News

POST TYPE

LOCAL

စိုက်ပျိုးမွေးမြူရေးနှင့် ရေထွက်ကုန်များ ကိုရီးယားဈေးကွက်သို့ တင်ပို့မှုမြှင့်တင်မည်
18-Feb-2019
ရန်ကုန်၊ ဖေဖော်ဝါရီ ၁၈

မြန်မာနိုင်ငံ၏ စိုက်ပျိုးရေး၊ မွေးမြူရေးနှင့် ရေလုပ်ငန်းထွက်ကုန်များ ကိုရီးယားဈေးကွက်သို့တင်ပို့မှု မြှင့်တင်မည်ဖြစ်ကြောင်း ကုန်သည်စက်မှုအသင်းချုပ် (UMFCCI) ထံမှ သိရသည်။

ကိုရီးယားဈေးကွက်သို့ မြန်မာ့ထုတ်ကုန်များ ကုန်သွယ်မှုမြှင့်တင်နိုင်ရေးအတွက် ကိုရီးယားလုပ်ငန်းရှင်များ၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ တာဝန်ရှိသူများနှင့် ပြည်တွင်းလုပ်ငန်းရှင်များပါဝင်သည့် ဆွေးနွေးပွဲတစ်ခုကို ဖေဖော်ဝါရီလ ၁၆ ရက်နေ့တွင် ရန်ကုန်မြို့ရှိ ကုန်သည်စက်မှုအသင်းချုပ်၌ ကျင်းပခဲ့သည်။

မြန်မာနိုင်ငံအနေနှင့် ကိုရီးယားနိုင်ငံသို့ နှမ်းနက်၊ ကဏန်းပျော့နှင့် သစ်သီးဝလံများကို အဓိကတင်ပို့လျက်ရှိသော်လည်း ကိုရီးယားနိုင်ငံ၏ ဈေးကွက်ဝယ်လိုအားပိုများသော အစေ့အဆန်၊ ပဲနှင့် ဟင်းသီးဟင်းရွက်များကို ပိုမိုတင်ပို့ရန် ကြိုးစားသင့်ကြောင်း Kyung Hee University ၏ ပါမောက္ခ Mr. Young-jun Choi က ယင်းဆွေးနွေးပွဲတွင် အကြံပြုဆွေးနွေးခဲ့သည်။

မြန်မာက ကိုရီးယားနိုင်ငံတွင် Myanmar Trade Center တစ်ခုဖွင့်လှစ်ထားပြီဖြစ်ကာ ယင်းစင်တာမှ မြန်မာထုတ်ကုန်များကို ကိုရီးယားဈေကွက်တွင် စတင်ရောင်းချနေပြီး ကုန်သွယ်မှုများတိုးတက်အောင် လုပ်ဆာင်သွားမည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနထံမှ သိရသည်။

ကိုရီးယားနိုင်ငံက လယ်ယာထွက်ကုန်၊ မွေးမြူရေးထွက်ကုန်များကို ပြည်ပနိုင်ငံများမှ တင်သွင်းမှုသည် တစ်နှစ်လျှင် အမေရိကန်ဒေါ်လာ ၁၂ ဘီလီယံမှ ၁၄ ဘီလီယံအထိရှိပြီး မြန်မာကလည်း နှမ်းနက်အပါအဝင် အခြားထွက်ကုန်များကို တင်ပို့လျက်ရှိသည်။

J-01