News

POST TYPE

LOCAL

မြန်မာကို တရားစွဲဆိုနိုင်ရေးအတွက် ICC တွင် အဖွဲ့တစ်ဖွဲ့ ဖွဲ့ရန် ကုလလူ့အခွင့်အရေးအကြီးအကဲသစ် အကြံပြု
12-Sep-2018
ဂျနီဗာ-ရန်ကုန်၊ စက်တင်ဘာ ၁၁

ရခိုင်ပြည်နယ်မြောက်ပိုင်း ဘင်္ဂါလီဒုက္ခသည်များ လူမျိုးတုံးရှင်းလင်းခံရသည်ဟူသော စွပ်စွဲချက်များနှင့်ပတ်သက်၍ ပြစ်မှုကျူးလွန်သူများကို ဥပဒေကြောင်းအရ အရေးယူဆောင်ရွက်နိုင်မည့် အဖွဲ့တစ်ဖွဲ့ အမြန်ဆုံးဖွဲ့စည်းရန် ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး မစ္စမစ်ရှဲလ်ဘားရှက်လက်က အကြံပြုပြောကြားလိုက်ကြောင်း AFP သတင်းဌာနက ရေးသားဖော်ပြသည်။ 

အဆိုပါ ကုလသမဂ္ဂလူ့အခွင့်အရေးဆိုင်ရာ အကြီးအကဲရာထူးကို စက်တင်ဘာလ ၁ ရက်နေ့က စတင်ရယူခဲ့ပြီးနောက်ပိုင်း ပထမဆုံးမိန့်ခွန်းပြောဆိုရာ၌ မစ္စမစ်ရှဲလ် ဘားရှက်လက်က “မြန်မာ့အရေးကိစ္စအတွက် လွတ်လပ်မှုရှိတဲ့ နိုင်ငံတကာအဖွဲ့အစည်းတစ်ရပ် ထူထောင်ဖို့ လိုပါတယ်။ နိုင်ငံတကာ ရာဇဝတ်မှု ကျူးလွန်တယ်ဆိုတဲ့ သက်သေအထောက်အထားတွေကို လေ့လာဆန်းစစ်ဖို့၊ ပြည်တွင်းနဲ့ နိုင်ငံတကာခုံရုံးတွေမှာ လွတ်လပ်မျှတပြီး ဘက်လိုက်မှုကင်းတဲ့ တရားစီရင်မှုတွေ လုပ်ဆောင်နိုင်ဖို့ အဖွဲ့တစ်ဖွဲ့ထူထောင်ရမှာ ဖြစ်ပါတယ်”ဟု ၎င်းက ပြောကြားသည်။ 

“အဲဒီကိစ္စကို အထွေထွေညီလာခံအနေနဲ့ ထောက်ခံသွားနိုင်ရေးအတွက် အထွေထွေညီလာခံကို တင်ပြသွားနိုင်အောင် လုံခြုံရေးကောင်စီဘက်က ဆုံးဖြတ်ချက်တစ်ရပ်ကို ချမှတ်ပေးဖို့ ကျွန်မအနေနဲ့ တိုက်တွန်းလိုပါတယ်။ အဲဒါမှ အဲဒီလွတ်လပ်တဲ့ အဖွဲ့တစ်ဖွဲ့ကို ထူထောင်နိုင်မှာဖြစ်ပါတယ်”ဟု ၎င်းက ပြောကြားသည်။ 

မစ္စမစ်ရှဲလ်ဘားရှက်လက် ညွှန်းဆိုသည့် အဖွဲ့မျိုးကို ဆီးရီးယားစစ်မက်ပဋိပက္ခနှင့်ပတ်သက်၍ ဖွဲ့စည်းထူထောင်ထားပြီးဖြစ်သည်။ 

