POST TYPE

LATEST NEWS POST

ဆူကဋ္ဌများ

ဆူတတ်သည့် ဥက္ကဋ္ဌကြီးတို့ကို ဆူကဋ္ဌဟု အမည်ပေးကြည့်ပါမည်။

ထိုသူတို့မှာ လက်ရှိ ပြည်သူ့လွှတ်တော် ဥက္ကဋ္ဌ ဦးဝင်းမြင့်နှင့် အမျိုးသားလွှတ်တော် ဥက္ကဋ္ဌလည်းဖြစ်၊ ပြည်ထောင်စုလွှတ်တော် နာယကကြီးလည်း ဖြစ်သူ မန်းဝင်းခိုင်းသန်းတို့ ဖြစ်သည်။

အစည်းအဝေးနောက်ကျခြင်း၊ ဝတ်စားဆင်ယင်မှု အချိုးမကျခြင်း၊ အနေအထိုင် မတည့်ခြင်းတို့မှသည် စကားပြောဆိုမှုများနှင့် ပတ်သက်၍ လက်အောက်ရှိ လွှတ်တော်ကိုယ်စားလှယ်များကို သတိပေးတတ်သည်။ တစ်နည်းအားဖြင့် ဆူတတ်သည်။

နောက်ဆုံးနှင့် လူသိများဆုံးဖြစ်ရပ်မှာ တတိယပုံမှန် လွှတ်တော်အစည်းအဝေး ကာလ ဖြစ်သည့် ဒီဇင်ဘာလ ၂၀  ရက်နေ့က ဖြစ်သည်။

ကောလင်းမြို့နယ် ပြည်သူ့လွှတ်တော် ကိုယ်စားလှယ် ဦးမျိုးဇော်အောင်က အစည်းအဝေးချိန်အတွင်း ဂျာနယ်တစ်စောင်ကို ဖတ်ရှုနေမှုကို ဥက္ကဋ္ဌ ဦးဝင်းမြင့်က မြင်တွေ့သွားသည်။
“ဦးမျိုးဇော်အောင် လွှတ်တော်ထဲမှာ ဂျာနယ်ဖတ်ဖို့ မဟုတ်ဘူးနော်” ဟု ၎င်းက ဥက္ကဋ္ဌနေရာ စင်မြင့်ထိုင်ခုံမှနေ၍ သတိပေးစကား ဆိုသည်။

တီဗီဖန်သားပြင်မှ မြင်ရသည့် ဥက္ကဋ္ဌ၏ မျက်နှာသွင်ပြင်နှင့် အသံအနေအထားအရ သတိပေးစကားတို့တွင် ဒေါသစွက်နေကြောင်း တွေ့ရသည်။

ယင်းသတင်းက တစ်မုဟုတ်ချင်းပင် သတင်းမီဒီယာများ၏ အင်တာနက် လူမှုကွန်ရက် စာမျက်နှာများတွင် ပျံ့နှံ့သွားပြီး လူအများ စိတ်ဝင်စားစရာ ဖြစ်သွားသည်။

၂၀၁၅ ရွေးကောက်ပွဲပြီးနောက် အနိုင်ရ အမျိုးသားဒီမိုကရေစီအဖွဲ့ချုပ်ပါတီ (NLD) ၏ ကိုယ်စားလှယ်များ ဖြစ်သည့် ဦးဝင်းမြင့်နှင့် ကရင်တိုင်းရင်းသားတစ်ဦး ဖြစ်သူ မန်းဝင်းခိုင်သန်းတို့က ငါးနှစ်ကြာ ကျင်းပမည့် လွှတ်တော်အစည်းအဝေးများ၏ ဥက္ကဋ္ဌများ ဖြစ်လာခဲ့ခြင်း ဖြစ်သည်။

ဖေဖော်ဝါရီလ ၁ ရက်နေ့က စတင်ခဲ့သည့် ဒုတိယအကြိမ် ပြည်ထောင်စုလွှတ်တော် အနေနှင့် ပုံမှန်အစည်းအဝေးများကို သုံးကြိမ်တိုင် ကျင်းပခဲ့ပြီး ဖြစ်သည်။ ယင်းကာလအတွင်း လွှတ်တော်ကိုယ်စားလှယ်များ၏ ပြောဆိုမှု၊ ဆင်ယင်မှု၊ အမူအကျင့်များ စသည်တို့နှင့် ပတ်သက်၍  ဥက္ကဋ္ဌတို့က သတိပေးခဲ့သည်ကို မကြာခဏ တွေ့ရသည်။

