News

POST TYPE

LATEST NEWS POST

ကျောက်ဖြူရဲ့အနာဂတ်
13-Nov-2018
မြို့သည် တိတ်တိတ်ဆိတ်ဆိတ်ပဲ ဖြစ်သည်။ တောင်-မြောက် လေယာဉ်ပြေးလမ်း၏ မြောက်ဘက်အဆုံးနှင့် မလှမ်းမကမ်းမှာ ပြာသောပင်လယ်ပြင်ကြီးရှိသည်။ မြို့က ကျွန်း၏မြောက်ဘက်ခြမ်း ခပ်ယွန်းယွန်းမှာရှိနေပြီး ပင်လယ်ပြာပြာက မြို့ကို အနားသတ်ဝန်းရံထားသည်။ လမ်းဆုံလမ်းခွမြို့ မဟုတ်သဖြင့် ယာဉ်အသွားအလာ မများပြား။ လတ်ဆတ်သောပင်လယ်လေနှင့် တိတ်ဆိတ်ငြိမ်သက်ခြင်းက မြို့မှ ဆီးကြိုနေသည်။ ရခိုင်ပြည်နယ်၏ ထင်ရှားသော ခရိုင်မြို့ကြီးတစ်မြို့ဖြစ်သော်လည်း မိမိအဖို့မူ ယခုပထမဦးဆုံးအကြိမ် ခြေချဖူးခြင်းဖြစ်သည်။ လတ်တလောမှာတော့ ဤမြို့၏ အမည်နာမသည် ကမ္ဘာ့သတင်းမီဒီယာများထဲတွင် ထင်ရှားနေသည်။ ဤမြို့ကိုအခြေပြု၍ မကြာမီ ရေနက်ဆိပ်ကမ်းသစ်ကြီးနှစ်ခုနှင့် အထူးစီးပွားရေးဇုန်ကြီးတစ်ခု အကောင်အထည်ဖော်တော့မည်။ ကျောက်ဖြူ...။

မိတ်ဆွေတစ်ဦး၏ အစီအစဉ်ဖြင့် ပြီးခဲ့သည့်ရက်များအတွင်းက ရခိုင်ပြည်နယ် ကျောက်ဖြူမြို့သို့ ရောက်ဖြစ်ခဲ့သည်။ ရမ်းဗြဲကျွန်း၏ မြောက်ဘက်တွင် တည်ရှိသော ကျောက်ဖြူက ပင်လယ်ဆိပ်ကမ်းမြို့ဖြစ်သည်။ ပြည်တွင်းလေကြောင်းခရီးစဉ်နှစ်ခု ပုံမှန်ပြေးဆွဲနေပြီး ရန်ကုန်အထိ ကားလမ်းဆက်သွယ်မှုရှိသည်။ သီးခြားဆန်သော်လည်း ကျောက်ဖြူက မဟာဗျူဟာကျသောအရပ်မှာ ရှိသည်။ ရခိုင်ပြည်နယ်အလယ်ပိုင်းမှာရှိပြီး ပြည်မနှင့်ဆက်သွယ်ရာတွင် အနီးဆုံးလမ်းကြောင်းမှာရှိသည်။ တစ်ဖက်မှာ ကျယ်ပြောသော ဘင်္ဂလားပင်လယ်အော်။ ထိုဘင်္ဂလားပင်လယ်အော်မှထွက်လျှင် အိန္ဒိယသမုဒ္ဒရာထဲရောက်မည်။ ဆော်ဒီပင်လယ်ကွေ့၊ အာဖရိက ဦးချိုနှင့်ဆက်သည်။ ကျောက်ဖြူ ရမ်းဗြဲကျွန်းဝန်းကျင်က ပထဝီအနေအထားအရ ရေနက်ဒေသဖြစ်သည်။ တန်ချိန်များစွာသော ပင်လယ်ကူးသင်္ဘောကြီးတွေ ဆိုက်ကပ်နိုင်သည်။ မဟာဗျူဟာကျသော ထိုကျောက်ဖြူကို တရုတ်တို့ မျက်စိကျခဲ့သည်။ အထူးသဖြင့် ရမ်းဗြဲကျွန်းဖြစ်သည်။ ရမ်းဗြဲကျွန်းနှင့်ကပ်လျက် အရှေ့ဘက်မှာ တြိဂံပုံ မဒေးကျွန်းငယ်ရှိသည်။ လတ်တလောတွင် တရုတ်တို့အခြေစိုက်ထားသည့် ရေနံတင်ဆိပ်ကမ်းနှင့် သဘာဝဓာတ်ငွေ့ပို့လွှတ်စခန်းတစ်ခု ထိုကျွန်းတွင် တည်ဆောက်ထားပြီး စတင်လည်ပတ်နေပြီ။

