News

POST TYPE

LOCAL

ပြင်ပဈေးကွက်နှင့် ဗဟိုဘဏ် ဒေါ်လာသတ်မှတ်ချက်နှုန်းကွာဟမှု အမြင့်ဆုံးသို့ရောက်
10-Oct-2018
ရန်ကုန်၊ အောက်တိုဘာ ၉

ဗဟိုဘဏ်က ထိန်းချုပ်နှုန်းရှင် (Managed Floating) စနစ်ကို ဖြုတ်လိုက်ပြီးနောက်ပိုင်း ပြင်ပဈေးကွက်နှင့် ဗဟိုဘဏ်အကြား ဒေါ်လာသတ်မှတ်ဈေးနှုန်း ကွာဟမှုအမြင့်ဆုံးသို့ ရောက်ရှိကြောင်း ငွေကြေးဈေးကွက်အတွင်းမှ သိရသည်။

ဗဟိုဘဏ်ကသတ်မှတ်သည့် ဒေါ်လာလဲနှုန်းကို ပြင်ပငွေလဲကောင်တာများနှင့် ဘဏ်များက သုည ဒသမ ၈ ရာခိုင်နှုန်းအတွင်းသာ အတိုးအလျှော့ ပြုလုပ်ရောင်းချခွင့်ကို ဩဂုတ်လ ၁၃ ရက်နေ့က ပယ်ဖျက်လိုက်ပြီးနောက်ပိုင်း ယခုအခါ ပြင်ပဈေးနှင့် ဗဟိုဘဏ် သတ်မှတ်ဈေးသည် တစ်ဒေါ်လာ ၅၅ ကျပ်အထိ ကွာဟလျက်ရှိသည်။

ဒေါ်လာလဲနှုန်းသတ်မှတ်ချက်ကို ဗဟိုဘဏ်က ၂၀၁၂ ခုနှစ်အတွင်းက စတင်ခဲ့သော်လည်း ပြင်ပငွေလဲကောင်တာများက လိုက်နာမှုမရှိဘဲ ပြင်ပပေါက်ဈေးဖြင့်သာ ရောင်းချခဲ့ကြောင်း၊ သို့သော် ယခုကဲ့သို့ ဈေးနှုန်းကွာဟချက်မများခဲ့ကြောင်း ငွေကြေးဈေးကွက် ကျွမ်းကျင်သူများက ဆိုသည်။

ထို့ပြင် ပြင်ပဒေါ်လာဈေးသည်လည်း ဆက်တိုက်မြင့်တက်နေသော်လည်း ဗဟိုဘဏ်ဈေးမှာ အနည်းငယ်သာ မြင့်တက်လျက်ရှိကြောင်း ငွေကြေးဈေးကွက်အတွင်းမှ သိရသည်။

ပြင်ပဒေါ်လာဈေးသည် အောက်တိုဘာလ ၄ ရက်နေ့ကထက် အောက်တိုဘာ ၈ ရက်က တစ်ဒေါ်လာလျှင် ၃၅ ကျပ် မြင့်တက်နေရာမှ အောက်တိုဘာလ ၉ ရက် နေ့၌ တစ်ဒေါ်လာ ၁၀ ကျပ် ထပ်မံမြင့်တက်လာသည့်အတွက် ၄ ရက်အတွင်း (တနင်္ဂနွေမပါ) တစ်ဒေါ်လာလျှင် ၄၅ ကျပ်အထိ မြင့်တက်ကြောင်း ငွေကြေးဈေးကွက်အတွင်းမှ သိရသည်။

ပို့ကုန်မှရရှိသည့် နိုင်ငံခြားငွေ (Earning) ဈေးနှုန်းမြင့်တက်ခြင်းကြောင့် ပြင်ပဈေးနှုန်းလိုက်ပါမြင့်တက်ခြင်းဖြစ်ပြီး ထိုဈေးနှုန်းများ မြင့်တက်မှုများပြားနေသော်လည်း ဗဟိုဘဏ် သတ်မှတ်ဈေးမှာ အောက်တိုဘာလ ၈ ရက်နေ့ကထက် တစ်ဒေါ်လာ ၅ ကျပ်သာ တိုး၍ သတ်မှတ်ထားကြောင်း ငွေကြေးဈေးကွက်အတွင်းမှ သိရသည်။

လက်ရှိဒေါ်လာဈေးကွက်အတွင်း ပြင်ပဈေးသည် တစ်ဒေါ်လာလျှင် ၁၅၆၀ ကျပ်၊ ပုဂ္ဂလိကဘဏ်ဈေးသည် တစ်ဒေါ်လာလျှင် ၁၅၆၀ ကျပ်နှင့် ဗဟိုဘဏ်ဈေးသည် တစ်ဒေါ်လာလျှင် ၁၅၀၅ ကျပ်ဈေးရှိကြောင်း အဆိုပါဈေးကွက်အတွင်းမှ သိရသည်။

S-04