News

POST TYPE

NEWS

ဆော်ဒီ အမျိုးသမီးအရေးလှုပ်ရှားသူများကို ဖမ်းဆီးမှု လူ့အခွင့်အရေးအုပ်စုများ ရှုတ်ချ
21-May-2018



ရီယာ့ဒ်၊ မေ ၂၀

ဆော်ဒီအာရေဗီးယားနိုင်ငံတွင် အမျိုးသမီးအရေးလှုပ်ရှားသူများကို သစ္စာဖောက်များအဖြစ်စွပ်စွဲကာ ဖမ်းဆီးခဲ့ခြင်းကြောင့် ဆော်ဒီအစိုးရ၏ ပြုပြင်ပြောင်းလဲရေးအစီအစဉ်ကို နိုင်ငံတကာ လူ့အခွင့်အရေးအုပ်စုများက မေးခွန်းထုတ်လိုက်ကြသည်ဟု DW သတင်းတွင် ဖော်ပြထားသည်။

နိုင်ငံတည်ငြိမ်အေးချမ်းမှုနှင့် အမျိုးသားစည်းလုံးညီညွတ်မှုကို ထိခိုက်ပျက်ပြား စေရန်ကြိုးစားမှုဖြင့် စွပ်စွဲကာ ဖမ်းဆီးထိန်းသိမ်းထားသူ ၇ ဦးကို လွှတ်ပေးရန် ဆော်ဒီအာဏာပိုင်များကို Amnesty International လူ့အခွင့်အရေးအုပ်စုက တောင်းဆိုခဲ့သည်။

ဆော်ဒီအာရေဗီးယားသည် လွတ်လပ်စွာ ပြောဆိုခွင့်၊ သင်းပင်းဖွဲ့စည်းခွင့်၊ စုဝေးခွင့်များကို ငြိမ်းချမ်းစွာ ကျင့်သုံးနိုင်ရေးအတွက် ကြိုးစားသော အမျိုးသမီးအခွင့်အရေး လှုပ်ရှားသူများကို ပစ်မှတ်ထားနေသရွေ့ အမျိုးသမီးအခွင့်အရေးနှင့် အခြားပြုပြင်ပြောင်းလဲမှုများကို လူသိရှင်ကြား ဆက်လက်အားပေးမှုမရှိနိုင်ဟု  Amnesty International ၏ အရှေ့အလယ်ပိုင်းဆိုင်ရာ ဒါရိုက်တာ ဆာမန်ဟာဒစ်က ပြောဆိုသည်။

ဖမ်းဆီးထိန်းသိမ်းခံရသူများသည် နိုင်ငံခြားအသင်းအဖွဲ့များနှင့် သံသယဖြစ်ဖွယ် ဆက်သွယ်ခြင်း၊ ပြည်ပရှိ ရန်လိုသော အဖွဲ့အစည်းများကို ငွေကြေးအကူအညီပေးခြင်းနှင့် အစိုးရလုပ်သားများကို စုဆောင်းခြင်းတို့ကို ပြုလုပ်ခဲ့သည်ဟု ဆော်ဒီအာဏာပိုင်များက ဆိုသည်။

ဖမ်းဆီးခံရသူသော အမျိုးသားများနှင့် အမျိုးသမီးများသည် ဆော်ဒီတွင် နှစ်ပေါင်းများစွာ ပိတ်ပင်ထားသည့် အမျိုးသမီးများ ကားမောင်းခွင့်ရရှိရေးကို လှုံ့ဆော်ခဲ့ကြသူများဖြစ်သည်။ ဇွန်လ ၂၄ ရက်တွင် စတင်သက်ရောက်မည့် အမျိုးသမီးများ ကားမောင်းခွင့် ပိတ်ပင်မှုရုပ်သိမ်းခြင်း ဆုံးဖြတ်ချက်သည် ဆော်ဒီအိမ်ရှေ့မင်းသား ဘင်ဆော်လ်မန်၏ တိုးတက်ပြောင်းလဲရေး အစီအစဉ်တစ်ရပ်ဟု ရှုမြင်ကြသည်။

