News

POST TYPE

NEWS

အိန္ဒိယအစိုးရက တရားမဝင် ရွှေ့ပြောင်းဘင်္ဂါလီ ၄ သန်း၏ နိုင်ငံသားဖြစ်ခွင့်ကိုငြင်းပယ်
30-Jul-2018


နယူးဒေလီ၊ ဇူလိုင် ၃၀

အိန္ဒိယအစိုးရက နိုင်ငံသားမှတ်ပုံ တင်စာရင်း (NRC) ကိုထုတ်ပြန်ခဲ့ခြင်းဖြင့် စာရင်းတွင် မပါဝင်သော နိုင်ငံအရှေ့မြောက်ပိုင်း အာသံပြည်နယ်ရှိ တရားမဝင်ရွှေ့ပြောင်း ဘင်္ဂါလီ ၄ သန်း၏ နိုင်ငံသားဖြစ်ခွင့်ကို ငြင်းပယ်လိုက်ကြောင်း BBC သတင်းက ဖော်ပြသည်။

ဘင်္ဂလားဒေ့ရ်ှက ပါကစ္စတန်မှခွဲထွက်ပြီး လွတ်လပ်ရေးမကြေညာမီ တစ်ရက်အလို ၁၉၇၁ ခုနှစ် မတ်လ ၂၄ ရက်နေ့မတိုင်မီ အာသံပြည်နယ်သို့လာရောက်ကြောင်း သက်သေပြနိုင်သူများကိုသာ အစိုးရက စာရင်းတွင်ထည့်သွင်းခဲ့ခြင်းဖြစ်သည်။

ယခုအစီအစဉ်သည် အုံနှင့်ကျင်းနှင့်ရှိနေသော တရားမဝင် ဘင်္ဂါလီရွှေ့ပြောင်းများကိုဖယ်ရှားရန်ဖြစ်သည်ဟု အိန္ဒိယကထုတ်ပြန်ထားသည်။ မငြိမ်မသက်မှုများ ဖြစ်လာနိုင်သောကြောင့် လက်ရှိအချိန်အထိ မည်သူ့ကိုမျှ ချက်ချင်းနှင်ထုတ်ရန် အစီအစဉ်မရှိသေးကြောင်း တာဝန်ရှိသူများက ထုတ်ပြန်ထားသည်။

အချိန်ယူရမည့် အယူခံဝင် အသနားခံမှုလုပ်ငန်းစဉ်ကို လူတိုင်းလျှောက်ထားခွင့်ရှိမည်ဖြစ်သည်ဟု တာဝန်ရှိသူများက ပြောကြားထားသည်။ သို့သော်လည်း ၎င်းတို့၏ နိုင်ငံသားဖြစ်ခွင့်အတွက် နောက်ဆုံး ဆုံးဖြတ်ချက်မကျမီ သန်းနှင့်ချီသော မိသားစုများ အတိဒုက္ခရောက်ရဖွယ် ရှိနေသည်။

ဘင်္ဂလားဒေ့ရ်ှက ပါကစ္စတန်မှခွဲထွက်ကာ လွတ်လပ်ရေးကြေညာခဲ့ပြီးနောက် လူသိန်းနှင့်ချီပြီး အိန္ဒိယနိုင်ငံသို့ ထွက်ပြေးခဲ့ကြကာ စစ်ပွဲလည်းဖြစ်ပွားခဲ့သည်။ ၎င်းတို့အထဲမှ အများစုမှာအာသံပြည်နယ်တွင် နေထိုင်ခဲ့ကြသည်။ ယခုအခါ အာသံပြည်နယ်တွင် လူဦးရေသန်း ၃၀ မျှရှိနေပြီး ၄ သန်းခန့်မှာ ယင်းတို့နှင့် အဆက်အနွှယ်များဖြစ်သည်။

စစ်မဖြစ်မီ အိန္ဒိယနိုင်ငံနယ်နိမိတ်အတွင်း ရောက်ရှိလာသူများကိုသာ နိုင်ငံသားအဖြစ် အသိအမှတ်ပြုမည်ဟု အိန္ဒိယ အစိုးရက ကြေညာထားသည်။

