News

POST TYPE

MANDALAY

အိမ်သို့လာကန်တော့သည့် တပည့်ဟောင်းက ကျပ်သိန်း ၈၀ ကျော် လုယူထွက်ပြေး
06-Jul-2019
မန္တလေး၊ ဇူလိုင် ၆

မန္တလေး၊ အမရပူရမြို့နယ်၊ ထုံးဘိုတောင်ကျေးရွာတွင် ဆရာဖြစ်သူ၏နေအိမ်သို့ လာရောက်ကန်တော့သည့် အမျိုးသားက ငွေကျပ်သိန်း ရှစ်ဆယ်ကျော်ကို လုယူထွက်ပြေးမှု ဇူလိုင်လ ၅ ရက်နေ့က ဖြစ်ပွားခဲ့ကြောင်း တိုင်းရဲတပ်ဖွဲ့ထံမှ စုံစမ်းသိရှိရသည်။

ယင်းနေ့က အသက် ၆၅ နှစ်အရွယ် ဒေါ်စန်းမြိုင်သည် နေအိမ်တွင် ညတစ်ဦးတည်းရှိနေစဉ် ခင်ပွန်းဖြစ်သူ၏လုပ်ငန်းခွင်တွင် တပည့်အဖြစ် ပညာသင်ပေးခဲ့ဖူးသူ အသက်၂၆ နှစ်အရွယ် မျိုးမင်းဟန်က လာရောက်ကန်တော့ခဲ့ခြင်းဖြစ်ပြီး ဒေါ်စန်းမြိုင်က မုန့်ဖိုးပေးရန်အတွက် အိပ်ခန်းအတွင်းဝင်ရောက်နေစဉ် ၎င်းကလိုက်လာပြီး လည်ပင်းကိုညှစ်ခဲ့ရာ သတိမေ့သွားစဉ် နေအိမ်အတွင်းရှိ ငွေကျပ် သိန်း ၈,၁၅၀,၀၀၀ ကျပ်ကို လုယူထွက်ပြေးသွားခဲ့ခြင်းဖြစ်ကြောင်း ရဲတပ်ဖွဲ့ထံမှ သိရသည်။

အဆိုပါဖြစ်စဉ်ကို ရဲတပ်ဖွဲ့ထံ တိုင်ကြားသည့်အတွက် ရဲတပ်ဖွဲ့က လိုက်လံစုံစမ်းစဉ် ဒေါ်စန်းမြိုင်၏ နေအိမ်အနီးမှာပင် ဆိုင်ကယ်တစ်စီးနှင့်အတူ တွေ့ရှိခဲ့သဖြင့် စစ်ဆေးခဲ့ရာ လုယူသွားသည့် ပိုက်ဆံများနှင့်အတူ ပြန်လည်ဖမ်းဆီးရမိခဲ့သည်။

ယင်းဖြစ်စဉ်နှင့်ပတ်သက်၍ အသက် ၂၆ နှစ်အရွယ် မျိုးမင်းဟန်ကို မြစ်ငယ်နယ်မြေရဲစခန်းတွင် လုယက်မှု၊ ရာဇသတ်ကြီး ဥပဒေပုဒ်မ ၃၉၄ အရ အမှုဖွင့်စစ်ဆေးလျက်ရှိသည်။

M-04