စက်တင်ဘာလ အတွင်းက တပ်မတော်သား ကိုယ်စားလှယ်အချို့နှင့် NLD ကိုယ်စားလှယ်အချို့ အစည်းအဝေးခန်းသို့ သုံးမိနစ်ခန့် နောက်ကျပြီး ရောက်ရှိမှုကို “အစည်းအဝေး ကျင်းပချိန်ကို လေးစားလိုက်နာဖို့ ပြောကြားလိုပါတယ်။ အခုမှ ဝင်လာတာ နှစ်ဆယ်၊ အစိတ်လောက် ရှိပါတယ်။ ဒါဟာ လွှတ်တော်ခန်းမ၊ လွှတ်တော်အစည်းအဝေး ဆိုတာကို လေးလေးနက်နက် သဘောပေါက်ပါ” ဟု ဦးဝင်းမြင့်က ဆိုခဲ့ဖူးသည်။

မကြာသေးခင် ဒီဇင်ဘာလ ၁၄ ရက်နေ့ကပင် အင်္ကျီလည်ကတုံး အဖြူရောင် မဝတ်ဆင်သည့် ဒီပဲရင်းမြို့နယ်မှ NLD ၏ ကိုယ်စားလှယ် ဦးဝင်းမြင့်အောင်ကိုလည်း သတိပေးသေးပြန်သည်။ လွှတ်တော်အစည်းအဝေးများတွင် အမျိုးသားဝတ်စုံများ ဝတ်ဆင်ရန် စည်းကမ်းသတ်မှတ်ထားပြီး မြန်မာတိုင်းရင်းသားများ အနေနှင့် တိုက်ပုံ၊ လည်ကတုံးနှင့် ခေါင်းပေါင်းကို ဆင်မြန်းရမည် ဖြစ်သည်။

ကိုယ်စားလှယ်တစ်ဦး စည်းကမ်းပျက်ခြင်းမှသည် နောက်လူများပါ ကူးစက်သွားမည်ကို မလိုလားကြောင်း ဦးဝင်းမြင့်က အောက်ပါအတိုင်း ပြောဆိုသည်။
“ငါးခုံးမ တစ်ကောင်ကြောင့် တစ်လှေလုံး အပုပ်မခံနိုင်ပါဘူး။ အဲဒါမြဲမြဲသတိထားပါ။ ကျွန်တော် သတိပေးပါတယ်” ဟု ဆိုသည်။

ကိုယ်စားလှယ်များက မေးမြန်သည့် မေးခွန်းများကို လာရောက်ဖြေကြားသည့် ပြည်ထောင်စု အစိုးရအဖွဲ့ဝင် ဝန်ကြီးများ၏ ဖြေကြားမှုများကိုလည်း ဥက္ကဋ္ဌက သဘောကျ ကျေနပ်ခြင်း မပြုခဲ့သည်တို့ကလည်း မကြာခဏ။ ဝန်ကြီးများ အနေနှင့် အဖြေများကို တိကျစွာ ဖြေဆိုရန်၊ လွှတ်တော်ကိုယ်စားလှယ်များ၏ လုပ်ပိုင်ခွင့်ကို နားလည်သဘောပေါက်ရန်နှင့် နားမလည်ပါက လေ့လာထားရန် စသည့် သတိပေးမှုများ ရှိခဲ့သည်။

အများစုက ယင်းသို့ မကြာခဏ သတိပေးခြင်းကို ငြိမ်သက်တိတ်ဆိတ်စွာ ရှိကြပါသည်။

ဂျာနယ်ဖတ်မှုနှင့် ပတ်သက်၍ သတိပေးခံရသည့် ဦးမျိုးဇော်အောင်သည်လည်း ၎င်းက အပြစ်ကို ဝန်ခံခဲ့သည့်အပြင် အများပြည်သူသို့ပင် တောင်းပန်စကား ဆိုလိုက်သေးသည်။ 