ယခုဖမ်းဆီးမှုနှင့်ပတ်သက်၍ ဆော်ဒီမီဒီယာတွင် ဖော်ပြချက်သည် လူ့အခွင့်အရေး လှုပ်ရှားသူများအား ကြောက်ရွံ့စေရန်နှင့် သိက္ခာညစ်နွမ်းစေရန် ရည်ရွယ်သော လုပ်ကြံစွပ်စွဲမှုတစ်ခုဖြစ်ပြီး ဆော်ဒီရှိ အမျိုးသမီးလူ့အခွင့်အရေး လှုပ်ရှားသူများအတွက် စိုးရိမ်ဖွယ်ဖြစ်ရပ်တစ်ခုဟု Amnesty International က ဝေဖန်ပြောကြားသည်။

Human Rights Watch အုပ်စုကလည်း ဆော်ဒီအိမ်ရှေ့စံ၏ ပြုပြင်ပြောင်းလဲရေးအစီအစဉ်သည် ဆော်ဒီနိုင်ငံအတွင်းရှိ အမျိုးသမီးအရေးနှင့် လူ့အခွင့်အရေးအတွက် လူသိရှင်ကြား စည်းရုံးလှုံ့ဆော်ရန် သတ္တိရှိသူ အစစ်အမှန် ပြုပြင်ပြောင်းလဲရေးသမားများကို ကြောက်လန့်တကြား တုံ့ပြန်လိုက်သည့် အစီအစဉ်ဖြစ်သည်ဟု သုံးသပ်ပြောကြားသည်။

“အိမ်ရှေ့မင်းသားရဲ့ ပြုပြင်ပြောင်းလဲရေးအစီအစဉ်နဲ့ပတ်သက်လို့ သံသယရှိကြောင်း ထုတ်ဖော်ပြောဆိုသူ မှန်သမျှ ထောင်ချခံရမယ်လို့ အသိပေးတယ်ဆိုတာ ရှင်းနေပါတယ်” ဟု Human Rights Watch မှ အရှေ့အလယ်ပိုင်း ဒါရိုက်တာ ဆာရာလီးဝှိုက်ဆန်က မှတ်ချက်ပေးသည်။

ဆော်ဒီဘုရင့်နိုင်ငံတွင် တားမြစ်ထားသော စည်းရုံးလှုပ်ရှားမှုဝါဒကို အားပေးရာရောက်မှုကို အာဏာပိုင်များက ရှောင်ရှားလိုခြင်းဖြစ်သည်ဟု သုံးသပ်မှုများလည်း ရှိသည်။

“ဒီ စည်းရုံးလှုပ်ရှားသူတွေ ကျူးလွန်ခဲ့တဲ့ တစ်ခုတည်းသောရာဇဝတ်မှုက မင်းသားဘင်ဆော်လမန် မလုပ်ဆောင်ခင်မှာ အမျိုးသမီးကားမောင်းခွင့်ကို လှုံ့ဆော်ခဲ့တာပါ” ဟု ဆာရာလီးဝှိုက်စတန်က ပြောကြားသည်။

ထို့ပြင် အမျိုးသမီးများ ပြည်ပခရီးသွားခွင့်၊ ပတ်စပို့ကိုင်ဆောင်ခွင့်၊ လက်ထပ်ထိမ်းမြားခွင့်တို့နှင့်ပတ်သက်၍ ဆွေမျိုးသားချင်း အမျိုးသားများကသာ အတည်ဆုံးဖြတ်ခွင့်ရှိသော အုပ်ထိန်းမှုဆိုင်ရာ ဥပဒေများကဲ့သို့သော ခွဲခြားမှုပုံစံများအဆုံးသတ်ရေးကိုလည်း လူ့အခွင့်အရေးလှုပ်ရှားသူများက တောင်းဆိုခဲ့သည်။

F-04