ကုလသမဂ္ဂအချက်အလက် ရှာဖွေရေးမစ်ရှင်ကမူ ပြီးခဲ့သည့် ဩဂုတ်လအတွင်းက အစီရင်ခံစာတစ်ရပ်ထုတ်ပြန်ပြီး မြန်မာနိုင်ငံမှ တပ်မတော်ကာကွယ်ရေးဦးစီးချုပ် အပါအဝင် ထိပ်ပိုင်းတပ်မတော်အရာရှိကြီး ငါးဦးကို လူမျိုးတုံးရှင်းလင်းမှု၊ လူသားမျိုးနွယ်အပေါ် ရာဇဝတ်ကျူးလွန်မှုတို့ဖြင့် နိုင်ငံတကာရာဇဝတ်ခုံရုံးတွင် တရားစွဲဆိုအရေးယူနိုင်သည့် သက်သေအထောက်အထား လုံလုံလောက်လောက်ရှိထားပြီ ဖြစ်သည်ဟု အကြံပြုခဲ့သည်။ 

ယခင် ချီလီနိုင်ငံသမ္မတအဖြစ် တာဝန်ထမ်းဆောင်ခဲ့ဖူးသူ လူ့အခွင့်အရေး အကြီးအကဲ မစ္စမစ်ရှဲလ်ဘားရှက်လက်က ယင်းအဖွဲ့သစ်အနေနှင့် ICC မှ ဥပဒေအရာရှိများ (ရှေ့နေများ) ကနဦးဆန်းစစ် လေ့လာမှုများပြုလုပ်နိုင်အောင် ပံ့ပိုးကူညီသွားမည်ဖြစ်သည်ဟု ပြောကြားသည်။ 

နိုင်ငံတကာရာဇဝတ်ခုံရုံး (ICC) က ဘင်္ဂါလီများကို လူမျိုးတုံးရှင်းလင်းခံရရပြီး ဘင်္ဂလားဒေ့ရှ်ဘက်သို့ မောင်းထုတ်ခံခဲ့ရသည်ဟူသော စွပ်စွဲချက်များနှင့်ပတ်သက်၍ စုံစမ်းဖော်ထုတ်ကာ တရားစီရင် ပိုင်ခွင့်ရှိသည်ဟု ပြီးခဲ့သည့် သီတင်းပတ်က ကြေညာချက်တစ်ရပ် ထုတ်ပြန်ခဲ့သေးသည်။ 

ICC ၏ ဥပဒေရေးရာအရာရှိနှင့် ရှေ့နေဖြစ်သူ ဖာတိုဘန်ဆိုဒါက ယင်းကိစ္စနှင့်ပတ်သက်၍ အဆိုပြုတင်ပြခဲ့ပြီးနောက် တရားသူကြီးသုံး ဦးပါဝင်သည့် ပဏာမ တရားစီရင်ရေးခုံအဖွဲ့က ယင်းသို့ ဆုံးဖြတ်ချက်ချမှတ်ကာ ကြေညာခဲ့ခြင်းလည်းဖြစ်သည်။ 

မြန်မာနိုင်ငံသည် သည်ဟိတ် (Hague) အခြေစိုက် အဆိုပါ နိုင်ငံတကာခုံရုံး၏ အဖွဲ့ဝင်နိုင်ငံမဟုတ်သော်လည်း ICC အနေနှင့် တရားစီရင်ပေးနိုင်ကြောင်း၊ အကြောင်းမှာ စွပ်စွဲထားသည့် ရာဇဝတ်မှုနှင့်ပတ်သက်၍ အခရာကျသောကိစ္စမှာ ဘင်္ဂလားဒေ့ရှ်ပိုင်နက်တွင် ဖြစ်ပွားခဲ့သောကြောင့်ဖြစ်ကြောင်း မစ္စဖာတိုဘန်ဆိုဒါက အဆိုပြုပြောဆိုခဲ့သည်။ ဘင်္ဂလားဒေ့ရှ်နိုင်ငံမှာ ICC ၏ အဖွဲ့ဝင်နိုင်ငံဖြစ်သည်။ 

F-01


  • VIA