သူ့အနေနှင့် လွှတ်တော်အစည်းအဝေးကို မလေးမစားလုပ်ခြင်း မဟုတ်ဘဲ ဂျာနယ်တွင် ပါရှိသည့် သတင်းတစ်ပုဒ်အပေါ် စိတ်ဝင်စားမှု အရှိန်လွန်သွားကြောင်းဟု ၎င်းက လူမှုကွန်ရက်မှ တစ်ဆင့် ရှင်းပြသည်။ (အစည်းအဝေးအတွင်း ကိုယ်စားလှယ်တစ်ဦးက ဆွေးနွေးမေးမြန်းမှု ပြုလုပ်နေစဉ် အဆိုပါ ကိုယ်စားလှယ်၏ နောက်နားကပ်လျက်တွင် ရှိနေသည့် ဦးမျိုးဇော်အောင်က ရှိနေခြင်းဖြစ်ရာ ဥက္ကဋ္ဌ အပါအဝင် တီဗီကြည့် ပရိသတ်က သူ့ကို အထင်သား မြင်သာသည်။)

ယင်းသတင်းသည် သာမန်သတင်း မဟုတ်။ ယခု လွှတ်တော်ဥက္ကဋ္ဌကြီး ဦးဝင်းမြင့်နှင့် ဒုသမ္မတတို့ ဒဏ်ရာရ စစ်သားများကို အားပေးသည့်သတင်း ဖြစ်ကြောင်း ၎င်းက ဓာတ်ပုံများနှင့်တကွ သက်သေပြ ဖြေရှင်းခြင်း ဖြစ်သည်။

“TV မျက်နှာစာပေါ်တွင် ပေါ်လာသည့်အတွက် ပြင်းထန်သော သတိပေးမှုကို ခံရခြင်း ဖြစ်ပါသည်။ ထိုအတွက် ကျွန်တော်၏ မဲဆန္ဒရှင်များကို တောင်းပန်အပ်ပါသည်” ဟု ဦးမျိုးဇော်အောင်က ရေးသားခဲ့သည်။

ဥက္ကဋ္ဌက ကိုယ်စားလှယ်များကို သတိပေးမှု ပြုလုပ်ခြင်းသည် ယခုလောက် အသံမညံခဲ့သော်လည်း ယခင်လွှတ်တော်သက်တမ်းကာလ အတွင်းကလည်း ရှိခဲ့သည်သာ။

လွှတ်တော်အစည်းအဝေး အတွင်းသို့ တယ်လီဖုန်း၊ အသံဖမ်းစက်၊ ကင်မရာများ မယူဆောင်ရန် စသည့် စည်းကမ်းချက်များ ရှိထားသည်။ သို့သော် ယင်းကား ကိုယ်စားလှယ်များ အနေနှင့် လိုက်နာရန် ခက်ခဲခဲ့ကြကြောင်း အစည်းအဝေးအတွင်း ဖုန်းပွတ်နေသူများကို မကြာခဏ တွေ့ရှိခြင်းကို ထောက်ရှုနိုင်သည်။ ညစ်ညမ်းဗီဒီယိုကို ကြည့်ရှုနေသည့် ကိုယ်စားလှယ်တစ်ဦး ဓာတ်ပုံများပင် အင်တာနက် စာမျက်နှာများတွင် ပျံ့နှံ့ခဲ့သေးသည်။ 

ယင်းအပြင် အရွယ်စုံ ကိုယ်စားလှယ်များ၏ အစည်းအဝေးချိန်၌ အိပ်ငိုက်ခြင်းသည်လည်း ပြီးခဲ့သည့် လွှတ်တော်သက်တမ်း အတွင်း ပြောစမှတ် တွင်ခဲ့သည်။ ထို့အတွက် လွှတ်တော်ဥက္ကဋ္ဌက မည်ကဲ့သို့ တုံ့ပြန်ခဲ့သနည်း။

“လွှတ်တော်ဥက္ကဋ္ဌက နေပြီးတော့ နှုတ်နဲ့ အဲဒီလို သတိပေးပြီးတော့၊ လွှတ်တော်ထဲကို လှမ်းပြီးတော့ အဲဒီလိုမျိုးဆူတာ ငေါက်တာမျိုးတော့ မရှိဘူး၊ သူ (သူရဦးရွှေမန်း) က တော်တော်လေး သည်းခံတယ်” ဟု သီပေါမြို့နယ်မှ လွှတ်တော်ကိုယ်စားလှယ်ဟောင်း ဖြစ်သူ ဦးရဲထွန်းက The Voice သို့ ပြောဆိုသည်။

