News

POST TYPE

NEWS

အဓိပတိမာကယ်လ်၏ CDU ပါတီ ညွန့်ပေါင်းအစိုးရဖွဲ့ရန် သဘောတူညီမှုရရှိ
28-Feb-2018 tagged as ဂျာမနီ အဓိပတိ



ဘာလင်၊ ဖေဖော်ဝါရီ ၂၇

အဓိပတိမာကယ်လ်၏ CDU ပါတီသည် ဆိုရှယ်ဒီမိုကရက်များနှင့် လက်တွဲ၍ ညွန့်ပေါင်းအစိုးရသစ် ဖွဲ့စည်းရန် မီးစိမ်းပြလိုက်ပြီဟု DW သတင်းတွင် ဖော်ပြထားသည်။

သို့ရာတွင် အပေါ်ယံ ညီညွတ်မှုရှိသော်လည်း အတွင်းမှ တင်းမာမှုများကိုမူ လစ်လျူထားရန် မဖြစ်နိုင်ဟုဆိုသည်။

မျှော်လင့်ထားသည့်အတိုင်း တနင်္လာနေ့က ဘာလင်တွင်ကျင်းပသည့် CDU ပါတီညီလာခံတွင် ဆိုရှယ်ဒီမိုကရက်များနှင့် ညွန့်ပေါင်းအစိုးရ ဖွဲ့စည်းရေးကိစ္စကို အများစုထောက်ခံမှုရရှိခဲ့ပြီး ကိုယ်စားလှယ် ၉၇၅ ဦးတွင် ကန့်ကွက်သူ ၂၇ ဦးသာ ရှိသည်။

CDU ပါတီ ညီလာခံတွင် တက်ရောက်လာသော ကိုယ်စားလှယ်များက ဆာလန်းပြည်နယ် ဝန်ကြီးချုပ်ဟောင်း ကရမ့်ကာရမ်ဘူးကိုလည်း ပါတီ အထွေထွေအတွင်းရေးမှူးအဖြစ် တင်မြှောက်ခဲ့ကြသည်။ ကာရမ်ဘူး ၅၅ နှစ်သည် မာကယ်လ်နှင့်နီးစပ်သော မဟာမိတ်ဖြစ်ပြီး နောက်တက်မည့် အဓိပတိဖြစ်နိုင်သည်ဟု လေ့လာသူအချို့က ဆိုသည်။  

SPD ပါတီနှင့် အပေးအယူ ညှိနှိုင်းထားသော သဘောတူညီချက်ကို ပါတီဝင်များက သဘောမတွေ့ကြသော်လည်း မာကယ်လ်ကမူ ညွန့်ပေါင်းအစိုးရ သဘောတူညီချက်သည် သူမလုပ်နိုင်သမျှ အကောင်းဆုံးဖြစ်သည်ဟု ကာကွယ်ပြောဆိုခဲ့သည်။

“ကျွန်မတို့ သဘောမတွေ့ရုံနဲ့ အုပ်ချုပ်ခွင့်အာဏာကိစ္စ ဖြေရှင်းတာကို မဲဆန္ဒရှင်တွေဆီ ပုတ်မထုတ်သင့်ဘူး။ ပြည်သူတွေက CDU ပါတီကို တိုင်းပြည်အတွက် တာဝန်ယူစေချင်ကြတယ်။ ဒါက CDU ပါတီရဲ့ အမှတ်တံဆိပ်ပဲ”ဟု သူမက ဆိုသည်။

အာဏာရှိသော ဘဏ္ဍာရေးဝန်ကြီးနေရာကို SPD ပါတီထံပေးအပ်ခဲ့ခြင်းနှင့် ပတ်သက်၍ မာကယ်လ်က “ဒီဝန်ကြီး တစ်နေရာအတွက်နဲ့ သဘောတူညှိနှိုင်းမှု ပျက်ပြားအောင် လုပ်မလားလို့မေးလာရင် ကျွန်မအဖြေကတော့ NO ပါပဲ”ဟု ရှင်းလင်းပြောဆိုသည်။

ညွန့်ပေါင်းအစိုးရ ဖွဲ့စည်းရေးကို အတည်ပြုလိုက်ပြီဖြစ်သော်ငြားလည်း မာကယ်လ်အနေနှင့် စတုတ္တသက်တမ်းကို အပြည့်အဝ တာဝန်ယူဖွယ်မရှိဟူသော ခန့်မှန်းမှုများလည်း ရှိနေသည်။

ရွေးကောက်ပွဲတွင် သူမ၏ပါတီအပေါ် ထောက်ခံမှုကျဆင်းစေခဲ့သော ဒုက္ခသည်စီးဝင်မှုပြဿနာ၊ လူ့အဖွဲ့အစည်းအတွင်းမှ နည်းပညာ အပြောင်းအလဲကိစ္စနှင့် အီးယူပြဿနာများကို ဖြေရှင်းရန် မူဝါဒများ ချမှတ်ထားပြီးဖြစ်သည်ဟု မာကယ်လ်က ဆိုသည်။

ညွန့်ပေါင်းအစိုးရ သဘောတူညီမှုတွင် စည်းကမ်းချက်အဖြစ် ပါဝင်သော ဂျာမနီက လက်ခံထားသည့် ဒုက္ခသည်များနှင့် ဂျာမနီအသိုင်းအဝိုင်း ပေါင်းစည်းရေးကိစ္စကိုလည်း ပါတီအတွင်း ထောက်ခံမှုရရန် မာကယ်လ်က ကြိုးစားခဲ့သည်။

အစိုးရသစ်လက်ထက်တွင် အနာဂတ်အတွက် စံချိန်တင် ရင်းနှီးမြှုပ်နှံမှုများ ပြုလုပ်သွားမည်ဖြစ်သော်လည်း အကြွေးတင်ခံမည်မဟုတ်ဟု မာကယ်လ်က ပြောကြားသည်။ ညွန့်ပေါင်းအစိုးရ သဘောတူညီမှုသည် ဥရောပအတွက် တွန်းအားအသစ်ဖြစ်သည်ဟုလည်း သူမက ဆိုသည်။ 

ညွန့်ပေါင်းအစိုးရ ဖွဲ့စည်းရေး သဘောတူညှိနှိုင်းမှုအပေါ် ဆန့်ကျင်မှုသည် မာကယ်၏ CDU ပါတီအတွင်းမှာထက် လက်တွဲဖော် SPD ပါတီအတွင်းတွင် ပိုမိုပြင်းထန်သည်ဟု သိရှိရသည်။

သို့သော် ပါတီနှစ်ခုစလုံးတွင် မာကယ်လ်နှင့် သူမ၏ အစီအစဉ်များအပေါ် ပြစ်တင်ဝေဖန်လိုသူ များစွာရှိနေသည့်တိုင်အောင် ညွန့်ပေါင်းအစိုးရ ဖွဲ့စည်းရေး သဘောတူညှိနှိုင်းမှုအပေါ် ကန့်ကွက်မဲပေးရန် နှိုးဆော်ကာ တိုက်ရိုက်စိမ်ခေါ်ဝံ့သူ အလွန်နည်းပါးသည်ဟု ဆိုသည်။ 

F-04