News

POST TYPE

LOCAL

အကြမ်းဖက်ဖောက်ခွဲရေးသမားနှစ်ဦး မြန်မာနိုင်ငံအတွင်း ရောက်ရှိဟုဆို
17-Jul-2017 tagged as အကြမ်းဖက်

ရန်ကုန်၊ ဇူလိုင် ၁၆

ပြည်ပအခြေစိုက် အကြမ်းဖက် အဖွဲ့အစည်းများနှင့် ချိတ်ဆက်၍ မြန်မာနိုင်ငံအတွင်း အကြမ်းဖက်ဖောက်ခွဲမှုများ ပြုလုပ်ရန် ပြန်လည်ဝင်ရောက်လာသော မြန်မာနိုင်ငံသားနှစ်ဦး၏ ဓာတ်ပုံများကို ဖြန့်ဝေ၍ ဖမ်းဆီးစစ်ဆေးနိုင်ရန် လိုက်လံစုံစမ်းဆောင်ရွက်နေကြောင်း မြန်မာနိုင်ငံရဲတပ်ဖွဲ့မှ အကြီးတန်း ရဲအရာရှိကြီးတစ်ဦးက ပြောကြားသည်။

“ဖောက်ခွဲရေးသမားနှစ်ယောက် မြန်မာနိုင်ငံထဲ ရောက်ရှိနေတာကို အင်တာပိုနဲ့ ချိတ်ဆက်ပြီး သတင်းရခဲ့တယ်။ လက်ရှိ သူတို့နှစ်ယောက် ရှမ်းပြည်နယ်မြောက်ပိုင်းမှာ ရှိနေတယ် သတင်းရလို့ မြေလှန်ရှာနေတယ်။ သူတို့နှစ်ယောက်ရဲ့ ဓာတ်ပုံကိုလည်း ရှမ်းမြောက်ပိုင်းမှာရှိတဲ့ လူစည်ကားရာ နေရာတွေမှာ ချိတ်ဆွဲပေးထားတယ်။ တွေ့ရင် ပြည်သူတွေ သတင်းပေးနိုင်အောင်လို့ပါ” ဟု ၎င်းက ဆိုသည်။

အဆိုပါ ဖောက်ခွဲရေးသမားနှစ်ဦးမှာ အသက် ၂၀ နှစ်ဝန်းကျင် ရှိပြီး ၎င်းတို့ မည်သည့်အဖွဲ့အစည်းနှင့် ပတ်သက်နေသည်ကိုမူ လတ်တလော သတင်းထုတ်ပြန်ပေးနိုင်ခြင်း မရှိသေးကြောင်း ရဲတပ်ဖွဲ့ထံမှ သိရသည်။

လာမည့် ဇူလိုင်လ ၁၉ ရက်နေ့တွင် ကျရောက်မည့် အာဇာနည်နေ့မတိုင်မီ မြန်မာနိုင်ငံတစ်ဝန်း၌ မလိုလားအပ်သည့် ပဋိပက္ခများနှင့် အကြမ်းဖက်မှုများ မဖြစ်ပွားစေရန် ရဲတပ်ဖွဲ့က လုံခြုံရေး အထူးတိုးမြှင့် ဆောင်ရွက်ထားကြောင်း မြန်မာနိုင်ငံရဲတပ်ဖွဲ့ ဌာနချုပ်ထံမှ စုံစမ်းသိရှိရသည်။

S-03