News

POST TYPE

LATEST NEWS POST

ဆွီဒင်ရွေးကောက်ပွဲတွင် လူဝင်မှုဆန့်ကျင်ရေး SD ပါတီကို မဲပေးခြင်းသည် အန္တရာယ်ရှိကြောင်း ဝန်ကြီးချုပ်ပြောကြား
11-Sep-2018


စတော့ဟုမ်း၊ စက်တင်ဘာ ၁၀

ဆွီဒင်ရွေးကောက်ပွဲအတွက် နောက်ဆုံးမဲဆွယ်ရက်တွင် ဝန်ကြီးချုပ်စတီဖင်လတ်ဖင်က အစွန်းရောက်ဝါဒနှင့် ဖက်ဆစ်ဝါဒကို သတိပေးပြောဆိုသွားသည်ဟု BBC သတင်းတွင် ဖော်ပြထားသည်။

ရွေးကောက်ပွဲတွင် ၎င်း၏ လက်ဝဲယိမ်းဆိုရှယ်ဒီမိုကရက်ပါတီနှင့် ပြိုင်ဘက်လက်ယာယိမ်းပါတီပါ နှစ်စုစလုံး မဲအများစု ရနိုင်ဖွယ်မရှိပေ။ လူဝင်မှုဆန့်ကျင်ရေးဆွီဒင် ဒီမိုကရက် SD ပါတီမှာမူ မဲ ၂၀ ရာခိုင်နှုန်း အနိုင်ရမည်ဟု မျှော်လင့်ရပြီးပါလီမန်တွင် ဒုတိယအကြီးဆုံးပါတီ ဖြစ်လာနိုင်သည်။

ဝန်ကြီးချုပ်လတ်ဖင်က SD ကိုမဲပေးခြင်းသည် အန္တရာယ်ရှိကြောင်း၊ ဆန့်ကျင်ဖက် အကျိုးဆက်ဖြစ်လာနိုင်ကြောင်း၊ မီးတောက်ကို အရက်ဖျန်း၍ ငြိမ်းခြင်းနှင့်တူကြောင်း မှတ်ချက်ပေးသည်။

ဆွီဒင်ရွေးကောက်ပွဲအတွက် မဲဆွယ်မှုများတွင် လူဝင်မှုဆိုင်ရာကိစ္စက အဓိက အကြောင်းအရာဖြစ်နေသည်။ အမျိုးသားရေးလှုံ့ဆော်သော SD ပါတီသည် ၂၀၁၄ ရွေးကောက်ပွဲတွင် အမတ်နေရာ နှစ်ဆတိုးလာခဲ့ပြီး လာမည့်တနင်္ဂနွေရွေးကောက်ပွဲတွင် နောက်ထပ်နှစ်ဆတိုးမည်ဟု ခန့်မှန်းရသည်။

SD ပါတီခေါင်းဆောင် ဂျင်မီအက်ကီ ဆန်က ဆွီဒင်သည် လူဝင်မှုကိစ္စတစ်ခုတည်း ကြောင့်သာမကဘဲ အကြောင်းအမျိုးမျိုးကြောင့် တစ်ဖက်စွန်းတိုင်းပြည်တစ်ခု ဖြစ်နေခဲ့ကြောင်းနှင့် ရွှေ့ပြောင်းဒုက္ခသည် လျော့၍ လက်ခံမည့်အစီအစဉ်သည် ဥရောပတွင် ပုံမှန်နိုင်ငံရေးတစ်ခုအဖြစ် သတ်မှတ်ခံရမည်ဖြစ်ကြောင်း စနေနေ့က ပြောကြားခဲ့သည်။