ကျောက်ဖြူဆိပ်ကမ်းမှတစ်ဆင့် စက်လှေစီးကာ မဒေးကျွန်းကို ပတ်ကြည့်ဖြစ်ခဲ့ကြသည်။ ဧရာမရေနံလှောင်ကန်ကြီးများကို အဝေးမှ လှမ်းမြင်ရသည်။ ရေနံချ ရေနက်ဆိပ်ကမ်းက အဝါရောင်ကရိန်းတွေကို တွေ့ရသည်။ အရှေ့အလယ်ပိုင်းဒေသမှ တရုတ်တို့ဝယ်ယူသယ်ဆောင်လာသည့် ရေနံတင်သင်္ဘောကြီးများ ဤဆိပ်ကမ်းတွင် ရေနံစိမ်းများ လှောင်ကန်အတွင်းသို့ ချပေးသည်။ ထိုမှတစ်ဆင့် ပိုက်လုံးများဖြင့် မြန်မာပြည်အလယ်ပိုင်းကိုဖြတ်ကာ ယူနန်ပြည်နယ် ရေနံသန့်စင်စက်ရုံသို့ ပို့ဆောင်သည်။ ကျောက်ဖြူ၏ အနောက်ဘက် ဘင်္ဂလားပင်လယ်အော်ထဲမှာ သဘာဝဓာတ်ငွေ့သိုက်ကြီးတွေ ရှိသည်။ ထိုသဘာဝဓာတ်ငွေ့များကိုလည်း တရုတ်က ပိုက်လိုင်းသွယ်ပြီး ဝယ်ယူသည်။ ရေနံကိုကျတော့ အရှေ့အလယ်ပိုင်းဒေသက တန်ချိန်မြောက်မြားစွာသယ်နိုင်သည့် သင်္ဘောကြီးတွေနှင့် သယ်လာပြီး မဒေးကျွန်းသိုလှောင်စခန်းကတစ်ဆင့် တရုတ်ကိုပို့သည်။ တရုတ်အတွက် ကျောက်ဖြူသည် မဟာဗျူဟာ။ ကျောက်ဖြူသည် တရုတ်၏ အိန္ဒိယတံခါးပေါက်။

ယခုရက်ပိုင်းအတွင်း ကျောက်ဖြူက သတင်းခေါင်းစဉ်တစ်ခုဖြစ်လာသည်။ နိုဝင်ဘာလ ၈ ရက်က နေပြည်တော်တွင် မြန်မာအစိုးရ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနနှင့် တရုတ်အစိုးရဘက်က CITIC ကုမ္ပဏီတို့ ကျောက်ဖြူရေနက်ဆိပ်ကမ်း အကောင်အထည်ဖော်ရေး မူဘောင်သဘောတူညီချက်တစ်ရပ် လက်မှတ်ရေးထိုးခဲ့ကြသည်။ ထိုစီမံကိန်းမှာ ကျောက်ဖြူ အထူးစီးပွားရေးဇုန် တည်ဆောက်ရေး စီမံကိန်းကြီး၏ ကနဦးခြေလှမ်းဖြစ်သည်။ ရမ်းဗြဲနှင့် မဒေးကျွန်းပေါ်တွင် တည်ဆောက်မည့် ဒေါ်လာ ၁ ဒသမ ၃ ဘီလီယံတန်ဖိုးရှိ ရေနက်ဆိပ်ကမ်းနှစ်ခုက နှစ်စဉ် ကုန်တန်ချိန် ၇ ဒသမ ၈ သန်းနှင့် ကွန်တိန်နာအလုံးရေ ၄ ဒသမ ၉ သန်း လွှဲပြောင်းနိုင်မည်။ ရေနက်ဆိပ်ကမ်းပြီးသွားလျှင် ရမ်းဗြဲကျွန်းပေါ်၌ စက်မှုဇုန်တစ်ခု တည်ဆောက်မည်။ ထိုစီမံကိန်းကို ၂၀၁၂ ခုနှစ်ကတည်းက တရုတ်အစိုးရနှင့် မြန်မာအစိုးရတို့အကြား ပဏာမ သဘောတူညီမှု ရှိထားခဲ့သည်။ ၂၀၁၅ ခုနှစ် သမ္မတဦးသိန်းစိန်လက်ထက်တွင် အပြီးသတ် စာချုပ်လက်မှတ်ရေးထိုးခဲ့သော်လည်း NLD အစိုးရသစ်တက်လာသောအခါ ဆက်လက် အကောင်အထည် မဖော်ဖြစ်တော့ဘဲ ဆိုင်းငံ့သွားခဲ့သည်။ မူလစာချုပ်တွင် စီမံကိန်းကြီးတစ်ခုလုံးအတွက် တရုတ်ဘက်က ရှယ်ယာ ၈၅ ရာခိုင်နှုန်း မြန်မာဘက်က ၁၅ ရာခိုင်နှုန်းဖြစ်သည်။ တရုတ်ဘက်က စီမံကိန်းတစ်ခုလုံး လက်ဝါးကြီးအုပ် သိမ်းပိုက်သွားနိုင်သည်ဆိုသော ဝေဖန်မှုများ ထွက်ပေါ်လာသည့်အတွက် စာချုပ်ကို ပြန်လည်ပြင်ဆင်လိုက်ရာ ယခုနောက်ဆုံးသဘောတူချက်မှာ တရုတ်က ၇၀ ရာခိုင်နှုန်း၊ မြန်မာက ၃၀ ရာခိုင်နှုန်း။ စီမံကိန်း အကောင်အထည်ဖော်မှုကို တစ်ဆင့်ချင်းပုံစံ ပြောင်းလဲသတ်မှတ်ခဲ့ရာ မူလ ၇ ဒသမ ၂ ဘီလီယံဒေါ်လာမှ ၁ ဒသမ ၃ ဘီလီယံသို့ လျှော့ချလိုက်သည်။ နေပြည်တော်တွင် မူဘောင်သဘော တူညီချက် (Framework Agreement) လက်မှတ်ရေးထိုးပြီးဖြစ်၍ လုပ်ငန်းအကောင်အထည်ဖော်ရေး ကနဦးခြေလှမ်းတွေ စတင်တော့မည်ဖြစ်ရာ ပထမဦးစွာ စီမံကိန်းကြောင့် ဖြစ်ပေါ်လာနိုင်သည့် သဘာဝပတ်ဝန်းကျင်နှင့် လူမှုဘဝထိခိုက်မှု EI /SI များကို ကြိုတင်လေ့လာဆန်းစစ်ကြမည်ဟုဆိုသည်။ ဒါတွေက လတ်တလော ကြားနေရသော သတင်းတွေဖြစ်သည်။

