News

POST TYPE

LATEST NEWS POST

ရွှေပြည်သာ မီးသတ်ဦးစီးအပါအဝင် ဝန်ထမ်း ၁ဝ ဦးကို ဆရာဝန်အမျိုးသမီးတစ်ဦးက ပုဒ်မ ၄ခုဖြင့် အမှုဖွင့်
27-May-2019
ရန်ကုန်၊ မေ ၂၇

ရွှေပြည်သာမြို့နယ် မီးသတ် ဦးစီးမှူးအပါအဝင် မီးသတ်ဝန်ထမ်း ၁ဝ ဦးကို ဆရာဝန်အမျိုးသမီးတစ်ဦးက ပုဒ်မ ၄ ခုဖြင့် မေ ၂၅ ရက်က အမှုဖွင့်ထားကြောင်း ရွှေပြည်သာမြို့မ ရဲစခန်းမှ သိရသည်။

ပုဒ်မ ၃၅၄ ကိုယ်ထိလက်ရောက် ကျူးလွန်မှု၊ ၅ဝ၆ ခြိမ်းခြောက်မှု၊ ပုဒ်မ ၅ဝ၉ ကာယိန္ဒြေကိုစော်ကားရန် ကြံရွယ်ပြောဆိုမှု၊ ၁၁၄ ပြစ်မှုကျူးလွန်ခြင်းကို အားပေးကူညီမှုတို့ဖြင့် အမှုဖွင့်ခံထားရကြောင်း ရွှေပြည်သာမြို့နယ် မီးသတ်ဦးစီးဌာနမှ ဦးစီးမှူး ဦးသွင်ယုနိုင်က ပြောသည်။

“ကျွန်တော်တို့ဆီက ဝန်ထမ်း ၁ဝ ဦးကို ပုဒ်မ ၄ ခုနဲ့ တရားစွဲထားတယ်။ ဖြစ်စဉ်ကို အထက်ကလူကြီးတွေကို တင်ပြထားတယ်။ ကျွန်တော် ရင်ဆိုင်ဖြေရှင်းဖို့ပဲ ရှိပါတယ်”ဟု ၎င်းကဆိုသည်။

ရွှေပြည်သာ စက်မှုဇုန် ၁ မီးသတ်ရုံးရှေ့တွင်ရပ်နားထားသော ကားကိုဖယ်ခိုင်းရာမှ ကားပိုင်ရှင် ဆရာဝန်အမျိုးသမီးနှင့် မီးသတ်ဝန်ထမ်းများ စကားများမှုဖြစ်ပွားပြီး အမှုဖွင့်ခံရခြင်းဖြစ်ကြောင်း ဦးသွင်ယုနိုင်က ပြောသည်။

အဆိုပါအမှုနှင့်ပတ်သက်၍ မေ ၂၈ ရက်တွင် ရွှေပြည်သာမြို့မရဲစခန်းတွင် သွားရောက်ဖြေရှင်းမည်ဟု ၎င်းကဆိုသည်။

အဆိုပါ ရွှေပြည်သာ မီးသတ်ရုံးရှေ့တွင် အချင်းများနေသော ဗီဒီယိုကို လူမှုကွန်ရက်စာမျက်နှာတွင် Mya Wut Yee မှ တိုက်ရိုက်လွှင့်တင်ခဲ့ပြီး ကြည့်ရှု့နှုန်းများကာ ဝေဖန်ပြောဆိုမှုများ မြင့်တက်လျက်ရှိသည်။

J-18