News

POST TYPE

NEWS

ထိုင်းနိုင်ငံမှ တောင်ပေါ်တိုင်းရင်းသားများ ဘိန်းအစား ကော်ဖီပြောင်းစိုက်
26-Mar-2018


ဘန်ကောက်၊ မတ် ၂၅

ထိုင်းနိုင်ငံမြောက်ပိုင်း ဒွိုင်တန်းတောင်ပေါ်မှ တိုင်းရင်းသားများသည် ဘိန်းခင်းများကို ကော်ဖီစိုက်ခင်းများဖြင့် အစားထိုးပြီးနောက် အကျိုးစီးပွားများ တိုးတက်လာသည်ဟု CNA သတင်းတွင် ဖော်ပြထားသည်။

လွန်ခဲ့သော နှစ်သုံးဆယ်ကဆိုလျှင် ကော်ဖီခင်းစိမ်းစိမ်းများဖြင့် ဖုံးအုပ်ထားသော မြင်ကွင်းမျိုးကို စိတ်ကူးမိသူတစ်ဦးမှ မရှိပေ။ ဒွိုင်နမ်နန်း တောင်ပေါ်သားများက ၎င်းတို့ဒေသသည် ဖွံ့ဖြိုးမှုမရှိဘဲ တစ်နိုင်ငံလုံးက မေ့လျော့ထားသောနေရာဟု ယခင်က သတ်မှတ်ခဲ့ကြသည်။

နိုင်ငံသားခံယူမှုမရှိ၊ အခြေခံ ရပိုင်ခွင့်မရှိသည့် တောင်ပေါ်သားများသည် ထင်းခုတ်ရင်း၊ တောင်ယာမီးရှို့ရင်းဖြင့် အသက်မွေးခဲ့ကြရာမှ သစ်တောရင်းမြစ်များ တဖြည်းဖြည်း ပြုန်းတီးလာမှုကြောင့် ဘိန်းစိုက်ပြီး တရားမဝင် မူးယစ်ဆေးကုန်ကူးကာ အသက်မွေးဝမ်းကျောင်းကြရသည့် အခြေအနေသို့ ရောက်ရှိလာခဲ့သည်။

“နေရာတကာမှာ ဘိန်းခင်းတွေချည်းပဲ။ လူတိုင်းက ဘိန်းစိုက်ပြီး မြန်မာကုန်သည်တွေဆီ ရောင်းကြတယ်။ အရင်က ဒီမှာ စစ်သားလည်းမရှိဘူး၊ ရဲလည်းမရှိဘူး၊ ဘုန်းကြီးလည်း မရှိဘူး၊ ကျောင်းဆရာလည်း မရှိဘူး”ဟု ဘိန်းစိုက်တောင်သူဟောင်း ဆွမ်ဂျစ်က ပြောကြားသည်။

ဒွိုင်တန်းတောင်ပေါ်တွင် အခါ၊ လားဟူ၊ ထိုင်းလူး၊ လဝ မျိုးနွယ်များ ရောနှောနေသော လူဦးရေ ၁၁,၀၀၀ ခန့် ရှိပြီး ၎င်းတို့သည် ရှမ်းလူမျိုးများ၊ ကူမင်တန် တပ်မဟာ ၉၃ အဆက်အနွှယ်များနှင့် တောင်ယာမြေများကို မျှဝေအသုံးပြုကြရသည်။

ဆွမ်ဂျစ်သည် ၎င်း၏မိဘများကဲ့သို့ပင် ကားလမ်းမရှိ၊ လျှပ်စစ်မီးမရှိ၊ ဘုံဘိုင်ရေမရှိ၊ ဆေးခန်းမရှိ၊ စာသင်ကျောင်းမရှိသော ဒွိုင်တန်းတောင်တန်းတွင် ကြီးပြင်းခဲ့ရသည်။

