News

POST TYPE

NEWS

ဧရာဝတီတိုင်း ဝန်ကြီးချုပ်သစ် ဦးလှမိုးအောင်၏ ကိုယ်ရေးအကျဉ်း
18-Jan-2018


ဦးလှမိုးအောင်ကို အဖဦးကြည်ဝင်း အမိဒေါ်ထွေးရီတို့က ၁၉၆၅ ခုနှစ် ဒီဇင်ဘာလ ၂၂ ရက်တွင် မွေးဖွားခဲ့သည်။ ၁၉၈၃ ခုနှစ်တွင် ဆယ်တန်းအောင်မြင်ပြီး ရေဆင်းစိုက်ပျိုးရေးတက္ကသိုလ် တက်ရောက်ခဲ့ကာ ၁၉၉၁ ခုနှစ်တွင် B.Ag ဘွဲ့ရရှိခဲ့သည်။

၁၉၈၈ ခုနှစ် အရေးအခင်းကာလတွင် သပြေကုန်းတိုက်နယ် ကျောင်းသားသမဂ္ဂ ဥက္ကဋ္ဌအဖြစ် ပါဝင်လှုပ်ရှားခဲ့ပြီး ၁၉၈၉ ခုနှစ်တွင် NLD ပါတီသို့ ဝင်ရောက်ခဲ့သည်။ ၁၉၉၀ ရွေးကောက်ပွဲတွင် သပြေကုန်းတိုက်နယ် NLD ပါတီတွင် လူငယ်တာဝန်ခံ (၁) အဖြစ် ပါဝင်ခဲ့သည်။ 

၁၉၉၃ ခုနှစ်တွင် ဒေါ်ခင်နှင်းညိုနှင့် အိမ်ထောင်ကျသည်။ ဦးလှမိုးအောင်တွင် သားသမီးမရှိပေ။ မြန်အောင်မြို့နယ်၊ သပြေကုန်းရွာတွင်နေထိုင်ပြီး ဆိုင်ကယ်၊ စက်ဘီး၊ လျှပ်စစ်အပိုပစ္စည်း ရောင်းဝယ်ရေးလုပ်ငန်း လုပ်ကိုင်သူဖြစ်သည်။ 

၂၀၁၂ ခုနှစ် ကြားဖြတ်ရွေးကောက်ပွဲတွင် ပြည်သူ့လွှတ်တော် ကိုယ်စားလှယ် အောင်နိုင်ရေးအတွက် သပြေကုန်းတိုက်နယ် NLD ပါတီတွင် အောင်နိုင်ရေးဥက္ကဋ္ဌအဖြစ် ဆောင်ရွက်ခဲ့သည်။ ၂၀၁၃ ခုနှစ် NLD ပါတီ ပြန်လည်ရွေးချယ်ဖွဲ့စည်းရာတွင် မြန်အောင်မြို့နယ် NLD ပါတီ ဒုဥက္ကဋ္ဌအဖြစ်ဖြင့် ယနေ့အထိ ဆောင်ရွက်ခဲ့သည်။ 

၂၀၁၅ ခုနှစ် ရွေးကောက်ပွဲတွင် တိုင်းဒေသကြီးလွှတ်တော်၊ မြန်အောင်မြို့နယ် မဲဆန္ဒနယ် အမှတ် (၁) တွင် USDP ပါတီမှ တိုင်းလွှတ်တော်ကိုယ်စားလှယ် ဦးအောင်မျိုးညွန့်နှင့် ယှဉ်ပြိုင်ခဲ့ပြီး အနိုင်ရရှိခဲ့သည်။

တိုင်းဒေသကြီး လွှတ်တော်ကိုယ်စားလှယ် ဖြစ်လာပြီးနောက် လွှတ်တော်တွင် စိုက်ပျိုး၊ မွေးမြူရေး၊ ဆည်မြောင်းနှင့် သယံဇာတရေးရာ ကော်မတီတွင် အတွင်းရေးမှူးအဖြစ် ဆောင်ရွက်ခဲ့သည်။

လွှတ်တော်အတွင်း ထိရောက်သော မေးခွန်းကောင်းများ မေးမြန်းခဲ့ပြီး ၎င်း၏ စည်ပင်သာယာရေးနှင့် သက်ဆိုင်သော မေးခွန်းကြောင့် မြို့နယ်စည်ပင်သာယာရေးကော်မတီများကို အထောက်အကူပြုပေးမည့် “ရပ်ကွက်/ကျေးရွာ သန့်ရှင်းသာယာလှပရေး အထောက်အကူပြု”အဖွဲ့များကို အစိုးရက တိုင်းဒေသကြီးတစ်ခုလုံး ဖွဲ့စည်းခဲ့သည်။

လွှတ်တော်ထဲတွင် ထိရောက်သော မေးခွန်းများမေးမြန်းခဲ့ခြင်း၊ တိကျသော ၊ မှန်ကန်သော အချက်အလက်များဖြင့် အများပြည်သူအကျိုးရှိစေမည့် အဆိုများတင်သွင်းခဲ့ခြင်း၊ လွှတ်တော် ကိုယ်စားလှယ်လုပ်ရမည့် လုပ်ငန်းတာဝန်များကို မှန်မှန်နှင့်တိကျစွာ ဆောင်ရွက်တတ်ခြင်း၊ ကော်မတီများတွင် ပူးပေါင်းပါဝင်ဆောင်ရွက်ခြင်း၊ မှန်ကန်သောဆုံးဖြတ်ချက်များ ချမှတ်နိုင်သည့် တည်ငြိမ်သော၊ တက်ကြွသော အသက်အရွယ်ရှိနေခြင်း၊ ခေတ်ပညာတတ် စိုက်ပျိုးရေးဘွဲ့ရ ဖြစ်နေခြင်း၊ နိုင်ငံရေးတွင်လည်းကောင်း၊ ပါတီလှုပ်ရှားမှုများတွင်လည်းကောင်း သမိုင်းနောက်ခံ ကောင်းခဲ့ခြင်းတို့ကြောင့် ရွေးချယ်တာဝန်ပေးအပ်ခြင်း ဖြစ်နိုင်ကြောင်း လွှတ်တော်ကိုယ်စားလှယ်များထံမှ သိရသည်။

R-11




  • VIA