SD ပါတီသည် နာဇီလက်သစ်များ၊ လက်ယာစွန်းအစုများနှင့် ယခင်ကတည်းက အဆက်အသွယ်ရှိခဲ့ပြီး ၂၀၁၀ တွင် ပါလီမန်သို့ ဝင်ရောက်လာခဲ့သည်။ ထို့အပြင် ယခင်မီးတုတ်တံဆိပ်ကို ဆွီဒင်အလံမှ အပြာနှင့် အဝါရောင်ပါဝင်သော ဒေစီပန်းတံဆိပ်သို့ ပြောင်းလဲကာပုံရိပ်ပြောင်းရန် လုပ်ဆောင်ခဲ့သည်။

ယခင်ကအလုပ်သမားလူတန်းစားကို ဆွဲဆောင်ခဲ့ရာမှ ယခုအခါ အမျိုးသမီးများ၊ ပညာတတ်နှင့် ဝင်ငွေမြင့်သော မဲဆန္ဒရှင်များကို စည်းရုံးရန် ကြိုးစားလာခဲ့သည်။ ၂၀၀၅ တွင် ပါတီခေါင်းဆောင်ဖြစ်လာခဲ့သော အက်ကီဆန်က ပါတီအတွင်းလူမျိုးရေးခွဲခြားမှုကို သည်းမခံကြောင်းနှင့် ပါတီဝင်များစွာကို ထုတ်ပယ်ခဲ့ကြောင်း ပြောကြားသည်။

သို့တိုင်အောင် SD သည် လူမျိုးရေးခွဲခြားမှုအရှုပ်အထွေးများတွင် ပါဝင်ပတ်သက်နေဆဲပင် ဖြစ်သည်။

ဆွီဒင်သည် စီးပွားရေးကောင်းမွန်နေသော်လည်း ၂၀၁၅ တွင် ရွှေ့ပြောင်းဒုက္ခသည်များ စီးဝင်လာမှုကြောင့် အိမ်ယာ၊ ကျန်းမာရေးစောင့်ရှောက်မှုနှင့် လူမှုဖူလုံရေးစနစ်များအပေါ် ဖိအားကျရောက်လာမည်ကို ပြည်သူများက စိုးရိမ်နေကြသည်။ ထိုနှစ်က ရွှေ့ပြောင်းဒုက္ခသည် ၁၆၃,၀၀၀ ကို ဆွီဒင်က ခွဲတမ်းအရလက်ခံခဲ့ရသည်။

ထို့အပြင် SD သည် အီးယူမှထွက် ရေးအတွက် Swexit ဆန္ဒခံယူပွဲကို ကျင်းပရန် လိုလားနေသော်လည်း အင်အားကြီးပါတီကြီးများ ကန့်ကွက်မှုကြောင့် ရှေ့ဆက်တိုးနိုင်ဖွယ်မရှိဟု သိရှိရသည်။

လက်ရှိဝန်ကြီးချုပ် လတ်ဖင်သည် ၎င်း၏ ညွှန့်ပေါင်းအစိုးရကိုဆိုရှယ်ဒီမိုကရက်နှင့် ဂရင်းပါတီတို့ကို မဟာမိတ်ဖွဲ့၍ စုစည်းထားခြင်းဖြစ်သည်။ လက်ရှိနှစ်များတွင် ဆိုရှယ်ဒီမိုကရက်များနှင့် အင်အားကြီး အတိုက်အခံ လက်ယာယိမ်း Modrates တို့ နှစ်ဖွဲ့စလုံးထောက်ခံမှု ကျဆင်းနေသော်လည်း SD ပါတီနှင့် မဟာမိတ်ဖွဲ့မည်မဟုတ်ဟု နှစ်ဖွဲ့စလုံးက ကြေညာထားကြပြီး လတ်ဖင်၏ ဆိုရှယ်ဒီမိုကရက်များကပွတ် ကာသီကာ အနိုင်ဖြင့် နောက်တစ်ကြိမ် ညွှန့်ပေါင်းအစိုးရ ဖွဲ့နိုင်ဦးမည်ဟုမျှော်လင့်ရသည်။

F-04