အိပ်ငိုက်တတ်သည့် အချို့ကိုယ်စားလှယ်များကို ကျန်းမာရေးအရ၊ အသက်အရွယ်ရဟု ဆိုကာ သူရဦးရွှေမန်းက နားလည်ခွင့်လွှတ်ကြောင်း ပြောဆိုခဲ့သေးသည်။

“ဂျာနယ်လည်း ကြည့်တာပါပဲ၊ ကျွန်တော့်ဘေးက လွှတ်တော်ကိုယ်စားလှယ်ဆိုရင် အမြဲတမ်း နေ့တိုင်းကြည့်တယ်၊ သူ့အလုပ်က သူပြောစရာ၊ မေးစရာမေးခွန်း မပါလို့ရှိရင် ဂျာနယ်ကြည့်မယ်၊ ကြည့်ပြီးလို့ရှိရင် အိပ်မယ်” ဟု ဦးရဲထွန်းက ရယ်ရွှန်းကာ ပြောဆိုသည်။

ကိုယ်စားလှယ်များ အိပ်ငိုက်ခြင်း၊ ဖုန်းပွတ်ခြင်း၊ သတင်းစာဂျာနယ် ဖတ်ခြင်းသည် အကြောင်းမဲ့တော့ မဟုတ်ပါ။ အစည်းအဝေးအတွင်း ဆွေးနွေးချက်၊ မေးမြန်းချက်၊ ဖြေကြားချက်များသည် ရှည်လျားထွေပြားပြီး ပျင်းရိငြီးငွေ့ဖွယ်ရာ ဖြစ်နေခြင်းက အကြောင်းဖြစ်သည်။။ အစည်းအဝေးများသည် အခါခပ်သိမ်း စိတ်ဝင်စားဖွယ် ကောင်းသည် မဟုတ်ပေ။ အရာခပ်သိမ်း လွှတ်တော်ကိုယ်စားလှယ် အားလုံးနှင့် သက်ဆိုင်သည် မဟုတ်ချေ။ 

ယင်းအခါမျိုးတွင် စိတ်အာရုံသည် အခြားတစ်ခုခုဆီသို့ ကူးပြောင်းရောက်ရှိသွားခြင်းမျိုး ဖြစ်သည်။

အမေရိကန်ကဲ့သို့သော အခြားနိုင်ငံများ၏ လွှတ်တော်များသည် မြန်မာ့လွှတ်တော်များနှင့်စာလျှင် လွတ်လပ်ပေါ့ပါးကြပါသည်။

အစည်းအဝေး အစီအစဉ်တွင် မိမိနှင့် တိုက်ရိုက်သက်ဆိုင်ခြင်း မရှိသည်၊ စိတ်ဝင်စားဖွယ် မရှိသည်များ ပါဝင်နေပါက ယင်းအချိန်၌ အစည်းဝေးခန်းတွင် ပေထိုင်နေရန်မလို။ ပင်မအစည်းအဝေး ခန်းမနှင့် မလှမ်းမကမ်းတွင် မိမိတို့၏ သက်ဆိုင်ရာ ရုံးခန်းများ ထားရှိပေးပြီး ယင်းရုံးခန်းထဲတွင် မဲဆန္ဒရှင်များနှင့် တွေ့ဆုံခြင်းဆိုင်ရာ ဥပဒေများ လေ့လာခြင်း စသည့် အလုပ်များကို လုပ်ဆောင်လျက် တီဗီမှတစ်ဆင့် အစည်းအဝေးကို နားထောင်နိုင်သည်။ သို့မဟုတ် နားနေနိုင်သည်။ မဲခွဲဆုံးဖြတ်ချိန် ဥက္ကဋ္ဌက အချက်ပေးခေါင်းလောင်း တီးသည့်အခါမှ သွားရောက်မဲပေးရန်သာ လိုသည်။

