POST TYPE

LATEST NEWS POST

ဘရိတ်ဇစ် စာရွက်စာတမ်းကို ဘာသာပြန်ဆိုမှု အားနည်း၍ ဗြိတိန်အစိုးရ လှောင်ပြောင်ခံရ
22-Jul-2018



လန်ဒန်၊ ဇူလိုင် ၂၁

အီးယူမှ ဗြိတိန် နုတ်ထွက်မှုကို ဖော်ပြသော စာတမ်းအား ဗြိတိန်နိုင်ငံက ဥရောပဘာသာစကား အမျိုးမျိုးဖြင့် ဘာသာပြန်ဆို ထုတ်ဝေမှုအပေါ် ဥရောပတိုက်ရှိ ရိုးရာဓလေ့ စကားပြောသူများထံမှ လှောင်ပြောင်သံများ ထွက်ပေါ်လာခဲ့သည်ဟု DW သတင်းတွင်ဖော်ပြထားသည်။

အင်္ဂလိပ်ဘာသာမှ ဂျာမန်ဘာသာသို့ ဘာသာပြန်ရာတွင် စကားလုံးများရွေးချယ်ရာ၌ ရှေးဆန်ပြီး ဒဏ္ဍာရီဆန်နေသည်ဟု ဆိုသည်။

ဘရိတ်ဇစ်စာတမ်းအား ဥရောပဘာသာစကား ၂၂ မျိုးဖြင့် ဗြိတိန်နိုင်ငံက ထုတ်ပြန်ပေးခဲ့ရာ ဗြိတိန်အစိုးရကို ဘရပ်ဆဲလ်ရှိ ဂျာမန်စကားပြောသော တာဝန်ရှိသူများနှင့် လူမှုမီဒီယာအသုံးပြုသူများက သရော်ခဲ့ကြခြင်းဖြစ်သည်။

ဂျာမန်ဘာသာပြန်ဆိုမှုသည် ခေါင်းစဉ်ရေးသားရာတွင် သဒ္ဒါအမှားဖြင့် ဆိုးဆိုးဝါးဝါး စတင်ခဲ့သည်ဟု ဗြိတိန် အင်ဒီပင်းဒင့်သတင်းစာက ရေးသားထားသည်။ ဂျာမန်ဘာသာပြန်ဆိုမှုသည် ရှေးဆန်သည့်အပြင် ရှုပ်ထွေးသောစကားလုံးများကို မလိုအပ်ဘဲ သုံးနှုန်းထားမှုများကြောင့် “ကလီရှေး” (ရှည်လျားထွေပြား) စာတမ်းဖြစ်နေပြီး ရှေးဟောင်းဂျာမန်စာများကဲ့သို့ ဖြစ်နေသည်ဟု ဘရပ်ဆဲလ်မှ ဂျာမန်စကားပြော အရာရှိတစ်ဦးက အင်ဒီပင်းဒင့်သတင်းစာသို့ ပြောကြားသည်။

ဂျာမန်စကားပြောသူ အခြားအီးယူ အရာရှိတစ်ဦးကလည်း “ပွင့်ပွင့်လင်းလင်းပြောရရင် ဒါမျိုးမမြင်ဖူးဘူး။ ကျွန်တော် ဒီနေ့အထိ အင်္ဂလိပ်- ဂျာမန် ဘာသာပြန်ဆိုမှုတွေနဲ့ တွေ့ထိလုပ်ကိုင်နေခဲ့တာပါ။ ကျွန်တော့် အင်္ဂလိပ်စကားက သိပ်မကောင်းပေမယ့် ဒါကတော့ ဘာသာစကား ပြဿနာမဟုတ်ဘဲ အကြောင်းအရာကို ရေးသားပုံနဲ့ ပိုဆိုင်မယ်ထင်တယ်”ဟု ပြောကြားသည်။

ဖတ်ရှုသူပရိသတ်များကလည်း ညံ့ဖျင်းသည့် ဘာသာပြန်ဆိုမှုများအပေါ် စိတ်ပျက်မိကြောင်း twitter တွင် ရေးသားခဲ့ကြသည်။ ဂျာမန်ဘာသာပြန်ဆိုမှုနှင့် ပတ်သက်၍ ဖတ်ရှုရသည်မှာ ကသိကအောက်ဖြစ်ကြောင်း၊ ဂျာမန်ဘာသာကို ကျောင်းတွင် သင်ယူဖူးသော်လည်း လုံးဝမပြောခဲ့ဖူးသူ ပရော်ဖက်ရှင်နယ်မဟုတ်သော ဘာသာပြန်ဆရာ၏ လက်ရာဖြစ်နိုင်သည်ဟု အော်စကာဒီတော်ဆန်ဆိုသူက မှတ်ချက်ပေးထားသည်။

ဗြိတိန်သတင်းစာ The Times မှ ဆောင်းပါးရှင် အော်လီဗာခမ်းကလည်း ညံ့ဖျင်းသောဘာသာပြန်ဆိုမှုသည် အမျိုးသားဂုဏ်သိက္ခာ ကျဆင်းမှုဖြစ်သည်ဟု twitter တွင် ရေးသားထားသည်။

“ဂျာမန်ဘာသာပြန်ဆိုမှုရဲ့ အဖွင့်စာပုဒ်တွေဟာ အင်္ဂလိပ်-ဂျာမန် ဘာသာပြန် ချို့ယွင်းချက်အလွဲတွေနဲ့ ပြဿနာတွေကိုအနည်းဆုံး seminar နှစ်ကြိမ်စာလောက်တော့ ဆွေးနွေးဖို့ လုံလောက်မှုရှိတယ်”ဟု ကာစတင်ဖိုက်ဖာဆိုသူက ပြောကြားသည်။

ယခုကိစ္စတွင် ဂျာမန်ဘာသာပြန်တစ်မျိုးသာ သရော်ခံရခြင်းမဟုတ်ဘဲ ပြင်သစ်စကားပြောသူများကလည်း ပြင်သစ်ဘာသာပြန်ဆိုမှု အမှားများကို ဝေဖန်ထောက်ပြခဲ့ကြသည်။

ဒတ်ခ်ျဘာသာပြန်ဆိုမှုတွင်လည်း ဒတ်ခ်ျစာဖတ်သူများက ဘာသာပြန်အမှားများကို သတိပြုမိခဲ့ကြသည်။ မက်စ်ဒင်ဘလန်ကန်ဆိုသူက “ယူကေအစိုးရခင်ဗျား။ ခင်ဗျားတို့ရဲ့ အားထုတ်မှုကိုတော့ အသိအမှတ်ပြုပါတယ်။ ဒါပေမဲ့ ကျွန်တော်တို့ကို နားလည်စေချင်တယ်ဆိုရင်တော့ ကျေးဇူးပြုပြီး အင်္ဂလိပ်ဘာသာကိုပဲ ကိုင်စွဲစေချင်ပါတယ်။ ဘာသာပြန်ချက်ကတော့ ကြောက်စရာပဲဗျို့။ လေးစားစွာဖြင့် နယ်သာလန်လူမျိုးများ”ဟု twitter တွင် ရေးသားထားသည်။ 

F-04