News

POST TYPE

LATEST NEWS POST

ဝီဂါမွတ်ဆလင်များကို ဦးနှောက်ဆေးသည့်သင်တန်းကိစ္စ တရားဝင်ဖြစ်အောင် တရုတ်အစိုးရ ဥပဒေရေးဆွဲပြဋ္ဌာန်း
12-Oct-2018


ဘေဂျင်း၊ အောက်တိုဘာ ၁၁ 

တရုတ်ပြည်သူ့သမ္မတနိုင်ငံ အနောက်ပိုင်းဒေသရှိ လူမျိုးရေးနှင့် ဘာသာရေးဆိုင်ရာ ပြဿနာများဖြစ်ပေါ်နေသော ရှင်ကျန်းပြည်နယ်တွင် ဝီဂါမွတ်ဆလင်များအတွက် စိတ်ဓာတ်ပြုပြင်ရေးနှင့် အသက်မွေးဝမ်း ကျောင်းပညာ လေ့ကျင့်ရေးသင်တန်းကျောင်း များကို ဥပဒေကြောင်းအရ မတက်မနေရ သင်တန်းများအဖြစ် တရုတ်အစိုးရက ဥပဒေရေးဆွဲ ပြဋ္ဌာန်းလိုက်ကြောင်း BBC သတင်းဌာနက ရေးသားဖော်ပြသည်။ 



ရှင်ကျန်းပြည်နယ်တွင် နေထိုင်သော ဝီဂါမွတ်ဆလင် လူနည်းစုများအပေါ် တရုတ်အစိုးရက ဖိနှိပ်မှုများပြုလုပ်နေသည်ဟူသော စွပ်စွဲချက်များကြောင့် နိုင်ငံတကာ အသိုင်းအဝိုင်း၌ ဝေဖန်မှုမြင့်တက်နေစဉ် တရုတ်အစိုးရက ယင်းသို့လုပ်ဆောင်လိုက် ခြင်းဖြစ်သည်။ 

ရှင်ကျန်းပြည်နယ်အုပ်ချုပ်ရေး အစိုးရကအဆိုပါ ဝီဂါမွတ်ဆလင်များအတွက် ဖွင့်လှစ်သော အသက်မွေးဝမ်းကျောင်း စင်တာများသည် အတွေးအခေါ် အပြောင်းအလဲများ ပြုလုပ်ပေးခြင်းဖြင့် အစွန်းရောက်ဝါဒကို တိုက်ဖျက်ရန်ဖြစ်ကြောင်း ကြေညာသည်။ 

လူ့အခွင့်အရေးအုပ်စုများကမူ အဆိုပါ အသက်မွေးဝမ်းကျောင်းပညာ စင်တာများ (ထိန်းသိမ်းလေ့ကျင့်ပေးရေး စခန်းများဟုလည်း ခေါ်သည်) တွင် ဝီဂါမွတ်ဆလင်များ ဖမ်းဆီးထိန်းသိမ်းခံရခြင်းသာဖြစ်သည်ဟု ဆိုကြသည်။ 

ထို့ပြင် ထိန်းသိမ်းခံထားရသူများအနေနှင့် သမ္မတရှီကျင့်ဖျင်နှင့် တရုတ်နိုင်ငံအပေါ် သစ္စာစောင့်သိပါမည်ဟုကတိပြုရသလို ယုံကြည်ကိုးကွယ်မှုကို စွန့်လွှတ်ကြောင်း ထုတ်ဖော်ပြောဆိုရသည်ဟု လူ့အခွင့်အရေး အင်အားစုများက ဆိုသည်။ 

တရုတ်အစိုးရသည် ဝီဂါမွတ်ဆလင် တစ်သန်းခန့်ကို ဖမ်းဆီးထိန်းသိမ်းခဲ့သည်ဟူသော စွပ်စွဲချက်များနှင့်ပတ်သက်၍ အစိုးရက ပြီးခဲ့သည့် ဩဂုတ်လအတွင်း ငြင်းဆိုခဲ့သည်။ 

သို့သော် ကုလသမဂ္ဂလူ့အခွင့်အရေးဆိုင်ရာ ဆွေးနွေးပွဲသို့ တက်ရောက်လာသော တရုတ်အစိုးရအရာရှိကြီးများက အစွန်းရောက် ဘာသာရေးအမြင်ရှိသူ ဝီဂါမွတ်ဆလင်များကို စာရိတ္တပိုင်းဆိုင်ရာ ပြန်လည်ပြုပြင်ရေးနှင့် မွမ်းမံရေးသင်တန်းများ တက်ရောက်စေခဲ့ကြောင်းပြောကြားသွားသည်။ 

ဝီဂါမွတ်ဆလင်အများဆုံးနေထိုင်ရာ ရှင်ကျန်းပြည်နယ်သည် လတ်တလော နှစ်များအတွင်း ဆူပူအုံကြွမှုများနှင့် ဖိနှိပ်မှုများဖြစ်ပေါ်ခဲ့သည်။ တရုတ်အစိုးရက ယင်းဖြစ်ရပ်များသည် ပြည်နယ်ခွဲထွက် ရေးဝါဒီများနှင့် အစွန်းရောက်အင်အားစု များကြောင့်ဖြစ်သည်ဟု စွပ်စွဲပြောဆိုသည်။ 

ယခုလို မွမ်းမံသင်တန်းများတက် ရောက်စေသည့်ကိစ္စအား ဥပဒေရေးဆွဲ ပြဋ္ဌာန်းလိုက်ခြင်းသည် ရှင်ကျန်းပြည်နယ်နှင့်ပတ်သက်၍ တရုတ်အစိုးရ၏ မူဝါဒကို ပထမဆုံးအကြိမ်အဖြစ် ထုတ်ဖော်ပြလိုက်ရာလည်း ရောက်သွားသည်။ 

ရှင်ကျန်းပြည်နယ်အစိုးရက နိုင်ငံပိုင် ရုပ်သံတီဗီမကြည့်ဘဲနေခြင်း၊ နိုင်ငံပိုင်ရေဒီယို နားမထောင်ဘဲနေခြင်း၊ ကလေးငယ်များကို အစိုးရစာသင်ကျောင်းများသို့ မပို့ဘဲထားခြင်း အစရှိသည့် အပြုအမူများ တွေ့ရှိပါက မွမ်းမံရေးစခန်းများသို့ ပို့မည်ဖြစ်သည်ဟု ဆိုထားသည်။ 

အဆိုပါ မွမ်းမံရေးသင်တန်းများတွင် မန်ဒရင်းတရုတ်ဘာသာစကားများ၊ ဥပဒေသဘောတရားများနှင့် အသက်မွေးဝမ်း ကျောင်းပညာများသင်ကြားပေးကြောင်း တရုတ်အစိုးရက ဆိုသည်။ 

လူ့အခွင့်အရေး စောင့်ကြည့်ရေး အဖွဲ့ (HW) မှ ဆိုဖီရစ်ချတ်ဆန်ကမူ လူ့အခွင့်အရေးကို ကျယ်ကျယ်ပြန့်ပြန့်ချိုးဖောက်နေမှုများသည် ဥပဒေကြောင်းအရဟူသော အသုံးအနှုန်းနှင့် ထိုက်တန်မှုမရှိကြောင်း ပြောကြားသည်။ 

F-01