မြန်မာ့လွှတ်တော်တို့တွင်လည်း ပျင်းရိခြင်း၊ ညောင်းညာခြင်း၊ ငိုက်မြည်းခြင်းမှသည် အခြားကိစ္စဝိစ္စများအတွက် အပြင်ထွက်ခွင့် ပေးထားပါသည်။ စီးကရက်သောက်ရန်ဖြစ်ဖြစ်၊ အပေါ့၊ အလေးသွားလိုသည်ဖြစ်ဖြစ် အပြင်ထွက်နိုင်သည်။ အချိန်လည်း ကန့်သတ်မထား။ 

ယင်းအခြေအနေများကြားမှ ဖုန်းပွတ်ခြင်း၊ ဂျာနယ်ဖတ်ခြင်း၊ အိပ်ငိုက်ခြင်းတို့ ရှိနေကြခြင်း ဖြစ်သည်။ အိပ်ငိုက်ခြင်းအတွက် ကိုယ်စားလှယ်များအကြား ပြောစမှတ်တွင်သည့် ရယ်စရာစကားပင်  ရှိနေသည်။
“လွှတ်တော်ထဲကမှ ငိုက်လို့ကောင်းတာကွ။ အပြင်ရောက်သွားရင် မငိုက်ချင်တော့ဘူး” ဟူ၍။

ဥက္ကဋ္ဌတို့၏ သတိပေးမှုကို ခံရသူ အားလုံးက ကြည်ဖြူစွာ ကျေနပ်ခံယူကြသည်တော့ မဟုတ်။ ခွန်းတုံ့ပြန်ခြင်းများကိုလည်း ပြန်လည်ရင်ဆိုင်ရတတ်သည်။ အရပ်စကားနှင့် ဆိုရလျှင် ဆူလွန်း၍ လက်ဖက်ခြောက် ခပ်ကြသည်။

ဒီဇင်ဘာလ ၂၀ ရက်နေ့က ကျင်းပခဲ့သည့် ပြည်ထောင်စုလွှတ်တော် အစည်းအဝေးတွင် နာယက မန်းဝင်းခိုင်သန်းက ကိုယ်စားလှယ်များကို သတိပေးမှု ပြုလုပ်ခဲ့ရာ သတိပေးခံရသူ တစ်ဦးမှာ ရခိုင်အမျိုးသားပါတီ (ANP) မှ မြောက်ဦးမြို့နယ် ပြည်သူ့လွှတ်တော် ကိုယ်စားလှယ် ဦးဦးလှစောလည်း ပါဝင်သည်။

ပြည်တွင်းငြိမ်းချမ်းရေးနှင့် ပတ်သက်၍ တိုင်းရင်းသားပါတီတစ်ခုက တင်သွင်းသည့် အရေးကြီးအဆိုတစ်ခုကို နာယကက ပယ်ချခဲ့ခြင်းအပေါ် The Voice သတင်းစာသို့ ပြောဆိုမှုတစ်ခုနှင့် ပတ်သက်၍ ဖြစ်သည်။ 

အဆိုကို ခွင့်မပြုခဲ့ခြင်းသည် တိုင်းရင်းသားပါတီတို့၏ အခွင့်အရေးကို ပိတ်ပင်ခြင်း ဖြစ်ကြောင်း ဦးဦးလှစောက ပြောကြားခဲ့ခြင်းဖြစ်ပြီး ယင်းစကားကို နာယကက တုံ့ပြန်သတိပေးခြင်း ဖြစ်သည်။

အဆိုကို ပယ်ချခြင်းမှာ လွှတ်တော်နည်းဥပဒေများနှင့် မညီသောကြောင့် ဖြစ်သည်ဟုဆိုကာ ကိုယ်စားလှယ် အနေနှင့် နည်းဥပဒေများကို မလေ့လာဘဲ (မသိဘဲ) ပြောဆိုသည်ဟု နာယကက သတိပေးသည်။ 
“အရေးမကြီးလို့ ခွင့်မပြုတာလား၊ ဥပဒေနဲ့မညီလို့ ခွင့်မပြုတာလား၊ ဒီကိစ္စကို သူ ဘာမှသိမှာ မဟုတ်ဘူး” ဟု မန်းဝင်းခိုင်သန်းက ဆိုသည်။

