News

POST TYPE

NEWS

အငှားကိုယ်ဝန်ဆောင် ရှာဖွေသည့်စုံတွဲများ ယူကရိန်းသို့ ရောက်ရှိ
14-Feb-2018



ကိယက်ဗ်၊ ဖေဖော်ဝါရီ ၁၃

ဥရောပ၏ အနွမ်းပါးဆုံးနိုင်ငံများထဲတွင် ပါဝင်သော ယူကရိန်းနိုင်ငံသည် ကလေးကိုယ်စားမွေးပေးရန် အငှားကိုယ်ဝန်ဆောင်ကို လိုက်ရှာသူများအကြား ရေပန်းစားသောနေရာတစ်ခု ဖြစ်လာသည်ဟု BBC သတင်းတွင် ဖော်ပြထားသည်။

ကမ်းလှမ်းသော ငွေကြေးပမာဏသည် အမျိုးသမီးငယ်များစွာကို ဆွဲဆောင်နေသော်လည်း ၎င်းတို့ အသုံးချခံရနိုင်သည်ဟူသော စိုးရိမ်မှုများလည်း ရှိနေသည်။

ယူကရိန်းမှ အင်နာသည် အထက်တန်းကျောင်းပြီးခါစ ၁၈ နှစ်အရွယ်တွင် တစ်လလျှင် ဒေါ်လာ ၂၀၀ ရသည့် ဟိုတယ်ဝန်ထမ်းအလုပ်ကို လုပ်ကိုင်နေရာမှ အသက်၂၁ နှစ်အရွယ်တွင် ဒေါ်လာ ၂၀,၀၀၀ ရမည့် အငှားကိုယ်ဝန်ဆောင်အလုပ်ကို ကူးပြောင်းလုပ်ကိုင်ခဲ့ခြင်းဖြစ်သည်။ လူလတ်တန်းစားမိသားစုမှ မွေးဖွားလာသူ အင်နာက ဈေးကြီးသော အသုံးအဆောင်ပစ္စည်းများကို သုံးစွဲလိုသောကြောင့် ယင်းသို့ စိတ်ကူးမိခဲ့ခြင်းဖြစ်သည်ဟု ဆိုသည်။

အာရှတိုက်မှ အငှားကိုယ်ဝန်ဆောင်မှုလုပ်ငန်းများ တစ်ခုပြီးတစ်ခု ပိတ်သိမ်းလာမှုကြောင့် ၂၀၁၅ နောက်ပိုင်းတွင် နိုင်ငံခြားသားစုံတွဲများ ယူကရိန်းသို့ တဖွဲဖွဲ ရောက်လာကြခြင်းဖြစ်သည်။

အိန္ဒိယ၊ နီပေါ၊ ထိုင်းနိုင်ငံတို့တွင် ယင်းလုပ်ငန်းများကို ပိတ်ပင်လာမှုကြောင့် အမေရိကန်ဒေါ်လာဖြင့် အတန်အသင့်မျှသာ ကုန်ကျမည့် နေရာများထဲတွင် ကျန်နေသေးသည့် ယူကရိန်းသို့ ခြေဦးလှည့်လာကြသည်။

ထိုလုပ်ငန်းတွင် ဝန်ဆောင်မှုပေးသည့် ဆေးခန်းများ၏ ပြုစုစောင့်ရှောက်မှု အရည်အသွေး ကျဆင်းလာသည့် ပြဿနာရှိနေသည်ဟုလည်း သိရှိရသည်။ 

ထိုပြဿနာဖော်ထုတ်မှုကို ဆေးခန်းများက ဆန့်ကျင်ကြပြီး ဆေးခန်း၏ နာမည်ပျက်သတင်းအား လူသိရှင်ကြား ဖော်ထုတ်ခံရမည်ကို စိုးရိမ်နေကြဆဲဖြစ်သည်ဟု ဆိုသည်။

ယူကရိန်း၏ အငှားကိုယ်ဝန်ဆောင် လုပ်ငန်းသည် ပြီးခဲ့သော ၂ နှစ်အတွင်း ၁၀၀၀ (တစ်ထောင်) ရာခိုင်နှုန်း မြင့်တက်လာခဲ့သည်ဟု ကလေးရလိုသူများကို အကြံပေးနေသည့် ဆစ်ဒနီအခြေစိုက်လုပ်ငန်းမှ ဆမ်အီဗရင်ဂမ်က ပြောကြားသည်။

အငှားကိုယ်ဝန်ဆောင်ခြင်းသည် ယူကရိန်းဥပဒေအရ တရားဝင်သည့်အပြင် တင်းကျပ်မှုမရှိသော အလယ်အလတ် ဥပဒေများက လူအများကို ဆွဲဆောင်ခဲ့ခြင်းဖြစ်သည်။ ထို့ပြင် အခကြေးငွေကိုလည်း ကန့်သတ်ထားခြင်းများမရှိသောကြောင့် လွတ်လပ်သောဈေးကွက် ဖြစ်ပေါ်လာစေသည်။