ကမ္ဘာ့သတင်းတွေမှာ ကျောက်ဖြူက ထင်ရှားလာနေသော်လည်း မြို့ကတော့ ခုချိန်ထိ ဆိတ်ဆိတ်ငြိမ်ငြိမ်လေးပဲ ရှိနေသည်။ လွန်ခဲ့သောနှစ် များစွာကတည်းကရှိခဲ့သော ပင်လယ်ဆိပ်ကမ်းမြို့တစ်မြို့၏ အသွင်သဏ္ဌာန်များ ကျန်ရစ်နေဆဲ။ ယခင်ကထက် လမ်းပန်းဆက်သွယ်ရေး ကောင်းမွန်လာခဲ့သော်လည်း မြို့က လှုပ်လှုပ်ရှားရှား မရှိလှသေးပါ။ သဘာဝက ပေးအပ်ထားသည့်အလှများ ကျောက်ဖြူတွင် အရိုင်းဆန်ဆန်ရှိနေသေးသည်။ မြို့၏ အနောက်ဘက်က ကွေ့ဝိုက်နေသော ပင်လယ်ကမ်းခြေက အလွန်သာယာလှပသည်။ လမ်းပန်းဆက်သွယ်ရေးကြောင့်လား၊ သီးခြားဆန်နေသောကြောင့်လားမသိ ကျောက်ဖြူမှာ ခရီးသွားဧည့်သည် သိပ်မတွေ့ရ။ ရွှေ သဘာဝဓာတ်ငွေ့သိုက်ကြောင့် ကျောက်ဖြူမှာ ၂၄ နာရီ လျှပ်စစ်မီးလင်းနေသည်။ ကျောက်ဖြူသာမက ရမ်းဗြဲတစ်ကျွန်းလုံးရွာတွေမှာ လျှပ်စစ်မီး ရနေတာတွေ့ရသည်။ ကျောက်ဖြူမှာ အနာဂတ်တွေရှိနေသည်။ “ကျောက်ဖြူအထူးစီးပွားရေးဇုန်”ကို ဒေသခံတွေလည်း စိတ်ဝင်စားသည်။

