News

POST TYPE

NEWS

ဖွင့်ပွဲမလုပ်ရသေးမီ တံတားအလယ် တစ်ပေခွဲခန့်နိမ့်ကျ
23-Oct-2017 tagged as တံတား မကွေး


မကွေး၊ အောက်တိုဘာ ၂၃

ရန်ကုန်အခြေစိုက် ဇော်ထက်ပိုင်ကုမ္ပဏီ တာဝန်ယူ ဆောက်လုပ်သည့် ရေငံ-ဂွေးကုန်း တံတား ဖွင့်ပွဲပြုလုပ်ရန် ၁၅ ရက်အလို တံတား၏ အလယ်တိုင် တစ်ပေခွဲခန့် နိမ့်ကျသွား၍ ဖြတ်သန်းသွားလာမှု ယာယီ ပိတ်ထားရကြောင်း ဒေသခံများထံမှ သိရှိရသည်။

ရေငံ-ဂွေးကုန်း တံတားသည် မကွေးတိုင်းဒေသကြီး၊ နတ်မောက်မြို့နယ်အတွင်းရှိ ရေငံကျေးရွာအနီးတွင် ဆောက်လုပ်ခြင်းဖြစ်သည်။ ယင်းတံတားကို ယခုနှစ် ဖေဖော်ဝါရီလဆန်းက စတင်ဆောက်လုပ်ခဲ့ရာ ဇူလိုင်လအတွင်းက ပြီးစီးခဲ့သည်။ လာမည့် နိုဝင်ဘာလ ၆ရက်တွင် ဖွင့်ပွဲပြုလုပ်မည်ဖြစ်သည်။

မိုးအဆက်မပြတ် ရွာသွန်းမှုကြောင့် ရေစီးမပြတ်ဘဲ ရေလယ်တိုင် ကျွံကျကာ တံတားအလယ် တစ်ပေခွဲခန့် နိမ့်ကျသွားသဖြင့် တာဝန်ယူ တည်ဆောက်သည့် ကုမ္ပဏီတာဝန်ရှိသူများ လာရောက်စစ်ဆေးမှု ပြုလုပ်နေပြီဖြစ်ကြောင်း တံတားဖြစ်မြောက်ရေး ပါဝင်ကူညီပေးနေသည့် နတ်မောက်မြို့မှ ဦးထွန်းဝင်းက ပြောကြားသည်။

ဂျပန်သံရုံး၏ ဆက်သွယ်ပေးမှုအရ ဂျပန်အစိုးနှင့် ပြည်သူတို့၏ ထောက်ပံ့ငွေဖြင့် ရေငံတံတားကို တည်ဆောက်ခြင်းဖြစ်သည်။ ရေငံတံတားကို အမေရိကန် ဒေါ်လာ ၁၁၅,၀၀၀ ဖြင့် ဆောက်လုပ်ခြင်းဖြစ်သည်။ သံကူကွန်ကရစ် အမျိုးအစားဖြစ်သည်။ ပုဂ္ဂလိကလုပ်ငန်းဖြစ်၍ အသေးစိတ် မသိရှိရကြောင်း နတ်မြောက်မြို့နယ် မြို့နယ် အုပ်ချုပ်ရေးမှူး ဦးကျော်ခိုင်ထွန်းက ပြောကြားသည်။

အောက်ခံမြေသား၏ ခံနိုင်ဝန်ကို ကောင်းစွာ စစ်ဆေးသင့်ပြီး ချောင်းသဲပြင်ကို တူးဆွသည့်အခါ အမာခံမြေလွှာအထိ ရောက်အောင် တူးဖော်၍ အချိန်ပေး လုပ်ဆောင်သင့်ကြောင်း၊ ကြိုတင်ပြင်ဆင်မှု အားနည်းသဖြင့် ယင်းကဲ့သို့ တွေ့ကြုံရခြင်း ဖြစ်ကြောင်း နတ်မောက်မြို့မှ တည်ဆောက်ရေးလုပ်ငန်း ကျွမ်းကျင်သူအချို့က သုံးသပ်သည်။

ယင်းကဲ့သို့ နိမ့်ကျသွားခြင်းကြောင့် တံတား၏ နေရာအချို့တွင်လည်း အက်ကြောင်းများ ပေါ်နေပြီး ပြုပြင်ဆောင်ရွက်မှုများပြီးစီးမှသာ ဖွင့်ပွဲအခမ်းအနား ဆောင်ရွက်သင့်ကြောင်း တံတားတည်ဆောက်ရေးတွင် ပါဝင်အကျိုးဆောင်ပေးနေသူ ဦးထွန်းဝင်းက ပြောကြားသည်။

အဆိုပါ တံတားသည် အလျား(အရှည်) ပေ ၁၄၀၊ အကျယ် ပေ ၂၀ ရှိပြီး နတ်မောက်မြို့နယ်အတွင်းရှိ လေးအိမ်-ဂွေးကုန်း-ရေငံ-ဝံအူ-ရွှေကွေ့ မြေသားလမ်းပိုင်းပေါ်တွင် တည်ရှိကာ နတ်မောက်-ပျှော်ဘွယ် ကားလမ်းမကြီးနှင့် ချိတ်ဆက်ထားကြောင်း ဒေသခံများထံမှ သိရှိရသည်။

R-20