News

POST TYPE

LATEST NEWS POST

စီးပွားရေးလုပ်ငန်းရှင် တစ်ဦးကို “ဝ” နယ်သို့ ခေါ်ဆောင်ကာ သတ်ပြီးနောက် ဇနီးဖြစ်သူထံမှ ကျပ်သိန်း ၂၀၀ ကျော် ခြိမ်းခြောက်ငွေတောင်းခံမှု စတင်စစ်ဆေး
14-Jan-2020


လားရှိုး၊ ဇန်နဝါရီ ၁၄

ကျောက်ပန်းတောင်းဒေသခံ စီးပွားရေးလုပ်ငန်းရှင်တစ်ဦးကို ဝ နယ်သို့ ခေါ်ဆောင်ကာ သတ်ပြီးနောင် ဇနီးဖြစ်သူထံ ခြိမ်းခြောက်ငွေးတောင်းခဲ့သည့် ဘုန်းတော်ကြီး ဦးခေမာသီရိ (ခ) စောဖိုးခွားပါအမှုကို ဇန်နဝါရီလ ၁၃ ရက်နေ့က အမှုကို စတင်စစ်ဆေးနိုင်ရန် ဆင့်ခေါ်ထားသောလည်း စစ်ဆေးနိုင်ခြင်းမရှိခဲ့ကြောင်း လားရှိုးခရိုင်တရားရုံးထံမှ သိရသည်။ 

“စစ်ဆေးမဲ့တရားသူကြီးက ဟိုပန် “ဝ”တိုင်းဒေသမှာ တရားရုံးရုံးဖွင့်ပွဲသွားနေရလို့ မစစ်ဆေးဖြစ်တာပါ၊ ဇန်နဝါရီလ ၂၁ ရက်နေ့ကို ပြန်ချိန်းထားပါတယ်”ဟု တရားရုံးတာဝန်ရှိသူတစ်ဦးက ပြောကြားသည်။

ကျောက်ပန်းတောင်းမြို့နယ်နေ ကိုခိုင်ဇော်ဝင်း(ခ)ကိုနေရှိုင်းသည် ၎င်းပိုင်မော်တော်ယာဉ်ဖြင့် ဆရာတော် ဦးခေမာသီရိ၊ ဦးဟန်းသိန်းတို့နှင့် အတူ ကိုယ်ပိုင်မော်တော်ယာဉ်ဖြင့် တရုတ်ပြည်နယ်စပ်သို့ အလည်သွားရောက်စဉ် ဇနီးဖြစ်သူနှင့် အဆက်အသွယ်ပြတ်တောက်ခဲ့ပြီး ရဲတပ်ဖွဲ့ကို အကူအညီတောင်းခံရာက ကိုခိုင်ဇော်ဝင်း (ခ) ကိုနေရှိုင်း၏ ရုပ်အလောင်းကို တန့်ယန်းမြို့အထွက် ပန်ဆန်းမြို့နယ်ဘက်သွား ကားလမ်းမဘေးတစ်နေရာတွင် တွေ့ရှိခဲ့ခြင်းဖြစ်ကြောင်း တန်းယန်းမြို့မရဲစခန်းထံမှ သိရသည်။

 “လူသတ်မှု ခြိမ်းခြောက်မှု၊ အလောင်းဖျောက်မှုတွေနဲ့ တရားစွဲထားတာပါ၊ တည်းခိုခန်းမှာ အသတ်ခံရတယ်။ ပြီးတော့ သေဆုံးသူရဲ့ အမျိုးသမီးဆီကို ဖုန်းဆက်ပြီး ငွေသိန်း ၂၀၀ လွှဲပေးဖို့တောင်းခဲ့တယ်။ အလောင်းကိုလဲ လမ်းဘေးမှာ ပစ်ချပြီး ဖျောက်ဖျက်ဖို့ ကြိုးစားခဲ့တယ်။ ပြစ်မှုကျူးလွန်ရာမှာလဲ နှစ်ယောက်စလုံးပူးပေါင်းပါဝင်တာတွေ့ရလို့ ပုဒ်မလေးခုနဲ့တရားစွဲထားတယ်” ဟု တန့်ယန်းမြို့မရဲစခန်းမှူးက ရှင်းပြသည်။

အဆိုပါရုပ်အလောင်းကိုတွေ့ရှိပြီးနောက် ဘုန်းကြီးဦးခေမာသီရိနှင့် ဦးဟန်းသိမ်းတို့ကို “ဝ”ကိုယ်ပိုင်အုပ်ချုပ်ခွင့်ရဒေသ ဟိုပန်မြို့ရှိ ဘုန်းတော်ကြီးကျောင်းတစ်ကျောင်းတွင် နိုဝင်ဘာလ ၂၃ ရက်နေ့က မော်တော်ယာဉ်နှင့်အတူ ဖမ်းမိပြီး တန့်ယန်းမြို့မရဲစခန်းတွင် အမှုဖွင့်ဆောင်ရွက်ကာ ရာဇသတ်ကြီးဥပဒေပုဒ်မ ၃၀၂ (လူသတ်မှု)၊ ရာဇသတ်ကြီးဥပဒေပုဒ်မ ၃၈၇ (ခြိမ်းခြောက်ငွေတောင်းခံမှု)၊ ရာဇသတ်ကြီးပုဒ်မ ၂၀၂ (အလောင်းဖျောက်ဖျက်မှု)၊ ရာဇသတ်ကြီးပုဒ်မ ၁၁၄ (ပြစ်မှုကျူးလွန်ရာတွင် ပူးပေါင်းပါဝင်ဆောင်ရွက်မှု) ပုဒ်မများဖြင့် အမှုဖွင့်ဆောင်ရွက်ခဲ့ခြင်းဖြစ်ကြောင်း သိရသည်။

ယင်းအမှုကို လားရှိုးခရိုင်တရားရုံးက အမှုကြီးအမှတ် ၄၁၅/၂၀၁၉ ဖြင့် ဒီဇင်ဘာလ ၂၃ ရက်နေ့က လက်ခံခဲ့ပြီး ဇန်နဝါရီလ ၁၃ ရက်နေ့တွင် အမှုဖွင့်တိုင်ကြားသူ တရားလို ဒေါ်အောင်ဌေးညွန့် (အသတ်ခံရသူ၏ဇနီး) ကို စစ်ဆေးနိုင်ရန် ဆင့်ခေါ်ခဲ့သော်လည်း စစ်ဆေးနိုင်ခြင်းမရှိခဲ့ပေ။

မမ (လားရှိုး)