News

POST TYPE

LATEST NEWS POST

သီလဝါစီးပွားရေးဇုန် အပိုင်း (ခ) မြေကွက်များ ဇူလိုင်တွင် ရောင်းမည်
17-Jun-2018


ရန်ကုန်၊ ဇွန် ၁၆

ပြည်တွင်း ပြည်ပ စီးပွားရေးလုပ်ငန်းများ ရင်းနှီးမြှုပ်နှံနိုင်ရန်အတွက် သီလဝါအထူးစီးပွားရေးဇုန် အပိုင်း (ခ) ၏ မြေကွက်များကို ဇူလိုင်လတွင် စတင်ရောင်းချမည်ဖြစ်ကြောင်း မြန်မာ-ဂျပန် သီလဝါ ဖွံ့ဖြိုးရေးလိမီတက် (MJTD) ထံမှ သိရသည်။

အပိုင်း (ခ) ၏ ပထမအဆင့်ဖြစ်သော အကျယ်အဝန်း ၇၇ ဟက်တာ (ဧက ၁၉၀ ကျော်) တွင် ရင်းနှီးမြှုပ်နှံမှုလုပ်ငန်းများအတွက် လိုအပ်သော အခြေခံအဆောက်အဦများဖြစ်သည့် လျှပ်စစ်မီး၊ ရေ၊ လမ်းများနှင့် အခြားသောဝန်ဆောင်မှုများဖြစ်သည့် ပြုပြင်ထိန်းသိမ်းခြင်းဆိုင်ရာများကိုလည်း ထောက်ပံ့ပေးနိုင်နေပြီဖြစ်ကြောင်း အဆိုပါကုမ္ပဏီက သတင်းထုတ်ပြန်သည်။

သီလဝါအထူးစီးပွားရေးဇုန် အပိုင်း (က) ကို ၂၀၁၅ ခုနှစ်တွင် စတင်ခဲ့ပြီး ယခု ထပ်မံတည်ဆောက်ပြီးစီးနေပြီဖြစ်သည့် အပိုင်း (ခ) မြေကွက်များအရ သီလဝါအထူးစီးပွားရေးဇုန်ရှိ စီးပွားရေးလုပ်ငန်းများ ရင်းနှီးမြှုပ်နှံနိုင်မည့် အကျယ်အဝန်းမှာ ၅၈၃ ဟက်တာအထိ ရှိလာမည်ဖြစ်သည်။ 

လက်ရှိအချိန်တွင် သီလဝါအထူး စီးပွားရေးဇုန်၌ ၂၀၁၈ ခုနှစ်တွင် နိုင်ငံပေါင်း ၁၇ ခုမှ စီးပွားရေးလုပ်ငန်းပေါင်း ၉၄ ခန့်သည် အမေရိကန်ဒေါ်လာ ၁ ဒသမ ၄ ဘီလီယံကျော်အထိ ရင်းနှီးမြှုပ်နှံထားပြီး ယင်းအရေအတွက် ထပ်မံတိုးလာရန်ရှိသေးကြောင်း MJTD ကုမ္ပဏီထံမှသိရသည်။

လတ်တလော သီလဝါအထူးစီးပွားရေးဇုန်တွင် လုပ်ငန်းလည်ပတ်နေသော စက်ရုံများတွင် အလုပ်အကိုင်အခွင့်အလမ်းပေါင်း တစ်သောင်းကျော်အထိ ဖန်တီးပေးထားနိုင်ပြီး စက်ရုံပေါင်း ၉၀ ကျော် ပြီးစီးပါက အလုပ်အကိုင်အခွင့်အလမ်းပေါင်း လေးသောင်းခန့်အထိ ဖန်တီးပေးနိုင်မည်ဖြစ်ကြောင်း သီလဝါအထူးစီးပွားရေးဇုန် စီမံခန့်မှုကော်မတီမှ တာဝန်ရှိသူတစ်ဦးက ပြောကြားသည်။

သီလဝါအထူးစီးပွားရေးဇုန်၌ ရင်းနှီးမြှုပ်နှံလျက်ရှိသော လုပ်ငန်းများမှာ အထည်ချုပ်လုပ်ငန်း၊ သံမဏိအဆောက်အအုံ ပစ္စည်းထုတ်လုပ်ခြင်းလုပ်ငန်း၊ ဘိလပ်မြေစက်ရုံ၊ ဆောက်လုပ်ရေးနှင့် ဆက်စပ်ပစ္စည်းများထုတ်လုပ်သော စက်ရုံများ၊ စားသောက်ကုန်စက်ရုံများ၊ ဓာတ်မြေဩဇာ ထုတ်လုပ်ခြင်း၊ လယ်ယာသုံးစက်ပစ္စည်း ထုတ်လုပ်ခြင်းလုပ်ငန်းများအပါအဝင် လယ်ယာစိုက်ပျိုးရေး ဆက်စပ်လုပ်ငန်းများ၊ မော်တော်ယာဉ်တပ်ဆင်ခြင်းနှင့် မော်တော်ယာဉ် အပိုပစ္စည်း ထုတ်လုပ်သည့်လုပ်ငန်းများနှင့် ဆေးဝါးနှင့်ဆေးဘက်ဆိုင်ရာပစ္စည်း ထုတ်လုပ်သည့်စက်ရုံတို့ဖြစ်ကြောင်း အဆိုပါကော်မတီထံမှ သိရသည်။

J-01



  • VIA