News

POST TYPE

NEWS

NLD ကိုယ်စားလှယ်အချို့ကို အုပ်ချုပ်ရေး တာဝန်ပေးရန် ဝန်ကြီးဟောင်း ဦးစိုးသိန်း အကြံပြု

နေပြည်တော်၊ နိုဝင်ဘာ ၂၃

NLD လွှတ်တော်ကိုယ်စားလှယ်အချို့ကို ဝန်ကြီး၊ ဒုတိယဝန်ကြီး တာဝန်ပေး၍ အုပ်ချုပ်ရေးတာဝန် ယူခိုင်းပါက ၂၀၂၀ ရွေးကောက်ပွဲ အနိုင်ရရှိလျှင် NLD အစိုးရအတွက် အဆင်သင့်ဖြစ်မည်ဟု သမ္မတရုံး ဝန်ကြီးဟောင်း ဦးစိုးသိန်း (အမျိုးသား လွှတ်တော်ကိုယ်စားလှယ်) က အကြံပြု ပြောကြားလိုက်သည်။

နိုဝင်ဘာ ၂၃ ရက်က ကျင်းပသည့် ပြည်ထောင်စုလွှတ်တော် အစည်းအဝေးတွင် ဝန်ကြီးဌာနအသစ်နှစ်ခုဖြစ်သော ပြည်ထောင်စု အစိုးရအဖွဲ့ရုံး ဝန်ကြီးဌာနနှင့် အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာနတို့ ဖွဲ့စည်းရန် နိုင်ငံတော်သမ္မတ၏ သဝဏ်လွှာ ပေးပို့ချက်ကို ၎င်းတစ်ဦးတည်း ဆွေးနွေးခဲ့ပြီးနောက် အထက်ပါအတိုင်း တင်ပြပြောကြားခဲ့ခြင်း ဖြစ်သည်။

“ယခုခန်းမအတွင်းမှာရှိတဲ့ အနာဂတ် NLD ခေါင်းဆောင်များကိုလည်း နိုင်ငံအုပ်ချုပ်ရေး အတွေ့အကြုံများ ပေးမယ်ဆိုရင် လာမယ့် ၂၀၂၀ ရွေးကောက်ပွဲမှာ နိုင်မယ်ဆိုရင် အဆင်သင့် ဖြစ်နိုင်ကြောင်းလည်း ထပ်မံ အကြံပြုအပ်ပါတယ်”ဟု ၎င်းက ဆိုသည်။

ဝန်ကြီးဌာနများတွင် ဒုတိယဝန်ကြီးများ ပြည့်ပြည့်စုံစုံ ခန့်ပါက လွှတ်တော်များတွင် မေးခွန်းများ ဖြေကြားရခြင်း၊ ပြည်တွင်း လှည့်လည် စစ်ဆေးမှုများပြုရခြင်း၊ ဝန်ထမ်းများကို ဖိဖိစီးစီးပြုပြင်ပေးနိုင်ခြင်း၊ ပြည်သူနှင့် ထိတွေ့နိုင်ခြင်းများ ပိုမို အသက်ဝင်လာမည်ဖြစ်ကြောင်း ကြံ့ခိုင်ရေးပါတီဝင်ဟောင်းဖြစ်သူ ဦးစိုးသိန်းက ထပ်လောင်း ပြောသည်။

ဝန်ကြီးဌာနနှစ်ခု ထပ်မံ ဖွဲ့စည်းခြင်းကို သဘောတူကြောင်း စဉ်းစားပါက စီမံကိန်းနှင့် ဘဏ္ဍာရေး ဝန်ကြီးဌာန (ဝန်ကြီးရုံး အပါအဝင် ၂၀ ဌာန)၊စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာန (ဝန်ကြီးရုံး အပါအဝင် ၁၄ ဌာန)၊ ပို့ဆောင်ရေးနှင့် ဆက်သွယ်ရေး ဝန်ကြီးဌာန (ဝန်ကြီးရုံး အပါအဝင် ၁၁ ဌာန)၊ လျှပ်စစ်နှင့် စွမ်းအင်ဝန်ကြီးဌာန (ဝန်ကြီးရုံး အပါအဝင် ၉ ဌာန)၊ အလုပ်သမား၊ လူဝင်မှု ကြီးကြပ်ရေးနှင့် ပြည်သူ့အင်အား ဝန်ကြီးဌာန (ဝန်ကြီးရုံး အပါအဝင် ၇ ဌာန)၊ နိုင်ငံခြားရေး ဝန်ကြီးဌာန (ဝန်ကြီးရုံး အပါအဝင် ၇ ဌာန)နှင့် ပြည်ထောင်စု အစိုးရအဖွဲ့ရုံး ၁ ဌာနတို့၏ လုပ်ငန်းလည်ပတ်မှုကို သတိပြု သုံးသပ်ပါက အမျိုးသား ဒီမိုကရေစီ အဖွဲ့ချုပ်၏ အစိုးရသည် ပိုမို တိုးတက်အားကောင်းလာမည်ဖြစ်ကြောင်း ဦးစိုးသိန်းက ပြောသည်။

