News

POST TYPE

NEWS

ယာဉ်စီးခထဲမှ သုံးမရသည့် ငွေစက္ကူ တစ်လလျှင် ကျပ် ၁၄ သိန်းခန့်ရှိ
20-Aug-2017 tagged as YBS


ရန်ကုန်၊ ဩဂုတ် ၂၀

ရန်ကုန်မြို့တွင်း ခရီးသည်များက ယာဉ်စီးခအဖြစ် ပေးသော ငွေစက္ကူများထဲမှ သုံးမရသော ငွေစက္ကူမှာ တစ်လလျှင် ကျပ် ၁၄ သိန်းခန့်ရှိကြောင်း ရန်ကုန်မြို့ပြ အများပြည်သူ သယ်ယူပို့ဆောင် ရေးကုမ္ပဏီ YUPT ထံမှ သိရသည်။

“သုံးလို့ကို မရတော့တဲ့ ငွေအစုတ်တွေကို ဗဟိုဘဏ်မှာ ပြန်လဲနေရတယ်။ ငွေအပြဲတွေကို တိပ်နဲ့ကပ်၊ မီးပူတိုက်ပြီးမှ လဲရတာပါ။ ဒီနေ့အထိ ငွေအစုတ်တွေကို ထည့်တာရှိနေတုန်းပဲ”ဟု YUPT ကုမ္ပဏီ အမှုဆောင်အရာရှိချုပ် ဦးမောင်မောင်လွင်က ဆိုသည်။

ဗဟိုဘဏ်တွင် ငွေစက္ကူ အစုတ်အပြဲများကို တစ်လလျှင် နှစ်ကြိမ် လဲလှယ်ပြီး ဩဂုတ်လ ဒုတိယအပတ်က ငွေစက္ကူအစုတ် ကျပ်ခုနစ်သိန်းဖိုးကို မူလတန်ဖိုးအတိုင်း လဲလှယ်ထားပြီးဖြစ်ကြောင်း ၎င်းက ပြောကြားသည်။

နေ့စဉ် ခရီးသည်များထံမှ ကျပ် တစ်ရာတန်၊ ကျပ် နှစ်ရာတန်နှင့် ကျပ်ငါးရာတန် အပါအဝင် အကြွေကျပ်သိန်း ၆၀ မှ ၁၀ဝ ကြားအထိ ရရှိနေပြီး အဆိုပါအကြွေများကို ခရီးသွားပြည်သူများထံ ပြန်လည်လဲလှယ်ပေးကြောင်း YUPT ကုမ္ပဏီထံမှ သိရသည်။

ထိုအပြင် YBS ယာဉ်လိုင်း ၁၁ လိုင်း တာဝန်ယူ ပြေးဆွဲသည့် ခေတ်သစ်ဘုရင့်နောင် ကုမ္ပဏီတွင်လည်း ခရီးသွား ပြည်သူများအနေနှင့် ငွေစက္ကူအပြဲများ ငွေပုံးအတွင်း ထည့်ခြင်းမှာ တစ်ရက်လျှင် ဆယ်ရာခိုင်နှုန်းခန့်ရှိကြောင်း အဆိုပါ ကုမ္ပဏီထံမှ သိရသည်။

ယာဉ်စီးခ အကြွေမရှိခြင်း ပြဿနာ ပြေလည်ရန် ငွေအကြွေလဲပေးခြင်း လုပ်ငန်းကို ယာဉ်လိုင်း ၂၀ ကျော် ပြေးဆွဲသည့် YUPT ကုမ္ပဏီအပြင် ယာဉ်လိုင်း ခြောက်လိုင်းကို တာဝန်ယူ ပြေးဆွဲသော Omni Focus ကုမ္ပဏီနှင့် YBS 22 ယာဉ်လိုင်း ပြေးဆွဲသည့် ခေတ်သစ်ငြိမ်းချမ်းရေး ကုမ္ပဏီတို့လည်း နေ့စဉ် ငွေအကြွေများ လဲပေးနေကြောင်း အဆိုပါ ကုမ္ပဏီများထံမှ သိရသည်။

ဗဟိုဘဏ်က ခရီးသည်များ အကြွေ ရှားပါးမှုပြဿနာ ပြေလည်စေရန် အကြွေ ကျပ် ၁၈ ဘီလီယံခန့်ကို ဩဂုတ်လအတွက် အစိုးရဝန်ထမ်းများ လစာပေးရာတွင် ထည့်သွင်းပေးမည်ဖြစ်ပြီး ကျပ် တစ်ရာတန်၊ ကျပ် နှစ်ရာတန်၊ ကျပ် ငါးရာတန်များ ပါဝင်မည်ဖြစ်ကြောင်း ဗဟိုဘဏ်ထံမှ သိရသည်။

YBS ဘတ်စ်ကားများတွင် ယာဉ်နောက်လိုက်များ မထားဘဲ ခရီးသည်များက ငွေပုံးအတွင်းသို့ ကိုယ်တိုင် အကြွေထည့်၍ စီးနင်းရသည့်စနစ်သို့ ပြောင်းလဲချိန်တွင် ရန်ကုန်မြို့၌ အကြွေရှားပါးမှု ပိုမိုဆိုးရွားလာပြီး အများပြည်သူအကြား အကြွေသုံးစွဲနိုင်မှု မြင့်တက်လာစေရန် ဝန်ထမ်းများ လစာပေးရာတွင် အကြွေများ ထည့်သွင်းပေးရန် စီစဉ်ခြင်းဖြစ်ကြောင်း၊ ဗဟိုဘဏ်တွင် ငွေစက္ကူ အကြွေ အလုံအလောက်ရှိကြောင်း ဗဟိုဘဏ်၏ ထုတ်ပြန်ချက်အရ သိရသည်။

J-06