News

POST TYPE

LATEST NEWS POST

အစောပိုင်း မဲရေတွက်မှုများအရ အင်ဒိုနီးရှား ရွေးကောက်ပွဲတွင် လက်ရှိသမ္မတ ၀ီဒိုဒို အောင်ပွဲခံရန် အခြေအနေ ကောင်းမွန်
17-Apr-2019


ဂျာကာတာ၊ ဧပြီ ၁၇

အင်ဒိုနီးရှားနိုင်ငံတွင် ကျင်းပနေသော နိုင်ငံလုံးဆိုင်ရာ အထွေထွေ ရွေးကောက်ပွဲတွင် အစောပိုင်း မဲရေတွက်မှုများအရ လက်ရှိသမ္မတ ၀ီဒိုဒို အနိုင်ရရန် အခြေအနေ ကောင်းမွန်နေပြီး အပြီးသတ် မဲရလဒ်များကို လာမည့်မေလသို့ ရောက်မှသာ ထုတ်ပြန်ပေးနိုင်လိမ့်မည်ဖြစ်ကြောင်း ရွေးကောက်ပွဲ ကော်မတီက အသိပေးထားသည်ဟု BBC က ဖော်ပြထားသည်။

ကမ္ဘာ့အကြီးဆုံး ရွေးကောက်ပွဲများအနက် တစ်ခုအပါအ၀င်ဖြစ်သော အင်ဒိုနီးရှားရွေးကောက်ပွဲတွင် အကြိတ်အနယ် ဖြစ်နေသူများမှာ လက်ရှိသမ္မတ ၀ီဒိုဒိုနှင့် စစ်ဗိုလ်ချုပ်ဟောင်း ဆူဘီယန်နိုတို့ ဖြစ်ကြပြီး ၎င်းတို့နှစ်ဦးမှာ ၂၀၁၄ ခုနှစ် ရွေးကောက်ပွဲ၌လည်း ယခုကဲ့သို့ပင် အားပြိုင်ခဲ့ကြရဖူးသည်။

အင်ဒိုနီးရှားနိုင်ငံတွင် ပိတ်သိမ်းပြီးသော မဲရုံများ၌ မဲရေတွက်မှုများ စတင်နေပြီဖြစ်ကာ ယခုထွက်ပေါ်လာသော အစောပိုင်းရလဒ်များအရ သမ္မတ ၀ီဒိုဒိုက ၎င်း၏ပြိုင်ဘက်ဖြစ်သော စစ်ဗိုလ်ချုပ်ဟောင်း ဆူဘီယန်နိုကို မဲအရေအတွက် ၁၀ ရာခိုင်နှုန်းနီးပါး အသာစီး ရရှိထားပြီလည်းဖြစ်သည်။

အင်ဒိုနီးရှား အထွေထွေ ရွေးကောက်ပွဲကို နိုင်ငံရေးပါတီပေါင်း ၂၀ ပါဝင်ယှဉ်ပြိုင်ခြင်းဖြစ်ပြီး သမ္မတ၀ီဒိုဒိုက ပြည်သူများ၏ အားပေးထောက်ခံမှုနှင့်အတူ ၎င်းအနေနှင့် နိုင်ငံကို နောက်ထပ်ငါးနှစ် ဆက်လက် ဦးဆောင်သွားခွင့် ရလိုပါကြောင်းလည်း ထုတ်ဖော်ပြောကြားထားသည်။

အင်ဒိုနီးရှားနိုင်ငံတွင် ရွေးကောက်ပွဲအတွက် မဲပေးပိုင်ခွင့်ရှိသူပေါင်း ၁၉၂ သန်းကျော်ရှိပြီး အထက်လွှတ်တော်နှင့် အောက်လွှတ်တော် နှစ်ခုပေါင်းအတွက် ကိုယ်စားလှယ်အရေအတွက် ၂၀,၅၀၀ ကျော် ရွေးကောက်တင်မြှောက်သွားရမည်ဖြစ်သည်။