ယင်းသို့ နာယက၏ ပြောဆိုမှုအပေါ် ဦးဦးလှစောက ပြင်းထန်စွာ တုံ့ပြန်လေသည်။ နာယက၏ သတိပေးမှုသည် လူကြီးလူကောင်းမဆန်ဘဲ သူ့အပေါ်တွင် ရင့်သီးသည်ဟု ၎င်းက ဆိုကာ လွှတ်တော် ပြင်ပတွင် စကားစစ်ထိုးလိုက ထိုးနိုင်သည်ဟု ၎င်းက ပြောဆိုလိုက်သည်။
“သူ ဘယ်လောက်သိသလဲ၊ ကျွန်တော် ဘယ်လောက်သိသလဲ၊ ကျွန်တော်တို့ဗျာ၊ ဒီမိုကရက်တစ်ဒီဘိတ် (Debate) လုပ်မလား ရတယ်၊ ရယ်ဒီပဲ။ လွှတ်တော်ထဲမှာ မပြောနဲ့၊ လွှတ်တော်ထဲမှာ ခုံပေါ်ကနေ မပြောနဲ့” ဟု သူက ဆိုသည်။ 

“ဦးဦးလှစောက အေးဆေးပဲ၊ ကျော်ဟိန်းလို ပြောရင်ပျင်းတယ်။ ဒီဥက္ကဋ္ဌတွေကို အပြင်မှာဆိုရင် ပျင်းတယ်။ ရှင်းရှင်းပဲ”

ANP ပါတီ၏ နောက်ထပ် ကိုယ်စားလှယ်တစ်ဦး ဖြစ်သူ ဒေါ်ခင်စောဝေကိုလည်း သတင်းမီဒီယာများကို ဖြေကြားမှုနှင့် ပတ်သက်၍ ပြီးခဲ့သည့် မေလအတွင်းက သတိပေးမှု တစ်ခုကို ပြည်သူ့လွှတ်တော် ဥက္ကဋ္ဌ ဦးဝင်းမြင့်က လုပ်ခဲ့သေးသည်။ 

ဦးဦးလှစောကမူ လွှတ်တော်အတွင်းတွင် တိုင်းရင်းသားပါတီများအပေါ် အခွင့်အရေး ပိတ်ပင်မှုများ ရှိနေပြီး ကျောင်းသားသမဂ္ဂအရေး၊ ရခိုင်အရေး စသည်တို့တွင် ၎င်းကိုယ်တိုင်ပင် မကြာခဏ ဆွေးနွေးခွင့် ပိတ်ပင်ခံရကြောင်း ပြောဆိုသည်။ 

မကြာသေးမီက အမေရိကန်နိုင်ငံ၊ အဖွဲ့အစည်းတစ်ခုက တစ်ပတ်ကြာ ဆွေးနွေးပွဲ တက်ရောက်ရန် ၎င်းကို နာမည်တပ်၍ ဖိတ်ကြားခဲ့သော်လည်း လွှတ်တော်ဥက္ကဋ္ဌက သူ့ပါတီဝင်တစ်ဦးနှင့် အစားထိုး စေလွှတ်ခဲ့မှုကိုလည်း ၎င်းက ထောက်ပြသည်။ 
“အဲဒါ လုပ်ပိုင်ခွင့် ရှိသလား၊ လူတစ်ယောက်ကို ထမင်းစား ဖိတ်တာကို ခင်ဗျား မသွားနဲ့ ဒီလူ့ထည့်လိုက်ပါဆိုပြီး လုပ်တယ်ပေါ့ဗျာ” ဟု ၎င်းက ဆိုသည်။ “ဒါ ပုဂ္ဂိုလ်ရေးတွေ ဖြစ်သွားပြီ”
 
ယင်းသို့ သတိပေးမှု၊ ဆူမှုတို့ကြောင့် လွှတ်တော်အတွင်း ဥက္ကဋ္ဌနှင့် ကိုယ်စားလှယ်အကြား တင်းမာသည့် အခြေအနေများ ပေါ်ပေါက်ခဲ့သည်။ (အစည်းအဝေးတစ်ခုတုန်းကလည်း ၎င်း၏ ပြောဆိုနေမှုကို ဥက္ကဋ္ဌက ကြားဝင်ဖြတ်ပြောခဲ့သေးရာ ယင်းသို့ မလုပ်ရန် ဦးဦးလှစောက ဦးဝင်းမြင့်ကို ပြန်လည်ပြောဆိုခဲ့သေးသည်။) 