သို့ရာတွင် အရာရာဖြောင့်တန်းနေသည်ဟု မဆိုနိုင်ပေ။ ယူကရိန်း၏ ဗျူရိုကရေစီစည်းကမ်းများအရ ယူကေအပါအဝင် နိုင်ငံအချို့မှလာသော စုံတွဲများသည် ယူကရိန်းတွင် လများစွာနေထိုင်ရန် လိုအပ်သည်ဟုဆိုသည်။

ထို့ပြင် ယူကရိန်းမှ ဆေးခန်းအများစုသည် ထိုလုပ်ငန်းကို ပွင့်လင်းမြင်သာစွာ လုပ်ကိုင်နေကြသော်လည်း နာမည်ပျက်ကိစ္စများကိုမူ ဖုံးကွယ်ထားကြသည်။ ထိုလုပ်ငန်းတွင် သန္ဓေသားလောင်းလဲလှယ်မှု၊ ကျန်းမာရေးစစ်ဆေးမှု အရည်အသွေးနိမ့်ကျမှု၊ ဖောက်သည်များစွာကို လက်ခံမှု စသည့်ပြဿနာများစွာ ရှိနေသည်။ အချို့အေဂျင်စီများသည် အငှားကိုယ်ဝန်ဆောင်များကို ဆိုးဝါးစွာဆက်ဆံကြပြီး စည်းကမ်းများကို မလိုက်နာပါက အခကြေးငွေပေးရန် ငြင်းဆန်ကြသည်ဟု သိရှိရသည်။

ယူကရိန်းသည် ကရိုင်းမီးယား ခွဲထွက်မှုပြဿနာကြောင့် ၂၀၁၄ နှင့် ၂၀၁၅ ခုနှစ်တို့တွင် စီးပွားရေးအကျပ်အတည်း တွေ့ခဲ့ရပြီးနောက် လူနေမှုအဆင့်အတန်း ကျဆင်းလာမှု၏ အကျိုးဆက်အနေနှင့် ငယ်ရွယ်သောအမျိုးသမီးများမှာ အငှားကိုယ်ဝန်ဆောင်လုပ်ငန်းများ၏ ဆွဲဆောင်မှုနောက်သို့ ပါသွားခဲ့သည်ဟု ယူဆရကြောင်း ယူကရိန်းပါလီမန် ကျန်းမာရေးကော်မတီဥက္ကဋ္ဌ ဒေါက်တာ အော်လ်ဂါဘိုဂိုမိုလက်စ်က ပြောကြားသွားသည်။

ယင်းလုပ်ငန်းနယ်ပယ်တွင် လုံလောက်သောစည်းကမ်းနှင့် ကြပ်မတ်မှုများမရှိသောကြောင့် အငှားကိုယ်ဝန်ဆောင်သူနှင့် ငွေပေးရသောမိဘများ နှစ်မျိုးစလုံးအတွက် ဘေးသင့်နိုင်သည်ဟု သူမက မှတ်ချက်ပေးသည်။

လန်ဒန်၊ ဒဗ္ဗလင်၊ ရှန်ဟိုင်းစသည်ဖြင့် ကမ္ဘာ့နေရာအနှံ့တွင် နေထိုင်ကြသောစုံတွဲများသည် ယူကရိန်းဆေးခန်းများ၏ အကောင်းအဆိုးသတင်းကို အွန်လိုင်းဖိုရမ်ရေးသားချက်များကို အမှီပြု၍ ရွေးချယ်ကြရသောကြောင့် ယူကရိန်းသို့သွားရန် ဆုံးဖြတ်ခြင်းသည် မရေရာမှုများ ပြည့်နှက်နေသည်။

အငှားကိုယ်ဝန်ဆောင်ပေးသူ တက်တီယာနာနှင့် ဂျာနာတို့က ကလေးကို သူ့မိဘများထံလွှဲပေးရသည့်အချိန်တွင် မိခင်စိတ်ခံစားချက်ကို ထိန်းနိုင်ရန် သွေးအေးသူဖြစ်ဖို့လိုသည်ဟု ပြောကြားကြသည်။

အင်နာကမူ “ကလေးမိဘတွေက သူတို့ အရမ်းကျေးဇူးတင်တယ်။ သူတို့ဘဝမှာ အရေးကြီးဆုံးလူတစ်ယောက်ဖြစ်တယ်လို့ ပြောကြတဲ့အခါ သူတို့အတွက် ငါအများကြီးလုပ်ပေးနိုင်ခဲ့ပါလားဆိုတဲ့ ခံစားမှုကိုရတယ်”ဟု ပြောကြားသည်။

F-04