ကျဉ်းမြောင်းသော ကျောက်ဖြူ-ရန်ကုန် လမ်းဟောင်းအတိုင်း ကားဖြင့်နာရီဝက်ခန့်သွားရသော မြို့၏တောင်ဘက်ကို သွားရောက် လေ့လာဖြစ်ခဲ့ကြသည်။ ထိုနေရာသည် ကျောက်ဖြူအထူးစီးပွားရေးဇုန် ဧရိယာအဖြစ် သတ်မှတ်ထားသောနေရာ။ လျှိုမြောင်တောင်ကုန်းတွေ၊ လယ်ကွက်တွေ၊ တောအုပ်တွေပဲ တွေ့ရသည်။ သည်နေရာမှာ ရွာအချို့ရှိသည်။ တံငါလယ်လုပ်ဖြင့် အသက်မွေးဝမ်းကျောင်းသော ရိုးသားသည့် ဒေသခံအချို့ရှိသည်။

“စက်မှုဇုန်လုပ်မယ်လို့ ပြောတာပဲ။ ခုထိတော့ ဘယ်သူကမှ တရားဝင်လာအကြောင်းကြားတာ မရှိသေးဘူး။ ကျုပ်တို့ကတော့ တစ်သက်လုံး ဒီတော ဒီတောင်မှာပဲ ကြီးလာခဲ့တာ။ မိဘဘိုးဘွားတွေ လက်ထက်ကတည်းက လယ်ယာအလုပ်တစ်ခုပဲ လုပ်ခဲ့တယ်။ ဒီလယ်တွေကို သိမ်းယူမယ်ဆိုရင်တော့ တန်ရာတန်ကြေးပေး။ တန်ရာတန်ကြေး မရဘူးဆိုရင်တော့ ကျုပ်တို့ လက်ခံမှာမဟုတ်ဘူး။ ကျုပ်တို့က တစ်သက်လုံး ဒီလယ်ပဲလုပ်ပြီး အသက်မွေးလာတာ။ တခြားလည်း မလုပ်တတ်ဘူး။ စက်မှုဇုန်လုပ်တာကို အားပေးတယ်။ ထိုက်သင့်တဲ့ လျော်ကြေးရရင် ကျုပ်တို့ကျေနပ်ပြီ”ဟု ကျောက်ဖြူ မြို့နယ် ပြားတဲကျေးရွာမှ လယ်သမားကြီး ဦးစောမောင်နုက ရင်ဖွင့်သည်။

စက်မှုဇုန် အကောင်အထည်ဖော်မည်ဆိုသော အသံတွေကြားနေရတာ ကြာပြီဖြစ်ကြောင်း၊ ယခု ထပ်ပြီးအသံကြားလာကြောင်း၊ မိမိတို့ လယ် မြေများကိုသိမ်းမည်ဆိုက တန်ရာတန်ကြေးပေးစေလိုကြောင်း၊ မကြာမီရက်များအတွင်းက ကျောက်ဖြူအထူးစီးပွားရေးဇုန် အကောင်အထည်ဖော်ရေး ကော်မတီက ထုတ်ပြန်သည့်စာတစ်စောင်ကို မြို့နယ်ရုံးက ပွင့်လင်းမြင်သာမှုမရှိဘဲ တိတ်တဆိတ် လာကပ်သွားကြောင်း၊ အောက်တိုဘာ ၂၆ ရက်နောက်ဆုံးထားပြီး အကြောင်းမပြန်လျှင် ရေအောက်မြေပေါ်အဖြစ် သိမ်းပိုက်တော့မည်ဟု ကြေညာထားကြောင်း၊ မိမိတို့လယ်မြေများသည် ဘိုးစဉ်ဘောင်ဆက်လုပ်လာသည့် လယ်မြေများဖြစ်သည့်အတွက် ထိုသို့ မတရားသိမ်းယူလျှင် ငုံ့ခံမည်မဟုတ်ကြောင်း ဦးစောမောင်နုက ပြောသည်။

နောင်တစ်ချိန်တွင် ဘယ်လိုဖွံ့ဖြိုးပြောင်းလဲသွားမည် မသိနိုင်သေးသော်လည်း ယခုချိန်ထိတော့ ထိုဒေသလေးမှာ တောတောင်လျှိုမြောင်ကြားက လယ်ယာမြေရိုင်း ဖုန်းဆိုးတွေအဖြစ်နှင့်သာ ရှိနေသေးသည်။ အလားတူ ဒေသခံတို့၏ဘဝတွေကလည်း နွမ်းနွမ်းယဲ့ယဲ့ ချို့ချို့တဲ့တဲ့မျှသာ။ ကျောက်ဖြူ၏ အနာဂတ်မှာ ဘာတွေဖြစ်လာမလဲ မသိနိုင်သေးပါ။

ချစ်ဝင်းမောင် (၁၁-၁၁-၂၀၁၈)