“ကျပ်နေတဲ့ဌာနတွေ၊ ဝန်ကြီးတွေက လူကြီးကျတော့ ကြောက်တော့အဆင် ပြေတယ်ချည်းပဲ ပြောနေတယ်။ တကယ်တမ်း NLD အစိုးရရဲ့ခက်ခဲနေတဲ့ အကျပ်အတည်းက ဒီဝန်ကြီးတွေ ဒုဝန်ကြီးတွေ ပြည့်ပြည့်စုံစုံ ခန့်ပြီးရွေ့ရင် ပြည်သူမျှော်လင့်နေတာ နည်းနည်း တိုးသွားမယ်၊ လွှတ်တော်ထဲမှာ လူတော်များစွာ ရှိတယ်”ဟု ၎င်းက မီဒီယာများကို ပြောသည်။

ရခိုင်ပြည်နယ် အကြမ်းဖက်မှုနောက်တွင် အစုလိုက် အပြုံလိုက် တိမ်းချောင်မှုများ ဖြစ်ပေါ်ခဲ့ခြင်းကြောင့် မြန်မာနိုင်ငံအနေဖြင့် ကုလသမဂ္ဂ လုံခြုံရေး ကောင်စီနှင့် အပြည်ပြည်ဆိုင်ရာ အဖွဲ့အစည်းများ၏ နိုင်ငံရေးအရ ဖိအားပေးမှုများ အများဆုံး ဖြစ်နေကြောင်း၊ ယင်းကိစ္စကြောင့် ကုလသမဂ္ဂ မျက်နှာစာတွင်နိုင်ငံ၏ အကျိုးစီးပွားကို မြှင့်တင် ကာကွယ်ရေးအတွက် အပြည်ပြည်ဆိုင်ရာ အဖွဲ့အစည်းများနှင့် ကဏ္ဍစုံတွင် ပူးပေါင်း ဆောင်ရွက် အကောင်အထည် ဖော်နိုင်ရန် လိုအပ်လျက်ရှိကြောင်း၊ အပြည်ပြည်ဆိုင်ရာ ပူးပေါင်း ဆောင်ရွက်ရေး ဝန်ကြီးဌာနသစ်တွင် ဝန်ကြီးတစ်ဦး ခန့်အပ်လိုက်ပါက နိုင်ငံတော်၏ အတိုင်ပင်ခံပုဂ္ဂိုလ်သည် နိုင်ငံခြားရေး ဝန်ကြီးတာဝန်အပြင် အခြားအရေးကြီးသည့် ပြည်တွင်း တာဝန်များကို ပိုမိုအာရုံစိုက် လုပ်ကိုင်နိုင်မည်ဖြစ်ကြောင်း ရှေ့နေချုပ် ဦးထွန်းထွန်းဦးက ပြောကြားသည်။

ဝန်ကြီးဌာနသစ်နှစ်ခု ဖွဲ့စည်းခြင်းနှင့် အဂတိ လိုက်စားမှု တိုက်ဖျက်ရေး ကော်မရှင် ဥက္ကဋ္ဌနှင့်အဖွဲ့ဝင်တို့ကို ခန့်အပ်ရေးကိစ္စတို့ကို လွှတ်တော်မှ ကန့်ကွက်သူ မရှိ အတည်ပြုခဲ့သည်။

တပ်မတော်အစိုးရလက်ထက်တွင် ဒေါ်အောင်ဆန်းစုကြည်နှင့် ဆက်ဆံရေးဝန်ကြီးအဖြစ် တာဝန်ယူပြီး ဦးသိန်းစိန် အစိုးရလက်ထက်တွင် ပြန်ကြားရေးဝန်ကြီး တာဝန်ယူခဲ့ဖူးသော ဦးအောင်ကြည်ကို အဂတိလိုက်စားမှု တိုက်ဖျက်ရေး ကော်မရှင်တွင် ဥက္ကဋ္ဌအဖြစ် ခန့်အပ်ရန်လည်း လွှတ်တော်က သဘောတူခဲ့သည်။

S-01