News

POST TYPE

NEWS

အင်းစိန် ဂျီတီအိုင် ပထမနှစ်ဝင်ခွင့် ကျောင်းသားရာနှင့်ချီ လျှောက်ထား
23-Oct-2017 tagged as

ရန်ကုန်၊ အောက်တိုဘာ ၂၃

နှစ် ၁၂၀ ကျော် သက်တမ်းရှိပြီး ၁၇နှစ်ကြာ ပိတ်ထားခဲ့သည့် အစိုးရ စက်မှု၊ လက်မှုသိပ္ပံ အင်းစိန် ဂျီတီအိုင်ကို ယခုနှစ်တွင် ပြန်လည်ဖွင့်လှစ်မည်ဖြစ်ရာ ပထမနှစ်ဝင်ခွင့်အတွက် ကျောင်းသားရာနှင့်ချီ၍ လျှောက်ထားနေသည်ကို ယနေ့ (အောက်တိုဘာလ ၂၃ရက်) မွန်းလွဲပိုင်းက တွေ့ရသည်။

ဝင်ခွင့်လျှောက်လွှာများကို အောက်တိုဘာလ ၁၉ ရက်က စတင် ထုတ်ယူနိုင်ကြောင်း အသိပေးထားသည်။ လျှောက်လွှာ ထုတ်ယူသူ များပြားသောကြောင့် ယနေ့ (အောက်တိုဘာလ ၂၃ ရက်)မှသာ လျှောက်လွှာများ စတင် လက်ခံခြင်းဖြစ်သည်။ စတင်လက်ခံသည့် ယနေ့ မွန်းလွဲပိုင်းအထိ စာရင်းအရ ကျောင်းသား ၃၀၀ ခန့် လျှောက်ထားသည်ဟု ယင်းကျောင်းထံမှ သိရှိရသည်။

အင်းစိန် ဂျီတီအိုင်တွင် မြို့ပြအင်ဂျင်နီယာ၊ အီလက်ထရွန်နစ် အင်ဂျင်နီယာ၊ လျှစ်စစ်စွမ်းအား အင်ဂျင်နီယာ၊ စက်မှုအင်ဂျင်နီယာနှင့် စက်မှုလုပ်ငန်း အင်ဂျင်နီယာ(အင်းစိန် ဂျီတီအိုင် တစ်ကျောင်းတည်းသာ သင်ကြားမည်) သင်တန်းများကို ၃ နှစ်ကြာ သင်ကြားမည်ဖြစ်သည်။ သင်တန်းပြီးဆုံးလျှင် ဒီပလိုမာအောင်လက်မှတ် ပေးမည်ဖြစ်သည်။

လျှောက်လွှာများကို နိုဝင်ဘာလ ၁၀ ရက် နောက်ဆုံးသတ်မှတ်ထားသည်။

အင်းစိန် ဂျီတီအိုင်ကို ယခုနှစ်မှ ပြန်လည် ဖွင့်လှစ်မည်ဖြစ်ရာ ယင်းကျောင်းပြန်ဖွင့်ရေး၊ အဆင့်မြှင့်တင်ရေး အစိုးရက ကျပ် ၃ ဒသမ ၅ ဘီလီယံ သုံးစွဲမည်ဖြစ်ပြီး ဂျာမနီအစိုးရက နည်းပညာနှင့် ငွေကြေး (မည်မျှပါဝင်မည်ကို မပြော) ပူးပေါင်းပါဝင်ကူညီမည် ဖြစ်သည်။

အဆိုပါကျောင်းကို ၁၈၉၅ ခုနှစ်က ရန်ကုန်မြို့၊ လသာမြို့နယ် မြို့မကျောင်းလမ်းတွင် Government Engineering School အမည်ဖြင့် စတင် ဖွင့်လှစ်ခဲ့ရာ ကျောင်းသား ၆ ဦး တက်ရောက်ခဲ့သည်။

ထို့နောက် ၁၉၀၈ ခုနှစ်တွင် Government School and Technical High School အမည်ပြောင်းကာ အင်းစိန်ကို နေရာပြောင်းရွှေ့ခဲ့သည်။

မြဇာခြည်သင်း

  • TAGS