“ဒါကြောင့် လူတိုင်း ဘိန်းစိုက်ပြီး ရောင်းကြရတယ်။ ဘိန်းက ငွေဖြစ်လွယ်တယ်။ သုံးလတစ်ကြိမ် စိုက်လို့ရတယ်”ဟု ၎င်းက ဆိုသည်။

ဘိန်းတစ်ကီလိုရောင်းလျှင် ၃၂ ဒေါ်လာနှင့် ညီမျှသော ဘတ်ငွေ ၁၀၀၀ ရရှိပြီး လွန်ခဲ့သော နှစ်သုံးဆယ်က ထိုင်းနယ်စွန်နယ်ဖျားတွင် အလွန်တန်ဖိုးရှိသော ပမာဏဖြစ်သည်ဟု ၎င်းက ပြောကြားသည်။

၁၉၈၇ ဇန်နဝါရီလတွင်မူ ကျန်းမာရေးအတွက် အနားယူနေထိုင်ရန် ပင်လယ်မြေမျက်နှာပြင်အထက် ပေ ၄၀၀၀ မြင့်သော ဒွိုင်တန်းတောင်ပေါ်တွင် မြေနေရာလာရှာသော အသက် ၉၀ ကျော် မိဖုရား မယ်တော်ကြီး ဆရီနာဂါရင်ဒရာ ရောက်ရှိလာရာမှ တောင်တန်း၏ အခင်းအကျင်းနှင့် တောင်ပေါ်သားတို့၏ ဘဝများ ပြောင်းလဲသွားခဲ့သည်။

ထို့နောက်တွင် တော်ဝင်မိသားစု ရန်ပုံငွေဖြင့် ဒွိုင်တန်းတောင် ဖွံ့ဖြိုးရေးစီမံကိန်းကို စတင်အကောင်အထည်ဖော်ခဲ့သည်။ မိဖုရားမယ်တော်ကြီးသည် တောင်ပေါ်ရှိ နှစ်ထပ်စံအိမ်တွင် အသက်ထက်ဆုံး နေထိုင်ကာ သစ်တောပြန်လည်ထူထောင်ရေးနှင့် စီးပွားဖြစ်စိုက်ခင်းများ စိုက်ပျိုးနိုင်ရေးကို ဆောင်ရွက်သွားခဲ့သည်။

ယခုအခါ ဒွိုင်တန်းတောင်တန်းသည် သစ်တောများ၊ စီးပွားဖြစ်စိုက်ခင်းများဖြင့် စိမ်းလန်းကာ ကော်ဖီအပါအဝင် ဈေးကောင်းသော အသီးအနှံများ ထွက်ရှိနေပြီဖြစ်သည်။ ၁၅ ကီလိုမီတာ ဧရိယာကျယ်ပြန့်သော ကော်ဖီပင် ၃ ဒသမ ၅ သန်းသည် တောင်ပေါ်မိသားစု ၉၀၀ ခန့်အတွက် တည်ငြိမ်သောဝင်ငွေ (တစ်လလျှင် ဒေါ်လာ ၃၂၀ ဝန်းကျင်) ကို ဖန်တီးပေးသည်။

“အခုမျိုးဆက်တွေကတော့ အရာရာ ပြည့်ပြည့်စုံစုံနဲ့ မွေးဖွားလာကြတယ်။ အရမ်းကောင်းတဲ့ လမ်းပန်းဆက်သွယ်ရေး၊ အရမ်းကောင်းတဲ့ပညာရေးနဲ့ အရမ်းကောင်းတဲ့ သစ်တောတွေရှိနေပြီ။ သူတို့ရဲ့ ဘိုးဘေးတွေလို ဒုက္ခမခံရတော့ဘူးပေါ့။ ဒီအခြေအနေကို တည်တံ့အောင် ထိန်းသိမ်းပြီး ဆက်လက်တိုးတက်အောင် လုပ်ဆောင်ကြရမှာပေါ့”ဟု ဘိန်းစိုက်တောင်သူဟောင်း ဆွမ်ဂျစ်က ပြောကြားသည်။

F-04