News

POST TYPE

NEWS

ဂျပန်တိုယိုတာကုမ္ပဏီ သီလဝါ၌ ကားစက်ရုံဆောက်ရန် ဆွေးနွေး
20-Sep-2017 tagged as မော်တော်ယာဉ်

ရန်ကုန်၊ စက်တင်ဘာ ၂၀

မြန်မာနှင့်ဂျပန်တို့ ပူးပေါင်းအကောင် အထည်ဖော်လျက်ရှိသည့် သီလဝါအထူး စီးပွားရေးဇုန်တွင် ဂျပန်နိုင်ငံ၏ ထိပ်တန်း မော်တော်ယာဉ် ကုမ္ပဏီ တိုယိုတာက လာရောက် ရင်းနှီးမြှုပ်နှံ၍ စက်ရုံဆောက်ရန် ဆွေးနွေးမှုများရှိကြောင်း သီလဝါ အထူးစီးပွားရေးဇုန် စီမံခန့်ခွဲမှု ကော်မတီထံမှ သိရသည်။

မြန်မာနိုင်ငံတွင် မော်တော်ယာဉ်အသစ် ထုတ်လုပ်မှု လုပ်ဆောင်နိုင်ရန်အတွက် အစိုးရ၏ မော်တော်ယာဉ် တင်သွင်းမှုနှင့် ပတ်သက်သည့် ကားမူဝါဒအပေါ်တွင် မူတည်နေကြောင်း အဆိုပါ စီမံခန့်ခွဲမှု ကော်မတီ၏ အတွင်းရေးမှူး ဦးရွှေဟိန်းက ပြောကြားသည်။

“ကားအသစ် ထုတ်မယ်ဆိုတော့ အစိုးရရဲ့ပေါ်လစီအပေါ်မှာ အများကြီး မူတည်တာပေါ့။ တိုယိုတာသာ လာမယ်ဆိုရင်တော့ သူနဲ့တွဲပါလာမယ့် ကုမ္ပဏီက ရာနဲ့ချီ လိုက်လာမှာဆိုတော့ နိုင်ငံအတွက် တော်တော်ကို အထောက်အကူပြုနိုင်မယ်”ဟု ၎င်းက ပြောဆိုသည်။

ယင်းသို့ ရင်းနှီးမြှုပ်နှံမှုများ လာရောက်ရန် ရှိနေသည့် အခြေအနေများနှင့် ပတ်သက်ပြီး သီလဝါ အထူးစီးပွားရေးဇုန် စီမံခန့်ခွဲမှု ကော်မတီနှင့် ပြည်ထောင်စု အစိုးရတို့အကြား ဆွေးနွေးနေမှုများ ရှိကြောင်း ၎င်းကဆိုသည်။

“ကားအဟောင်း တင်သွင်းမှုကို ပိတ်မှာလား၊ တင်သွင်းမှု အရေအတွက် လျှော့ချမှာလားပေါ့။ အဲဒီလို အခြေအနေမျိုးမှ သူတို့ ရင်းနှီးမြှုပ်နှံနိုင်မှာ။ အစိုးရနဲ့လည်း ဆွေးနွေးနေတယ်။ ဒီကိစ္စကလည်း တစ်ဆင့်ချင်း သွားရမှာဆိုတော့ အချိန်တော့ယူရမယ်”ဟု ဦးရွှေဟိန်းက ပြောကြားသည်။

ယင်းသို့သော ရင်းနှီးမြှုပ်နှံမှုများ ဝင်ရောက်လာပါက နိုင်ငံ၏ စီးပွားရေး ဖွံ့ဖြိုးတိုးတက်ရေးအတွက် အထောက်အကူ ဖြစ်နိုင်မည့်အပြင် ပြည်တွင်း၌ အလုပ်အကိုင် အခွင့်အလမ်းများပါ ရရှိနိုင်မည်ဖြစ်ကြောင်း မြန်မာ့မော်တော်ယာဉ် ထုတ်လုပ်ရေးနှင့် ဖြန့်ဖြူးရောင်းချရေးအသင်း အတွင်းရေးမှူး ဦးမျိုးဇင်ဝင်းက ပြောကြားသည်။

“သူတို့လာပြီး ရင်းနှီးမြှုပ်နှံနိုင်မယ်ဆိုရင် နိုင်ငံ့စီးပွားရေးအတွက်ရော၊ ပြည်သူတွေ အတွက်ရောပါ ကောင်းတာပေါ့။ ဒီမှာပဲ ထုတ်မယ်၊ ပြည်တွင်းဈေးကွက်ကိုလည်း ဖြန့်မယ်ဆိုရင် ပြည်သူတွေအတွက် ကားအသစ်တွေကို ဈေးသက်သက်သာသာ စီးနိုင်မယ့် အနေအထား ဖြစ်လာနိုင်တာပေါ့”ဟု ၎င်းကဆိုသည်။

လက်ရှိအချိန်တွင်လည်း မြန်မာနိုင်ငံ၌ ဂျပန်နိုင်ငံအခြေစိုက် မော်တော်ယာဉ် ကုမ္ပဏီများဖြစ်သည့် ဆူဇူကီးနှင့် Nissan တို့က မော်တော်ယာဉ် တပ်ဆင် ထုတ်လုပ်သည့် လုပ်ငန်းများ လုပ်ကိုင်လျက်ရှိသည်။

ပြည်ပမှ တစ်ဦးချင်းပါမစ် (Free Permit) ဖြင့် တင်သွင်းသည့် မော်တော်ယာဉ်များကို ရန်ကုန်လိုင်စင် ထုတ်မပေးသော်လည်း ပြည်တွင်း၌ တပ်ဆင်ထုတ်လုပ်သည့် မော်တော်ယာဉ်များကိုမူ ရန်ကုန် လိုင်စင် ထုတ်ပေးလျက်ရှိသည်။

J-01