News

POST TYPE

LATEST NEWS POST

လှိုင်သာယာရှိ တရုတ်စာဖြင့် ရေးထားသည့် ဆိုင်အမည်များ မြန်မာဘာသာသို့ ပြန်ပြောင်းမည်
11-Dec-2019
ရန်ကုန်၊ ဒီဇင်ဘာ ၁၀

လှိုင်သာယာမြို့နယ်တွင် ဖွင့်လှစ်ထားသည့် ဆိုင်များတွင် တရုတ်စာရေးထားသည့် ဆိုင်အမည် ဆိုင်းဘုတ်များကို မြန်မာဘာသာသို့ ပြောင်းလဲရန် မြို့နယ်ကော်မတီက ရပ်ကွက်အလိုက် ဆောင်ရွက်နေကြောင်း ရန်ကုန်မြို့တော် စည်ပင်သာယာရေးကော်မတီ၊ စီမံရေးရာ ဌာနမှဌာနမှူးဖြစ်သူ ဦးကျော်မင်းက ပြောကြားသည်။

အဆိုပါ ရန်ကုန်မြို့တော် စည်ပင်သာယာနယ်နိမိတ်အတွင်းရှိ ဖွင့်လှစ်ထားသည့်ဆိုင်များကို တရုတ်၊ အိန္ဒိယ စသည့်ဘာသာများဖြင့် ရေးခြင်းမျိုးကို ခွင့်ပြုမည်မဟုတ်ဘဲ အင်္ဂလိပ်နှင့် မြန်မာအမည်ရေးခြင်းမျိုးကိုသာ ခွင့်ပြုသွားမည်ဖြစ်ကြောင်း ၎င်းက ဆိုသည်။

“အိန္ဒိယလို၊ ဂျပန်လို တရုတ်လိုရေးတာတွေ ခွင့်မပြုဘူး။ အင်္ဂလိပ်စာနဲ့ မြန်မာရေးတာ ခွင့်ပြုတယ်။ ဥပမာ - City Mart လိုရေးတာ ဒါဆိုတော့ ဒါတွေက ခွင့်ပြုတယ်။ တရုတ်စာကို မြန်မာလို ရေးရင်ရတယ်။ ခွင့်ပြုတယ်။ ဥပမာ - ယွင်ချန်လိုမျိုးကို အစက်တွေ အပြောက်တွေနဲ့တရုတ်လိုမရေးဘဲနဲ့ ယွင်ချန်ဗမာလိုရေးရင်ရတယ်။ ဒါတွေကို စာတွေထုတ်ပြီးတော့ မလိုချင်ဘူးဆိုပြီး မလုပ်ဘူး။ ရပ်ကွက်အလိုက် ဒီလိုပြောင်းပါဆိုပြီး ဆောင်ရွက်နေပါတယ်” ဟု ဦးကျော်မင်းက ပြောသည်။

ယခုလက်ရှိ ရန်ကုန်မြို့တော် စည်ပင်သာယာရေးကော်မတီ နယ်နိမိတ် ၃၃ မြို့နယ်အတွင်းရှိ လှိုင်သာယာမြို့နယ်တွင် တရုတ်လိုရေးထားသည့် ဆိုင်အမည်ဆိုင်းဘုတ်များ ဖွင့်လှစ်မှုများပြားသောကြောင့် ယင်းမြို့နယ်ရှိ ရပ်ကွက်အလိုက် ခေါ်ယူကာ မြန်မာအမည်ပြောင်းလဲရန် ဆောင်ရွက်လျက်ရှိကြောင်း ရန်ကုန်မြို့တော်စည်ပင်သာယာရေး ကော်မတီထံမှ သိရသည်။

လှိုင်သာယာမြို့နယ်ရှိ ရပ်ကွက်များတွင် တရုတ်လူမျိုးများ ဖွင့်လှစ်ထားသည့် စားသောက်ဆိုင်၊ အနှိပ်ခန်း၊ KTV နှင့် အလှပြင်ဆိုင်များ အများအပြား ဖွင့်လှစ်ထားကြောင်း သိရသည်။

ထို့ပြင် ယခင်အပတ်ကလည်း လှိုင်သာယာရှိ FMI အိမ်ရာတွင် တရုတ်နိုင်ငံသားငါးဦးက ရပ်ကွက် အုပ်ချုပ်ရေးမှူးနှင့် အဖွဲ့ကို ရိုက်နှက်မှုဖြစ်ပွားခဲ့သေးသည်။ 

လှိုင်သာယာမြို့နယ်တွင် စက်မှုဇုန် ၁၂ ဇုန် တည်ရှိပြီး ၂၀၁၄ ခုနှစ် သန်းခေါင် စာရင်းကောက်ခံမှုအရ လူဦးရေ ၆ သိန်းကျော်ရှိပြီး ယင်းမြို့နယ်အတွင်း နေထိုင်သည့် ကျူးကျော်အိမ်ထောင်စုမှာ ၃၈၀၀၀ ကျော်ရှိကြောင်း တိုင်းဒေသကြီးအစိုးရအဖွဲ့ထံမှ သိရသည်။

J-10