ယင်းအနေအထားကား အကျယ်အကျယ် မငြိမ်းဖွယ်ဟု ပထမအကြိမ် လွှတ်တော်သက်တမ်း အတွေ့အကြုံကို အခြေခံ၍ ဦးရဲထွန်းက ရှုမြင်သည်။
“ပြဿနာ ပေါ်လာနိုင်တယ်” ဟု ၎င်းက ဆိုသည်။

အချိုးကျရွေးကောက်ပွဲစနစ် (PR) ကိစ္စကို လွှတ်တော်တွင် ဆွေးနွေးခဲ့ကြစဉ်က နာယက သူရဦးရွှေမန်းက အစည်းအဝေးကို ရုတ်တရက် ရပ်ဆိုင်းလိုက်မှုအပေါ် ကိုယ်စားလှယ်နှစ်ဦး ဖြစ်သည့် ဦးရဲထွန်းနှင့် ဦးအောင်ဇင်တို့က သတင်းမီဒီယာများသို့ အောက်ပါအတိုင်း ပြောဆိုခဲ့သည်။ 

လွှတ်တော်နာယက၏ လုပ်ရပ်သည် လွှတ်တော်ကို မလေးမစားပြုရာ ရောက်သည်ဟူ၍။ 

ယင်းအပြင် ရှမ်းပြည်နယ်ရှိ ပိုင်ဆိုင်မှု အငြင်းပွားနေသည့် မြေနှင့်အဆောက်အုံ ကိစ္စနှင့် ပတ်သက်၍လည်း သူရဦးရွှေမန်းက တရားစီရင်ရေးမဏ္ဍိုင်အပေါ် ဝင်ရောက်စွက်ဖက်သည်ဟု ဦးရဲထွန်းက ပြောဆိုခဲ့သေးသည်။

ယင်းပြောဆိုမှုများအပေါ် သူရဦးရွှေမန်းက သက်ဆိုင်ရာပါတီများမှ တစ်ဆင့် သတိပေးမှုများ ပြုလုပ်ခဲ့သည့် အပြင် ၎င်းတို့ကို အရေးယူရန် လုပ်ဆောင်ခဲ့သေးသည်ဟု ဦးရဲထွန်းက ဆိုသည်။

သို့သော်။ လက်ရှိပြဋ္ဌာန်းထားသည့် လွှတ်တော်ဆိုင်ရာ ဥပဒေများက ကိုယ်စားလှယ်အား ဆွေးနွေးခွင့် ပိတ်ပင်ခြင်း၊ လွှတ်တော်အတွင်းမှ ထွက်ခွာသွားစေခြင်း၊ အချိန်ကာလတစ်ခုအထိ လွှတ်တော်မတက်စေခြင်းမှ တစ်ပါး ပြင်းထန်သည့် အရေးယူမှု လုပ်၍မရ။ 

“အဲဒီလိုမျိုး ပြစ်ဒဏ်ချတာလောက်ပဲ လုပ်နိုင်တယ်၊ ဖြုတ်လို့ မရဘူး၊ လုပ်ချင်တယ် ဆိုရင်တော့ ဥပဒေ ပြဋ္ဌာန်းမှရမှာ” ဟု ၎င်းက ဆိုသည်။ “အခု ဦးဦးလှစော ထပ်ပြောလိုက်တဲ့ဟာက ကျွန်တော်ထင်တယ်၊ မငြိမ်းလောက်ဘူး”
 
ကာယကံရှင် ဦးဦးလှစောကမူ ထိုအကြောင်းကို ထည့်မစဉ်းစားပါ။ ကိုယ်စားလှယ်တစ်ဦး အနေနှင့် မဲဆန္ဒရှင် ပြည်သူများအတွက် ကိုယ်တာဝန် ကိုယ်ကျေပြွန်စွာ ထမ်းဆောင်သွားမည်ဟု ဆိုသည်။
“ဘာအရေးယူမှာလဲ၊ ကျွန်တော်က လွှတ်တော်ရဲ့ စည်းကမ်းစည်းမျဉ်းကို ချိုးဖောက်တာလည်း မဟုတ်ဘူး၊ ဒို့တာဝန် အရေးသုံးပါးကို ချိုးဖောက်တာလည်း မရှိဘူး။ ဘာနဲ့အရေးယူမှာလဲ” ဟု ၎င်းက မေးခွန်းထုတ်သည်။

