News

POST TYPE

NEWS

တက္ကသိုလ်ဆရာ တစ်သောင်းကျော် လစ်လပ်
ရန်ကုန်၊ အောက်တိုဘာ ၁၇

တစ်နိုင်ငံလုံးရှိ ဝိဇ္ဇာ သိပ္ပံ တက္ကသိုလ်များနှင့် ဒီဂရီကောလိပ်များတွင် လက်ထောက်ကထိကအဆင့်မှ ပါမောက္ခအဆင့်အထိ တက္ကသိုလ်ဆရာ တစ်သောင်းကျော် လစ်လပ်နေပြီး သတ်မှတ်ချက်နှင့် ကိုက်ညီသည့်ဆရာများကို လာမည့် ဒီဇင်ဘာ ကျောင်းဖွင့်အမီ နိုဝင်ဘာလကုန်တွင် တိုးမြှင့်ခန့်ထားမည်ဖြစ်ကြောင်း အဆင့်မြင့်ပညာဦးစီးဌာန ဒုညွှန်/ချုပ် ဒေါက်တာ အောင်အောင်မင်းက The Voice သို့ ပြောကြားသည်။

ဝိဇ္ဇာ၊ သိပ္ပံတက္ကသိုလ်များတွင် ဘာသာရပ် ၄၆ ခုအတွက် ပါမောက္ခ ၁၄၉ ဦး၊ တွဲဖက်ပါမောက္ခ ၉၈၂ ဦး၊ ကထိကရာထူး ၁၇၉၂ ဦးနှင့် လက်ထောက်ကထိက ရာထူး ၈၇၁၉ ဦး လစ်လပ်နေပြီး အဆိုပါ လစ်လပ်နေသည့် ပမာဏသည် တက္ကသိုလ်၊ ဘာသာရပ်၊ ရာထူးနေရာ အချိုးအစားအရ နှိုင်းယှဉ်ကြည့်လျှင် မများဘဲ နည်းပင်နည်းနေသေးကြောင်း ၎င်းက ပြောကြားသည်။

ပညာရေးဝန်ကြီးဌာနကို ယခင်က သီးခြားစီ ရှိခဲ့သော သိပ္ပံနှင့် နည်းပညာဝန်ကြီးဌာနနှင့် ဝန်ကြီးဌာနတစ်ခုတည်းအဖြစ် ပေါင်းစည်းပြီး နောက်ပိုင်း တက္ကသိုလ်များလည်း ပေါင်းစည်းခဲ့သဖြင့် အဆင့်မြင့်ပညာ ဦးစီးဌာနလက်အောင်တွင် တက္ကသိုလ်၊ ဒီဂရီကောလိပ်၊ ကောလိပ် ၁၅၈ ခုဖြင့် ၂၀၁၆ ခုနှစ်တွင် ပြင်ဆင် ဖွဲ့စည်းခဲ့သည်။

ယင်းအနက် ဝိဇ္ဇာ၊ သိပ္ပံတက္ကသိုလ်၊ ဒီဂရီကောလိပ် ၄၈ ကျောင်းရှိကြောင်း အဆင့်မြင့်ပညာဦးစီးဌာန ညွှန်ကြားရေးမှူးချုပ် ဒေါက်တာသိန်းဝင်း၏ ယခုနှစ် ဇွန်လကုန်ပိုင်းက ပြုစုတင်ပြသည့် တက္ကသိုလ် ဆရာ၊ ဆရာမများ၏ ရာထူးတိုးနှင့် ပြောင်းရွှေ့ရေးမူများ သတ်မှတ်နိုင်ရေး စာတမ်းတွင် ဖော်ပြပါရှိသည်။

မြဇာခြည်သင်း