News

POST TYPE

LATEST NEWS POST

အင်းစိန်ထောင်အတွင်း တီဘီလူနာဆောင်အသစ် ဆောက်လုပ်
22-May-2018 tagged as အင်းစိန်

ရန်ကုန်၊ မေ ၂၂

လာမည့် ၂၀၃၅ ခုနှစ်တွင် တီဘီရောဂါ ဖြစ်ပွားမှု အဆုံးသတ်နိုင်ရန် စီမံချက်များနှင့် အဆောက်အအုံများ တိုးချဲ့ခြင်း ပြုလုပ်လျက်ရှိပြီး အင်းစိန် အကျဉ်းထောင်အတွင်းရှိ တီဘီရောဂါ လူနာများအတွက် တီဘီလူဆောင်အသစ်ကို ဆောက်လုပ်လျက်ရှိကြောင်း ကျန်းမာရေးနှင့် အားကစားဝန်ကြီးဌာနထံမှ သိရသည်။

“အခုဆောက်နေတဲ့ အဆောက်အအုံက ၅၀ ရာခိုင်နှုန်းလောက်တော့ပြီးပြီ။ တီဘီလူနာ သီးသန့် တစ်ထပ်ဆောင်ပါ”ဟု အင်းစိန်ဗဟိုအကျဉ်းထောင်မှ တာဝန်ရှိသူတစ်ဦးကဆိုသည်။

အဆိုပါ အင်းစိန် ဗဟိုအကျဉ်းထောင်တွင် တီဘီနှင့် ဆေးယဉ်ပါးတီဘီရောဂါ ဖြစ်ပွားသူ ၇၀ နီးပါးရှိပြီး ယခု ဆောက်လုပ်လျက်ရှိသည့် အဆောက်အအုံ ပြီးစီးပါက တီဘီရောဂါ ဖြစ်ပွားသူများအား ပြောင်းရွှေ့ထားသွားမည်ဖြစ်ကြောင်း ကျန်းမာရေးနှင့် အားကစား ဝန်ကြီးဌာနထံမှ သိရသည်။

ထို့အပြင်ကျန်းမာရေးနှင့် အားကစား ဝန်ကြီးဌာနအနေနှင့် ဆေးယဉ်ပါးတီဘီ ရောဂါရှာဖွေခြင်းကို လူတိုင်း လက်လှမ်းမီနိုင်စေရေးအတွက် ဇီဝလုံခြုံမှုအဆင့် - ၃ ရှိ ဓာတ်ခွဲခန်းများကို တိုးချဲ့ဖွင့်လှစ်လျက်ရှိပြီး ပြည်နယ်နှင့် တိုင်းများရှိ သွားလာရခက်ခဲသော ဒေသများ၊ ရွှေ့ပြောင်းနေထိုင်သူများကို တီဘီသံသယ လက္ခဏာများ မေးမြန်း၍ ဖော်ထုတ်သွားမည်ဖြစ်ကြောင်း အမျိုးသား တီဘီရောဂါ တိုက်ဖျက်ရေး စီမံကိန်းပါ အချက်များတွင် ဖော်ပြထားသည်။

ထိုအဆောက်အအုံများကို ထောင်စုနှစ် ဖွံ့ဖြိုးတိုးတက်ရေး ရည်မှန်းချက် သုံးမျိုး ရန်ပုံငွေ (3MDG)၏ ရန်ပုံငွေဖြင့် UNOPS မှ မန္တလေးတိုင်းဒေသကြီ၊ ပုသိမ်ကြီးမြို့နယ်ရှိ ခုတင် ၂၀၀ ဆံ့ ဆေးရုံဝင်းအတွင်း၌ ဆေးယဉ်ပါး တီဘီရောဂါ လူနာအစောင့်များ နားနေနိုင်ရန် အဆောက်အအုံတစ်လုံး၊ ပြည်ကြီး တံခွန်မြို့နယ်၌ တီဘီပြင်ပလူနာဌာနနှင့် ရန်ကုန်တိုင်းဒေသကြီး၊ အောင်ဆန်း တီဘီဆေးရုံအနီးတွင် တီဘီပြင်ပလူနာဌာနနှင့် ဇီဝလုံခြုံမှု အဆင့်-၃ ရှိ ဓာတ်ခွဲခန်းများကို ဆောက်လုပ်ပေးခဲ့ပြီးဖြစ်ကြောင်း 3MDG ထံမှသိရသည်။

လက်ရှိအချိန်တွင် ဇီဝလုံခြုံမှုအဆင့် - ၃ ရှိ တီဘီဓာတ်ခွဲခန်းများကို ရန်ကုန်၊ မန္တလေးနှင့် တောင်ကြီးမြို့များတွင်သာ ဖွင့်လှစ်ထားနိုင်ပြီး တီဘီနှင့်ဆေးယဉ်ပါး တီဘီရောဂါပိုး ရှိ၊ မရှိကို Gene Xpert စက် စုစုပေါင်း ၇၄ လုံးဖြင့် တိုင်းဒေသကြီး၊ ပြည်နယ်၊ ခရိုင်နှင့်မြို့နယ်များ အားလုံး လွှမ်းခြုံနိုင်အောင် ဆောင်ရွက်လျက်ရှိကြောင်း အမျိုးသား တီဘီရောဂါ တိုက်ဖျက်ရေး စီမံကိန်းက ထုတ်ပြန်ထားသည်။

J-12