News

POST TYPE

LATEST NEWS POST

မိခင်ဖြစ်သူနှင့် ရန်ဖြစ်ခဲ့သည့် ဖခင်ကို သားက တုတ်ဖြင့် ရိုက်၍ သေဆုံး
11-Sep-2019


ကလေး၊ စက်တင်ဘာ ၁၁

ကချင်ပြည်နယ် မိုးကောင်းမြို့နယ် မြို့ဦးရပ်ကွက်တွင် အိမ်ရှိ ဓါတ်ဗူးကို ရောင်းချမှုကြောင့် မိခင်ဖြစ်သူနှင့် စကားများရန်ဖြစ်ခဲ့သည့် ဖခင်ကို သားဖြစ်သူက တုတ်ဖြင့် ရိုက်နှက်လိုက်ရာမှ သေဆုံးသွားခဲ့ကြောင်း မိုးကောင်းမြို့မရဲစခန်းမှ သိရသည်။

သေဆုံးသူ ဦးဇော်လင်းထွန်း (၃၉) နှစ်သည် နေအိမ်ရှိ ဓါတ်ဗူးကို ရောင်းချခဲ့သည့်အတွက် ၎င်း၏ဇနီးဖြစ်သူဒေါ်စိမ်းစိမ်းအေး (၃၆) နှစ်နှင့် စကား ရန်ဖြစ်ပြီးနောက် တစ်ယောက်တစ်နေရာစီ ခွဲအိပ်နေစဉ် အိပ်ပျော်နေသည့် ဖခင်၏ ဦးခေါင်းကို သားဖြစ်သူ ကိုဇော်ဟိန်း (၁၆ နှစ်) က အိမ်ရှိ အဝတ်လျှော်တုတ်ဖြင့် ရိုက်နှက်ခဲ့ရာမှ သေဆုံးခဲ့ခြင်းဖြစ်ကြောင်း ရဲစခန်း၏ စစ်ဆေးချက်များအရ သိရသည်။

"သူ့ယောင်္ကျားက လမ်းမှာ လဲနေတာတွေ့လို့ လူနှစ်ယောက်က လာပိုတာဆိုပြီး လိမ်လည်တိုင်တန်တာပါ။ အခုတော့ နှစ်ယောက်လုံး ဖမ်းထားပါတယ်" ဟု မိုးကောင်းမြို့မရဲစခန်း မှ တာဝန်ရှိသူတစ်ဦးက ပြောသည်။

ဦးဇော်လင်းထွန်း၏ အခန်းတွင်း ဦးခေါင်းဒဏ်ရာဖြင့် သေဆုံးနေသည်ကို တွေ့ရှိရပြီးနော် သားဖြစ်သူထံ အပြစ်မခံရစေရန် ကြမ်းပြင်ပေါ်ပေနေသည့် သွေးများကို သန့်ရှင်းမှုများ ပြုလုပ်ခဲ့ပြီး ဒဏ်ရာကိုလည်း ရေဖြင့်ဆေးကြောကာ ရဲစခန်းသို့ လိမ်လည်တိုင်ကြားခဲ့ခြင်းဖြစ်ကြောင်း ရဲစခန်း၏ စစ်ဆေးမှုမှတ်တမ်းများအရ သိရသည်။

ယင်းဖြစ်စဉ်နှင့်ပတ်သက်၍ မိခင်ဖြစ်သူနှင့် သားဖြစ်သူကို မိုးကောင်းမြို့မရဲစခန်းတွင် (ပ)အမှတ် ၉၈/၂၀၁၉၊ ရာဇသတ်ကြီးပုဒ်မ - ၃၀၂/၁၁၄/၂၀၁ ဖြင့် အမှုဖွင့်အရေးယူနိုင်ရေး ဆောင်ရွက်လျက်ရှိသည်။

R-20