News

POST TYPE

NEWS

အနည်းဆုံး အခကြေးငွေ တစ်ရက် ၄၈၀၀ ကျပ်ပေးရန် သတ်မှတ်
နေပြည်တော်၊ ဒီဇင်ဘာ၂၉

အလုပ်သမား ၁၀ ဦးအထက်ပိုသည့် ပုဂ္ဂလိကလုပ်ငန်းများတွင် အနည်းဆုံး အခကြေးငွေကို တစ်ရက် ၄၈၀၀ ကျပ်ပေးရန် အဆိုပြု သတ်မှတ်လိုက်သည်ဟု အလုပ်သမား၊​ လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက ပြောကြားသည်။

နေပြည်တော် အလုပ်သမား၊​ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနတွင် ဒီဇင်ဘာ ၂၉ ရက်က ကျင်းပသည့် စတုတ္တအကြိမ် အနည်းဆုံး အခကြေးငွေ သတ်မှတ်ရေးဆိုင်ရာ အမျိုးသားကော်မတီ အစည်းအဝေး ဆုံးဖြတ်ချက်ကို မီဒီယာများအား ပြောကြားခဲ့ခြင်းဖြစ်သည်။

အနည်းဆုံး အခကြေးငွေ ၄၈၀၀ ကျပ်ကို လုပ်ငန်းခွင်အတွင်း ကျွမ်းကျင်မှု မရှိသေးသည့်အသစ် စတင်ဝင်ရောက်လာသည့် အလုပ်သမားများကို ပေးရန်ဖြစ်ပြီး ကျွမ်းကျင်မှုရှိသော ဝန်ထမ်းများကို ကျွမ်းကျင်မှုအလိုက် စက်ရုံ၊ အလုပ်ရုံများက ပေးရမည်ဖြစ်ကြောင်း၊ ယခုသတ်မှတ်အဆိုပြုသည့် အနည်းဆုံး အခကြေးငွေ ၄၈၀၀ ကျပ်သည် လုပ်သားအင်အား ၁၀ ဦးထက်မနည်းရှိသည့်လုပ်ငန်းများမှ အလုပ်သမား အသစ်များအတွက် သတ်မှတ်ခြင်းဖြစ်ပြီး လုပ်သားအင်အား နည်းပါးသည့် အသေးစား အလတ်စား လုပ်ငန်းများ ရှင်သန်နိုင်ရေးအတွက် လိုအပ်နေသေး၍ မပါဝင်သေးကြောင်း ပြည်ထောင်စုဝန်ကြီးက ဆိုသည်။

“ယခင်သတ်မှတ်ချက်က တစ်ရက်အနည်းဆုံး အခကြေးငွေ ၃၆၀၀ ကျပ်ပါ။ အခု နောက်ထပ် ၁၂၀၀ ကျပ် ထပ်တိုးတဲ့သဘောပါ။ ဒါအတည်ဖြစ်ဖို့ ရက်ပေါင်း ၆၀ စောင့်ရမယ်”ဟု ဦးသိန်းဆွေက ဆိုသည်။

အနည်းဆုံး အခကြေးငွေ  ၄၈၀၀ ကျပ်ကို အစည်းအဝေး တက်လာသည့် အလုပ်ရှင်၊​ အလုပ်သမား ကိုယ်စားလှယ်များက အိမ်နီးချင်းနိုင်ငံများက လုပ်ခနှုန်းထားများ၊ ​နိုင်ငံတော် GDP အခြေအနေများနှင့် ပြည်နယ်နှင့် တိုင်းဒေသကြီးရှိ သက်ဆိုင်ရာဝန်ကြီးများမှ အောက်ခြေအထိ ကွင်းဆင်းစုံးစမ်းပြီး ယခုလိုသတ်မှတ်ခြင်းဖြစ်ကြောင်း အလုပ်သမား၊ လူဝင်မှု ကြီးကြပ်ရေးနှင့် ပြည်သူ့အင်အား ဝန်ကြီးဌာနမှ စုံးစမ်းသိရှိရသည်။

T.L