ယခုအစီအစဉ်အရ စစ်မဖြစ်မီအချိန်ကတည်းက ရောက်လာသူများပါ အထောက်အထား မပြည့်စုံလျှင် နိုင်ငံသားဖြစ်ခွင့်၊ မြေပိုင်ခွင့်၊ မဲပေးခွင့်၊ လွတ်လပ်စွာ သွားလာခွင့်များ ရုပ်သိမ်းခံရမည်ကို စိုးရိမ်နေကြ ကြောင်း BBC သတင်းဌာနကဖော်ပြသည်။

၁၉၈၅ ခုနှစ်တွင် ဝန်ကြီးချုပ် ရာဂျစ်ဂန္ဒီ လက်မှတ်ရေးထိုးခဲ့သော အာသံသဘောတူညီချက်အရ ၁၉၇၁ ခုနှစ် မတ်လ ၂၄ ရက်နေ့တွင် အာသံနယ်သို့ ရောက်ရှိလာသည်ဟု သက်သေမပြနိုင်သူများကို မဲပေးပိုင်ခွင့်ရှိသူစာရင်းမှ ထုတ်ပယ်ရမည်ဖြစ်ပြီး နိုင်ငံတွင်းမှ နှင်ထုတ်ရမည်ဖြစ်သည်။

ဘင်္ဂါလီအခွင့်အရေး လှုပ်ရှားသူများကမူ ယခု အမျိုးသားမှတ်ပုံတင်စာရင်းသည် မွတ်ဆလင်အများစုဖြစ်သော ဘင်္ဂါလီများကိုနှိပ်ကွပ်ရန် ဟိန္ဒူအမျိုးသားရေးဝါဒီများနှင့် အာသံဒေသခံ သဘောထားတင်းမာသည့်အုပ်စုများ၏ အစီအစဉ်များအနက်မှ ပထမခြေလှမ်းသာဖြစ်သည်ဟု ဝေဖန်ထားသည်။

ဘင်္ဂလားဒေ့ရ်ှနိုင်ငံမှ တရားမဝင် ခိုးဝင်လာသူများသည် အာသံရှိနယ်ခံ ဘင်္ဂါလီများနှင့် ရောနှောနေထိုင်ပြီး မျက်စိရှေ့မှောက်တွင်ပင် စာရွက်စာတမ်းအတုလုပ်ကာ အပျောက်ရိုက်နေကြသောကြောင့် စာရွက်စာတမ်းများကို စနစ်တကျ စိစစ်ဖော်ထုတ်ရန် လိုသည်ဟု တာဝန်ရှိသူများက ထုတ်ပြန်ထားသည်။

ဘင်္ဂါလီအခွင့်အရေးလှုပ်ရှားသူ နဇ် ရူလ်အလီအာမက်က “ဒါ (NRC) ဟာ ရက်စက်ယုတ်မာတဲ့ လုပ်ရပ်တွေလုပ်ဖို့ လျှို့ဝှက်ပူးပေါင်းကြံစည်မှုကြီးပါ။ သူတို့တွေက မွတ်ဆလင်တွေကိုရှင်းဖို့ ပြောင်ပြောင်တင်းတင်း ခြိမ်းခြောက်လိုက်တာပဲ။ မြန်မာပြည်မှာ ရိုဟင်ဂျာ (မူရင်းအသုံးအနှုန်းအတိုင်း)တွေ ဖြစ်ခဲ့သလိုပဲ ဒီမှာလည်း ဖြစ်လာတော့မယ်”ဟု ဝေဖန်ခဲ့သည်။

ဝန်ကြီးချုပ် နာရိန္ဒြာမိုဒီကမူ နိုင်ငံသားမှတ်ပုံတင်ခြင်းသာ နိုင်ငံရေးနှင့်မဆိုင်ဘဲ တရားရုံးချုပ်က ကြီးကြပ်ကွပ်ကဲသော လုပ်ငန်းစဉ်သာဖြစ်သည်ဟု ပြောကြားထားသည်။

F-03