ယင်းသို့ လွှတ်တော်ဥက္ကဋ္ဌများအပေါ် ကိုယ်စားလှယ်အချို့က မကျေလည်မှုများ ရှိနေသည့် လွှတ်တော်အနေနှင့် မည်ကဲ့သို့ ဆက်လက်စခန်းသွားမည်နည်း။

ပြီးခဲ့သည့် ပထမအကြိမ် လွှတ်တော်အစည်းအဝေးများ ပြီးဆုံးချိန်တွင် နောက်ဆုံး နှုတ်ဆက် ညစာစားပွဲကျင်းပရာ အစည်းအဝေးကာလ ငါးနှစ်တာအတွင် လွှတ်တော်အတွင်း အငြင်းပွားမှုများ၊ မကျေလည်မှုများ၊ ပြဿနာများ ရှိခဲ့မှုများကြောင်း နာယကများ၊ ကိုယ်စားလှယ်များက အမှတ်တရစကား ပြန်ပြောင်းပြောကြားသည်တွင် အားလုံးသည် ရယ်စရာ မောစရာသာ ကျန်ရစ်ခဲ့သည်။

ပြည်တွင်းငြိမ်းချမ်းရေး၊ တရားဥပဒေစိုးမိုးရေးနှင့် အခြေခံဥပဒေ ပြင်ဆင်ရေး ကြွေးကြော်သံဖြင့် ရွေးကောက်ပွဲ အနိုင်ရရှိခဲ့ပြီး ကိုးလအကြာတွင် NLD ပါတီ၏ အာဏာပြင်း ခေါင်းဆောင် ဦးဝင်းထိန်ကမူ ဥပဒေပြုရေးမဏ္ဍိုင်၊ လွှတ်တော်နှင့် ပတ်သက်၍ ပြည်တွင်းသတင်းမီဒီယာ တစ်ခုသို့ လောလောလတ်လတ်ပင် မှတ်ချက်ပြု ပြောဆိုထားသည်။ 

လွှတ်တော်သည် အစောပိုင်းလများက ကချော်ကချွတ် နိုင်သော်လည်း နောက်ပိုင်းတွင်မူ ဥပဒေပြုရေးကို အထိုက်အလျောက် လုပ်ဆောင်နိုင်လာပြီဟု ဆိုသည်။

သို့သော် လက်တလောဖြစ်ရပ်များ အတွက် ဆူကဋ္ဌကြီးများကမူ လွှတ်တော်ဥပဒေ၊ နည်းဥပဒေများ၊ စည်းမျဉ်းစည်းကမ်းများကို အလျှော့ပေးဟန် မပြပါ။ 

ပြည်ထောင်စုလွှတ်တော် နာယကဖြစ်သူ မန်းဝင်းခိုင်သန်းက ကိုယ်စားလှယ်များကို နောက်တစ်ကြိမ်တွင်မူ လက်စွဲတော် တူထု၍ သတိပေးမည်ဟု ကြိမ်းထားသည်။ (ယင်းအဓိပ္ပာယ်သည် လွှတ်တော်မှတ်တမ်းတွင် ထည့်သွင်းမှတ်တမ်းတင်မည် ဆိုခြင်း ဖြစ်ကြောင်း အချို့က ဆိုသည်။) 

ပြည်သူ့လွှတ်တော် ဥက္ကဋ္ဌက သူ့အနေနှင့် ဥပဒေနှင့် မညီသည်များ၊ စည်းကမ်းချိုးဖောက်မှုများကို လက်ခံမည် မဟုတ်ကြောင်း အောက်ပါသူ့စကားက ဖော်ပြနေသည်။
“ခင်ဗျားတို့ စည်းမဲ့ကမ်းမဲ့လုပ်ဖို့  မစဉ်းစားနဲ့၊ စည်းမဲ့ကမ်းမဲ့ လုပ်မယ်ဆိုရင် လွှတ်တော်ထဲ ဝင်မလာနဲ့” 

အောင်မျိုးထက်

ABOUT AUTHOR

(အောင်မျိုးထက်)