ရက်နေ့ ည ၇ နာရီ လောက်ကစပြီး ပျဉ်တွေ၊ ဘလောက်တုံးတွေနဲ့ ခေါင်မိုးတွေပေါ်ပစ်တော့ ဘေးတွေက ပစ်တယ်ထင်ပြီး လိုက်ကြည့်တော့ မတွေ့ဘူး။ ဆောက်နေတဲ့ ၃ လအတွင်း မခြောက်သေးဘူး။ ဒုတိယထပ်စတဲ့ တိုင်ထောင်တဲ့နေ့က ကျောက်လောင်းပြီး စခြောက်တော့တာပဲ။ ည ၁၀ နာရီကျော်လောက်အထိ ခေါင်မိုးတွေပေါ်ကို သစ်သားချောင်းတွေနဲ့ တော်တော်ဆူဆူညံညံ ပစ်တယ်။ ပရိတ်ရေတွေဖျန်းပြီး တောင်းပန်လိုက်တော့ မပစ်တော့ဘူး။ အထဲက အတွင်းပစ္စည်းတွေနဲ့ပဲပစ်တာ။ ပထမလူကြီးတွေကပြောတော့ အိမ်ရှင်ငါးဦးလောက် ပြောင်းတယ်။ မနေရဲလို့ ပြောင်းကြတယ်ပြောတယ်”ဟု ၎င်းက ဆိုသည်။

ဩဂုတ်လ ၉ ရက် ညနေပိုင်းတွင် အိမ်ရှင်များက ဘုန်းကြီးများပင့်ကာ ပရိတ်တရားများ ရွတ်ဖတ်မည်ဖြစ်ပြီး ယင်းပရိတ်တရားများ ရွတ်ပြီး ဆက်လက်ဖြစ်ပွားနေပါက အလုပ်သမားများမှာ ဆောက်လက်စတိုက်တွင် ညအိပ်တော့မည် မဟုတ်တော့ကြောင်း ၎င်းက ဆိုသည်။

“ပထမပစ်တာ အချင်းချင်းနောက်နေတယ် ထင်တာ။ နောက်တော့မှ သရဲခြောက်မှန်းသိတယ်။ ကျွန်တော်တို့က တောသားတွေဆိုတော့ မလိမ်တတ်ဘူး။လူထိခိုက်တာတော့မရှိဘူး။ ရပ်ကွက်ကတော့ ပရိတ်တရားနာဖို့ မှားတာရှိရင် တောင်းပန်ဖို့ပြောတယ်။ ကိုယ်တွေကတော့ အမှားမလုပ်တော့ ဘယ်လိုလုပ်ရမှန်းကို မသိဘူး။ ရပ်ကွက်ကတော့ စလုပ်တော့ ဝက်သားမစားနဲ့ အမဲသားမစားနဲ့ သတိပေးတယ်။ ဒီမှာတော့ မစားဘူး။ အပြင်မှာတော့ စားတယ်။ ဩဂုတ်လ ၉ ရက်မှာ အလုပ်အားတယ်။ ပရိတ်တရားနာပြီးမှ အလုပ်ဆက်လုပ်မယ်”ဟု အလုပ်သမားဖြစ်သူ ကိုအောင်ကိုဝင်းက ဆိုသည်။

ယခုလက်ရှိ အိမ်ပိုင်ရှင်မှာ ငါးယောက်မြောက်ဖြစ်ပြီး ယခုတိုက်မဆောက်မီ ယခင်က တစ်ထပ်အုတ်ခံပျဉ်ထောင်အိမ် တည်ဆောက်ထားကြောင်းနှင့် ယခုတည်ဆောက်မှုကို ၂၀၁၈ ခုနှစ်၊ ဧပြီလက စတင်ခဲ့ပြီး နိုဝင်ဘာလတွင် ဆောက်လုပ်မှုပြီးစီးမည်ဟု ခန့်မှန်းထားကြောင်း ၎င်းက ဆိုသည်။

“ဒီတိုက်နေရာက နှစ်ပေါင်း အတော်ကြာပြီ။ လမ်းထောင့်မှာရှိတော့ သူ့တိုက်ကို သေးလာပေါက်တဲ့သူတွေ၊ တိုက်ရှေ့ကနေ အမဲသား၊ ဝက်သားယူသွားတဲ့သူတွေဆို သရဲခြောက်ခံထိတယ်။ အိမ်ကို နှစ်ထပ်တင်ဆောက်လို့ မရဘူးလို့ ကြားသိရတယ်။ ဒီရပ်ကွက်မှာ နေထိုင်သူ တော်တော်များများတော့ ဒီအိမ်အကြောင်း သိကြတယ်”ဟု ယင်း ၁၀ ရပ်ကွက်အတွင်း နေထိုင်သူ ဦးဇော်က ၎င်း၏ အတွေ့အကြုံကို ပြောကြားသည်။  

J-10